Төр.мн

Нүүр / Спорт / Маргааш халз тоглох Монгол, Брунейн багууд хэвлэлийн бага хурал хийв

Спорт

Маргааш халз тоглох Монгол, Брунейн багууд хэвлэлийн бага хурал хийв

Т.Төгөлдөр

6 жилийн өмнө

$\"\"$

\"Холлидэй инн\" /Holliday inn/ зочид буудлын хурлын танхимд өнөөдөр 2022 оны ДАШТ, 2023 оны Ази тивийн АШТ-ий урьдчилсан шатны эрхийн төлөө Монголын шигшээ багтай тоглох Бруней Даруссалам багийн Улаанбаатар хотноо хийх тоглолтын өмнөх хэвлэлийн бага хурал боллоо.

Тус хэвлэлийн бага хуралд Брунейн талаас Нидерланд улсын иргэншилтэй Робби Сервайс хэмээх дасгалжуулагч, багийн ахлагчийн хамт оролцсон бол Монголын талаас шигшээ багийн ахлах дасгалжуулагч Герман улсын иргэн Майкл Вайсс, Монголын шигшээ багийн ахлагч Б.Гарьдмагнай нар оролцож спортын сэтгүүлчдийн асуултанд хариуллаа.

Брунейн шигшээ багийн дасгалжуулагч Робби Сервайс: \"Манай баг тамирчид манайхтай уур амвсгал ойролцоо БНХАУ-ын Бээжин хотноо 7 хоногийн бэлтгэл хийгээд Улаанбаатарт ирлээ. Харин Бээжинд их халуун байлаа. Мөн тэнд нэг удаа нөхөрсөг тоглолт хийсэн. Бэлтгэл сургуулилт бүрэн хангагдсан. Монголын шигшээ багийг Сингапурын шигшээтэй тоглохыг харсан. Манай хоёр багийн хувьд өөр өөр стиль, арга барил, школ-сургуультай багуул учраас энэ тоглолт нэлээд сонирхолтой тэмцээн болох болов уу гэж бодож, төсөөлж байна. Миний хувьд Брунейн шигшээ багтай 6 долоо хоногийн гэрээ хийсэн. Өмнө нь би Австралийн багтай ийм богино хугацааны гэрээтэй ажиллаж байсан туршлага бий. Монголын шигшээ баг ОУХБХ /ФИФА/-ны гаргасан чансаа /ранк/-гаар манай багаас дээгүүр боловч бид өөрсдийн тоглох тактикаа боловсруулсан байгаа. Цаг агаарын хувьд Монгол, Бруней тэс өөр учраас аль алинд нь хүндрэл гарах магадлал байгаа. Гэхдээ бид 2:0-ээр хожихын төлөө тоглоно. ” хэмээн ярьсан юм.

Харин Брунейн багийн ахлагч: \"Бид өмнө нь БНХАУ болон Монголд ирж тоглож байгаагүй. Харин энэ удаагийн тоглолт нь манай багийн хувьд бас нэгэн том шалгуур байх болов уу гэж бодож байна” гэлээ.

Монголын шигшээ багийн ахлах дасгалжуулагч Майкл Вайсс: \"Бид энэ тоглолтод 2 жил бэлтгэсэн, маш сайн үр дүн гарна гэж итгэж байна. Манай баг эмч, дасгалжуулагчдын хамт Тайланд улсад хийсэн бэлтгэл их сайн болсон. Тамирчдын хувьд бэртэл, гэмтэл бүрэн илаарьшсан, нөхөн сэргээлт маш сайн байгаа. Бид тоглоход бэлэн” гэв.

\"Талын хөх чононууд” багийн ахлагч Б.Гарьдмагнай: Бидний бэлтгэл сургуулилт хийх бүх талын хангамж, боломж нөхцлийг хангаж өгсөн Монголын хөлбөмбөгийн холбоондоо талархаж байна. Бид одоо тоглохоход 100 хувь бэлэн байна. Бид өрсөлдөгч багаа хүндэлж байгаа ч хожино гэдэгтээ итгэлтэй байгаа” хэмээн ярьж байв.Дашрамд сонирхуулахад, \"Талын хөх чононууд” баг 2001, 2003, 2007, 2009, 2011, 2015 онуудад ДАШТ-ий урьдчилсан шатны тоглолт хийж байсан бол \"Бруней Даруссалам” багийн хувьд 1986, 2002, 2018 оны ДАШТ-ий урьдчилсан шатанд хүчээ сорьж байжээ. Брунейн шигшээ баг 1993 онд ОУХБХ-ны чансаанд 153-т бичигдэж байснаас хойш чансаа буурсаар өнөөдөр 194 дүгээр эрэмбэлэгджээ. Харин Монгол Улсын шигшээ баг жил ирэх тусам тоглолтын ур чадвар ахиж байгаа бөгөөд өнөөдөр 187 дугаарт эрэмбэлэгдээд байгаа юм.

Энэхүү тоглолтыг 4 жил хүлээсэн төдийгүй манай шигшээ багийн 23 тоглогч, 200 гаруй албаныхан, 5 мянга гаруй хөлбөмбөгийн дасгалжуулагч, тоглогчид хичээл зүтгэлээ шингээсэн гэж болно.

Улаанбаатарын тоглолтын энгийн тасалбар нь 10 мянган төгрөг, ВИП тасалбар нь 30 мянган төгрөгөөр худалдаалагдаж байна. Тус хэвлэлийн бага хурлын үеэр мандат авч мэдээлэл бэлдэх сэтгүүлчдэд сурвалжлах эрхийн мандатыг олголоо.