Ард түмэнд онлайн түргэн шуурхай электрон барааны зээл олгодог гэх нэрээрээ олны итгэлийг олоод авсан Сайн Интернэшнл ХХК -ийн  “Сайн электроникс”  дэлгүүр нь  ард иргэдийн итгэл дээр тоглолт хийн, дарамт үүсгэн үйлчлүүлэгчээ  хүндлэхгүй байдал нь хэрээс хэтэрчээ. Манай редакцад тухайн байгууллагад гомдол гаргах иргэдийн тоо өдрөөс өдөрт нэмэгдсээр. Иймээс “Sain elictronics”-ийн бодит байдлыг бид сурвалжлан хүргэе.

Нэгдүгээр сарын 17-ны өдөр бараа худалдаж авах захиалга өгөхөөр Sain Electronics”-ийн пэйж хуудас / https://www.facebook.com/eSain.mn/ / хандаж сонирхож буй бараа дор өөрийн дугаараа үлдээлээ..

 Төд удалгүй мэдээллийн ажилтан холбогдлоо..

Sain: Сайн байна уу? Та шалгуураа хангасан байна. Манай үйлчилгээний төв дээр ирж бараагаа авна уу? гэнэ.

Зээлдэгч: Ямар шалгуураар хангачихав бараагаа авч болно гэж үү?

Sain: Тэгэлгүй яахав болно. Та 10 минутын дотор шийдүүлээд авах боломжтой

Зээлдэгч: Ямар бичиг баримт авч очих вэ?

Sain: Та ганцхан иргэний үнэмлэхтэйгээ ирэхэд л болно.

Зээлдэгч: Хэд хүртэлх ажиллах вэ? Би 6 цагт очиж болох уу? Хэр уддаг вэ?

Sain: Бололгүй яахав. Бид 9 хүртэлх ажиллана. Таны зээлийг 10 минутад шийдээд өгнө.

Хэмээн хэний ч сэтгэлд нар гийх хариулт өгнө. Үүнийг сонсон хүн бүр талбайн урд байрлах “Sain elictronics”-ийн зээлийн төв дээр яг цагтаа гозойгоод зогсоно.

Гэтэл миний төсөөлж байснаас маш хүнд нөхцөл хүлээж байлаа. Яг л түм бужигнаж, бум бужигнах газар гэдэг нь энэ байлаа. Тэнд халдвар хамгаалалтын дүрэм журам огтооосоо үйлчилж байгаа юм алга. Хоёр метрийн зайтаа зогсох битгий хэл хүн орох зайгүй оочертой харагдана. 

Би зээлдэгч хүний үүднээс дотроос бүгдийг судлах ажилдаа оров.

За тэгээд мэдээллийн ажилтны хэлснээр 10 минут болоод л бараагаа авах өнөөх газар нь нэг хүнд  30 минутаас дээш хугацаа зарцуулна. 18 цагт ирсэн миний бие 18:30 минутад мэргэжилтэн дээр очлоо. За тэгээд бараагаа сонголоо. Дараа нь анкет бөглөж банкруу нэвтрэн сүүлийн 6 сарын гүйлгээний дүнг хараад хэвлээд авлаа.

-За боллоо та хоёр давхарт гаран ББСБ-д материалаа аваачиж өгөөд бараагаа авах паданаа авна гэлээ. Ингээд 19 цаг 30 минут болов.

Тэр үед өнөөдөр бараа авах өнгөрч байгаа юм байна даа гэсэн бодол шууд толгойд орж ирэв.

За тэгээд хоёр давхарт ББСБ-д оочирлож байгаа хүмүүс нь бас л бужигнана. Яасан газар гэхээр гэж дуу алдахаар... Өнөөх ББСБ–ыг олтол та хүлээж бай гээд 40 минут боллоо. Цагаа хартал 20 цаг аль хэдийнээ өнгөрсөн байлаа. 21 цаг хүртэл бараа олгох учир та амжина. Энд байгаа хүмүүсийг бүгдийг нь тооцоолоод ажиллана гэв. За нэгэнт хүлээснийх хүлээлгүй л яахав.

21 цаг болохын өмнөх нь одоо л нэг дуудаж байна. Ортол та боломжгүй юм байна гэлээ. 3 цаг хүлээсний эцэст ийм хариу сонсов. Яагаад гэж асуухад. Таны мэргэжилтэн буруу шивэлт хийсэн байна. Та дахин засаад ирнэ үү? гэлээ.

Ээ бурхан минь гэж тэсвэр тэвчээр алдагдах үйлчлүүлэгч нь надаар дуусаагүй бололтой. Энэ тэнд л асуудал, хямарсан хүмүүс...

Эргээд мэргэжилтэн дээр очтол өөрийгөө зөвтгөж байх нь ээ. Албаны дарга нь ирж манай ажилтны буруу байна та маргааш шууд ирээд аваарай. Бид тантай холбогдох болно гэлээ. Бид бүгдийг бэлэн болгоё хэмээн уучлалт гуйлаа.

Мэдээж би сурвалжилгынхаа үр дүнг харахын тулд ирэлгүй яахав.

Маргааш нь буюу нэгдүгээр сарын 18-ны өдөр би өдрийн 15 цагт өнөөх газар руугаа ярилаа. Надруу залгана гэсэн алга болсон учир залгалаа. Шүүлгүүлэхэд таны материал бэлэн болсон байна. Та ажлаа тараад ирээд авчих гэлээ. За тэгээд ажлаа тараад өнөөх 18 цагтаа яваад очлоо. Миний өмнө сууж байсан эхнэр, нөхөр хоёр мэргэжилтэн рүү цаг зав, явдал чирэгдэл энэ тэр гээд бөөн хэрүүл болцгоож байв.

Түүний дараа  мэргэжилтэн маань ирэн “Бүгд бэлэн та ББСБ-руу ороод шүүлгүүлээд паданаа аваарай” гэлээ. Өнөөх үйлдэл нь яг давтагдаж байна. За яваад ортол та боломжгүй юм байна. Банкны хуулганы гүйлгээний утгууд гарч ирээгүй байна гэлээ.  “Цалинтай гэж нотлох” юу ч алга. Мэргэжилтэн буруу хэвлэсэн байна” гэлээ.

Одоо тэгээд яах уу? Худлаа болсон уу? ийм зүйл дээр дахиад ирмээргүй байна гээд өчигдөр болсон зүйл, учир явдлаа хэллээ.  Бид ББСБ болохоор "Сайн электроникс"-тай огт хамаагүй. Бидэнд ч бас маш их төвөг удаж байна. Ажлаа мэдэхгүй бидний ажилд чирэгдэл учруулж үйлчлүүлэгчид бидэнд уурлаад байгаа. Бидний буруу учир би таныг оруулаад өгье гэлээ. За тэгээд паданаа аваад бараагаа авч болно гэхээр нь одоо л боллоо доо гээд бараа авах гэтэл хана дагаад зогссон 30 орчим хүний ард очлоо. Тухайн үед 19 цаг 30 минут болж байлаа.

Оочирлож байх зуураа иргэдийн сэтгэгдлийг сонслоо.

Иргэн 1:

Бид зээл хийж байгаа ч гэсэн хүн шүү дээ. Эд нар бид нартай арай л дураараа харьцах юм аа. Хэд, хэд буцаана. Мэдээллээ буруу өгнө. Би нялх хүүхэдтэйгээ явж байна. Энд ирээд 3 цаг гаран болж байна. Үнэхээр асуудалтай гэж толгойгоо сэгсрэн хүүхдээ тэврэн зогсож байгаа эмэгтэй...

Иргэн 2:

Би 2 саяын үнийн дүнтэй бараа зээлдэж байна. Бараа олгодог газар нь ганцхан байх юм. Ангилаад түргэн шуурхай үйлчилж болдоггүй юм байхдаа. Хоёр удаа ирж байна. Өчигдөр дансны хуулгыг гаргахдаа буруу гаргасан гэх шалтгаанаар хойшлуулаад өнөөдөр ирсэн. Бид ирэхдээ банкныхаа хуулгыг аваад ирж болох зүйл шүү дээ. Ажлаа мэдэхгүй, ажилдаа дарагдсан байж байж сүртэй реклам хийнэ. Энэ рекламаа зогсоох хэрэгтэй шүү дээ. Ард иргэдэд чирэгдэл учруулан барин зээл авахуулах ямар ч хэрэггүй шүү дээ. Би чирэгдэлгүй байх гэж бодон Сайншандаас зорин ирсэн хүн. Холоос зорьж ирсэн болохоороо л тэвчиж байна даа

Иргэн 3:

Зээлээ зүгээр ч өгчихгүй бас дээр нь шимтгэл, маягтын хураамж гэж мөнгө хураана. Яасан газар гэхээр иргэдэд чирэгдэл учруулж, шулж байдаг байна аа. Нэгэнт л хүлээсэн хойно авахаас яахав гээд л зогсож байна. Анх мэдээллийн ажилтан нь залгахад та шалгуурт тэнцлээ гэхэд нь яаж шалгасан юм бол гэж их гайхсан. Facebook зургыг хараад тэнцүүлчих юм байх даа л гэж бодсон./Инээв/ "Sain elictronics"-ийн үнэ төрхийг зээлдэгчид хэллээ. Тэнд хүлээж байгаа хүмүүс бүгд л ийм сэтгэгдэлтэй.

Миний оочир ирэх дөхлөө яг 21 цаг боллоо. Тэгэхээр би нийтдээ 1 цаг 30 минут яс зогссон гэсэн үг. Тэнд өндөр настан, хөгжлийн бэрхшээлтэй, хүүхэдтэйгээ яваа гээд олон хүмүүс байгааг хараад би ч залуу хүн байна даа гээд тоохгүй л зогсоно

Зарим хүмүүсийг барааг гаргаж өгөх агуулах нь хаасан байна гэж ажилтан гаднаас орж ирээд хэлээд авлаа. Гэтэл өдөржин хүлээсэн хүмүүс уурлалгүй л яахав. Бөөн хэрүүл боллоо.

Би ч бараагаа авахаар орлоо. Та барааны үнийн нэг хувийн шимтгэлийг төлнө үү гээд пост машин гаргаж ирээд 20.000  төгрөг, мөн тэмдэгтийн хураамж гээд 4.000 төгрөг нийт 24000 төгрөг зураад авлаа. Энэ талаар хэлээгүй шүү дээ гэхэд ийм л байдаг шүү дээ гэнэ. Зарим нь өдөржин оочерлоод авахын даваан дээр шимтгэл төлөх мөнгөгүй байж байх жишээтэй. Бэлэн мөнгөөр үйлчлэхгүй заавал картаар гэнэ гээд дахиад асуудал үүснэ. Би  бараагаа авч яг 21 цагт боллоо. Миний хойно хориод хүн үлдлээ. Тэд нарт үйлчилж амжих болов уу? гэсэн харцтайгаа гараад явлаа... Ийм маягтай хоёр өдрийн турш цагаа гарган байж нэг бараа авлаа.

Сайн Интернэшнл ХХК -ийн “Сайн электроникс” гэх онлайн цахилгаан барааны дэлгүүр нь ажлаа мэддэггүй хүмүүсээр дүүрсэн, ард түмний тэсвэр тэвчээр стрессийн дээд цэгт хүргэн бараа олгохоос гадна иргэд авсан барааныхаа хүүг төлөх гэрээ хийхийн хажуугаар авах барааны нэг хувийн шимтгэлийг авч, маягтын хураамж гэх мөнгийг авч өдөрт хэдэн зуун үйлчлүүлэгчээс сул мөнгө авч иргэдийг шулж байгаа газрын толгой цохиж яваа газар бол яахын аргагүй“Сайн электроникс” дэлгүүр  юм.

Үйлчилгээний догогдолтой “Сайн электроникс” иргэдийг мөнгөнөөс бага, багаар “Шулж ” иргэдийг дарамтад оруулж байна.

Өнөөдөр ард иргэд тухайн бараагаа бэлнээр авах мөнгөгүй, авсан цалин нь хүрэлцэхгүй байгаа энэ үед иргэдэд тодорхой нөхцөлтэйгээр зээлдүүлж байгаа нь саашаалтаа ч тэд бол хүн. Танай байгууллагын үйлчилүүлэгч, тэд мөнгөө төлдөг, хүүгээ төлдөг баян ард түмэн. Гэтэл тэднийг үл тоосон уг байгууллагын ажилчид болон удирдах албаны хүмүүст анхааруулахад иргэдийн санэл, гомдлыг бид уламжлан хүргүүлнэ,

Иргэд зөв зохистой үйлчилүүлэхийг уг сурвалжлагынхаа эхэнд мэдээлж байна. Үргэлжлэл бий...