Монгол Улсад гэр бүлийн хүчирхийлэл ХЭВИЙН үзэгдэл болоод байна. Сар, өдөр тутам шахуу эхнэрээ, хүүхдээ зодож, амь нас, эрүүл мэндийг нь хохироох болов.
Гэр бүлийн тухай хуулийн 10 дугаар зүйлийн 10.3-т “Гэрлэгчид нь бие биедээ үнэнч байх, хүүхдээ өсгөн хүмүүжүүлэх, гэр бүлийн гишүүд нь бие биеэ халамжлах, хүндэтгэх, тэжээн тэтгэх, туслах, гэр бүлд шаардагдах эдийн засгийн нөхцөлийг бүрдүүлэх, хэн нэгнийхээ эрхийг зөрчихгүй, бие биеэ аливаа хэлбэрээр хүчирхийлэхгүй байх, угийн бичиг хөтлөх үүргийг адил хүлээнэ” хэмээн заажээ.
Мөн хуулийн 25 дугаар зүйлийн 25.2-т “Гэрлэлтээ бүртгүүлээгүй эцэг, эхээс төрсөн болон гэрлэгчдийн хэн нэгний нь дагавар хүүхдийг ялгаварлан гадуурхаж, эрх, ашиг сонирхлыг нь хохироохыг хориглоно”. 25.3-т “Эцэг, эх, асран хамгаалагч, харгалзан дэмжигч нь хүүхдийн эрх, ашиг сонирхлыг хамгаална” гэж тус тус заажээ.
Тэгвэл энэ хуулийн заалт хөрсөн дээрээ огт хэрэгжихгүй байна. Сүүлийн жишээг танилцуулахад, энэ сарын 8-нд “Бага насны хүүхэд ил гэмтэлтэй, ухаангүй байдалтай эмнэлэгт ирлээ” гэх дуудлага ГССҮТ-өөс Цагдаагийн байгууллагад иржээ.
Шалгалтын явцад 3 настай эрэгтэй Б-г хойт эцэг Э нь зодсон байх нөхцөл урьдчилсан байдлаар илэрсэн бөгөөд Э нь хохирогчийг эмнэлэгт авчирсан даруйдаа зугтсан. Сэжигтнийг баривчилсан тул шалгах ажиллагааг явуулж буй аж.
Мөн 2021 оны дөрөвдүгээр сарын 25-нд хойд эцэг нь долоон сартай хүүхдийнхээ хөлийг хугартал зодсон “кэйс” байна. / Эх сурвалж: eguur.mn /
2019 оны арванхоёрдугаар сард Хэнтий аймагт хойд эцэг нь хүүхдээ зодож, аминд нь хүрч байжээ. / Эх сурвалж: zarig.mn /
Жил бүр энэ мэт онц ноцтой хэргүүд гарсаар байхад бид хэсэг “СЕНСАЦ” болгоод, орхисоор байх уу. Гэр бүлийн тухай хуулиндаа яаралтай өөрчлөлт оруулж, томчуудыг хариуцлагажуулж, бяцхан үрсээ аваръя, эрхэм УИХ-ын гишүүд болон Ерөнхийлөгч У.Хүрэлсүх, Ерөнхий сайд Л.Оюун-Эрдэнэ, УИХ-ын дарга Г.Занданшатар аа...
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
