ЭХЭМҮТ-ийн Тандалт судалгааны албанаас эхийн эндэгдлийн тохиолдолд суурилсан сургамж, дүгнэлтийг танилцуулж, цаашид эх хүндэрч, эндэхээс сэргийлэх зорилгоор “Үжил, үжлийн дайрлага” сэдэвт цахим хурлыг 2023 оны 03 дугаар сарын 07-ны өдөр амжилттай зохион байгууллаа.
Цахим хурлыг тус төвийн эх барих, эмэгтэйчүүдийн зөвлөх эмч, АУ-ны доктор, клиникийн профессор Ч.Мөнхбаяр удирдан, явууллаа. Хуралд ЭХЭМҮТ, Өргөө, Хүрээ, Амгалан амаржих газар төрөлжсөн мэргэшлийн эмнэлэг, Улсын II төв эмнэлэг, ХӨСҮТ, ХСҮТ, Баянгол, Сонгинохайрхан, Хан-Уул, Багануур дүүргийн ЭМТ, нэгдсэн эмнэлэг, 21 аймгийн ЭМГ-ын удирдлага, эх барих, эмэгтэйчүүдийн асуудал хариуцсан мэргэжилтэн, аймгийн нэгдсэн эмнэлэг, БОЭТ-ийн эх барих, эмэгтэйчүүдийн зөвлөх эмч, ЭМТҮЧАБА-ны дарга, менежер, эх барих, эмэгтэйчүүдийн эмч, сум, өрхийн ЭМТ-ийн эх баригч, багийн эмч бүхий 346 эмч, мэргэжилтэн оролцлоо.
Цахим хурлаар Өргөө амаржих газар төрөлжсөн мэргэшлийн эмнэлгийн эмч С.Энх-Отгон эхийн эндэгдлийн тохиолдлыг танилцуулж, ЭХЭМҮТ-ийн эх барих эмэгтэйчүүдийн эмнэлгийн эрчимт эмчилгээ, мэдээгүйжүүлгийн эмч, клиникийн профессор Б.Энхжаргал “Үжил, үжлийн дайрлага” сэдвээр онолын мэдээлэл хийлээ.
ЭХЭМҮТ-ийн зөвлөх эмч Ч.Мөнхбаяр үжилд хүргэдэг үндсэн шалтгааныг эрт илрүүлэн, эрт оношилж, хугацаа алдалгүй арга хэмжээ авах “алтан” боломжийг хэрхэвч алдаж болохгүйг нийт эмч, мэргэжилтэн нарт анхааруулж, үжлийн эсрэг арга хэмжээг сайжруулах цогц хөтөлбөр гарган, ажиллахыг зөвлөв. Үжил, үжлийн дайрлага нь эмнэлгийн яаралтай тусламж шаарддаг эмгэг бөгөөд эмчилгээ, амин зүгшрүүлгийг нэн яаралтай эхлүүлэх ёстой. Эрт хугацаанд халдварын эх үүсвэрийг яаралтай тогтоож, халдварын голомтын хяналт цаг алдалгүй хийх шаардлагатайг давтан анхааруулав. Төрөх үйл ажиллагаа эрхэлдэг эрүүл мэндийн байгууллага тус бүр тухайн орон нутагт жирэмсний хугацаанд давамгайлж буй нянгийн халдварын судалгаа хийж, санал, зөвлөмж боловсруулан, нян судлал, полимеразын гинжин урвалын шинжилгээ хийх боломжоор хангагдах нь нэн чухал болохыг зөвлөв.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
