Монгол Улсын Засгийн газраас хэрэгжүүлж байгаа “Шинэ сэргэлтийн бодлого”-ын хүрээнд “Хөдөөгийн сэргэлт” чуулганыг Ерөнхий сайдын санаачилгаар өнөөдөр зохион байгууллаа.
НҮБ-ын Олон улсын шилжилт хөдөлгөөний байгууллага, Швейцарийн хөгжлийн агентлаг, МҮХАҮТ, JCI, МЗХ-той хамтран зохион байгуулсан төр, хувийн хэвшил, бизнес эрхлэгчид, иргэдийн нэгдсэн чуулганд 1400 орчим хүн оролцсон бөгөөд цахимаар 1000 гаруй санал, санаачилгыг иргэдээс ирүүлжээ. Монгол Улсын Ерөнхий сайд Л.Оюун-Эрдэнэ болон Засгийн газрын гишүүд, дэд сайд, аймаг, нийслэлийн Засаг дарга нар уг чуулганд оролцсон юм.
Монгол Улсын нийгэм, эдийн засгийн өнгөрсөн болон өнөөгийн нөхцөл байдлыг Ерөнхий сайд чуулганы эхэнд танилцууллаа. 1990 оноос эхлэн Улаанбаатар хотыг чиглэсэн их нүүдэл хөдөөнөөс хөдөлсөн. Зөвхөн 1992-2016 оны хооронд 607 мянган хүн Улаанбаатар хотод шилжин ирсэн бол 2023 оны эхний улиралд энэ тоо нэг саяар хэмжигдэх болжээ. Улаанбаатар хот Монгол Улсын нийт газар нутгийн 0.3 хувийг эзэлдэг ч нийт хүн амын 47.6 хувь нь амьдарч байна.
Нийслэлд Монгол Улсын ДНБ-ний 63 хувь нь үйлдвэрлэгддэг бол их дээд сургуулийн 90 хувь, нийт худалдаа үйлчилгээний 84.2 хувь, үйл ажиллагаа явуулж буй ААН, байгууллагын 70.4 хувь байрлаж, бүртгэлтэй автомашины 84 хувь зорчиж байна. Нийслэлийг чиглэсэн шилжилт хөдөлгөөний гол шалтгаанаар ажлын байртай болох, амьдралын чанараа дээшлүүлэх, чанартай боловсрол олж авах зэрэг шалтгаанууд нэрлэгдэж байгаа юм.
Иргэдийн хөдөөг зорих хандлага сүүлийн үед бага багаар сэргэж байгаа бол тэд агаарын бохирдол, хөрсний бохирдол, дуу чимээний бохирдол, амьжиргааны өртөг, түгжрэл, гэмт хэргийн гаралт ихэсч байгаа гэх мэт шалтгаанаар төвөөс гадагшлах болжээ. Чуулган дээр 21 аймгийн удирдлагууд иргэдийг нутагтаа ирж амьдрахыг урьсан шинэ боломж, шийдлүүдээ танилцуулсан нээлттэй үзэсгэлэн худалдаа зохион байгуулж байна. Өмнөх арван жилүүдтэй харьцуулахад өнөөдөр иргэд хаана амьдарч байгаагаасаа үл хамаарч төрийн үйлчилгээг цахимаар авах боломжтой болсон. Засгийн газраас иргэн, ААН, байгууллагад зориулж төрийн 815 үйлчилгээг “E-Монголиа” цахим системээр хүргэх болсон. ЦХХХ-ны яамны Төрийн цахим үйлчилгээний зохицуулалтын газар арга хэмжээн дээр төрийн үйлчилгээг иргэн, хуулийн этгээдэд шуурхай, хүртээмжтэй байдлаар хүргэх, төрийн үйлчилгээний процесс, шат дамжлага, бүрдүүлэх бичиг баримтыг бууруулах “Хурдан” цэгийн үйлчилгээгээ танилцуулж байна.
Өнгөрсөн онд 39 байгууллагын 440 үйлчилгээг иргэн, хуулийн этгээдэд төрийн цахим үйлчилгээний “Хурдан” цэгээр хүргэж байсан бол энэ онд 55 байгууллагын 790 үйлчилгээг цахимаар хүргэхээр төлөвлөн ажиллаж байна.
Тухайлбал, энэ онд ЭМЯ-ны ес, ГХЯ-ны дөрөв, БШУЯ-ны дөрөв, УБЕГ-ын 36, ГЗБГЗЗГ-ын арав, ЦЕГ-ын болон НДЕГ-ын тус бүр найм, АТҮТ болон НДЕГ-ын тус бүр зургаа, ГЕГ болон ТЕГ-ын тус бүр тав, ШШГЕГ-ын дөрөв, Халамж, үйлчилгээний ерөнхий газрын гурав, Монголбанкны нэг лавлагаа, тодорхойлолтыг цахимаар хүргэж эхлэх юм байна. Төрийн үйлчилгээний нэгдсэн “Хурдан” цахим системийг операторын горимоор болон ТҮЦ, киоск машин, гар утас, хөдөлгөөнт төхөөрөмжийн аппликейшнаар дамжуулан ашиглаж боломжтой аж.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
