“НҮҮРСНИЙ ХУЛГАЙ”-н балгаар улстөрчдийн суудал “ГАНХААСТАЙ” хэвээр байгаа. Уг хэрэгт холбогдсон Ж.Мөнхбатыг өөрийнх нь хүсэлтээр огцруулсан бол Н.Наранбаатар, Д.Бат-Эрдэнэ, Т.Аюурсайхан нарыг УИХ-ын гишүүнээс огцруулах эсэх нь хүлээлтийн байдалд буй. Т.Аюурсайханы тухайд “ДАВХАР ДЭЭЛ”-тэй байсан бөгөөд ХНХ-ын сайдын суудлаас “ховхорчихсон”. Иймээс халамж, нийгмийн даатгал, хүүхдийн мөнгөний “ХЭРҮҮЛ” тасардаггүй ХНХЯ-нд өрхийн тэргүүн олж өгөх ажил Л.Оюун-Эрдэнийн Засгийн газарт оногдсон.
Т.Аюурсайханыг “НҮҮРСНИЙ” хэрэгт холбогдсон даруйд л ХНХ-ын дараагийн сайдыг ярьж эхэлсэн. Хамгийн “ХҮЧТЭЙ” орж ирсэн нэрс бол УИХ-ын гишүүн М.Оюунчимэг, Б.Саранчимэг нар юм.
М.Оюунчимэг гишүүний тухайд өмнө нь "Өргөдлийн байнгын хороо, Нийгмийн бодлогын байнгын хорооны даргаар тус тус ажиллаж байсан нь түүнийг энэ яаманд тохирно" гэх үндэслэл болж буй бололтой. Мөн тэрбээр тэтгэвэр, тэтгэмж, нийгмийн хамгаалалтай холбоотой асуудлууд дээр дуу хоолойгоо багагүй өргөдөг нь ч нөлөөлсөн байж болох юм.
Харин Б.Саранчимэг гишүүн Нийслэлийн нийгмийн ардчилал монголын эмэгтэйчүүдийн холбооны тэргүүнээр ажиллаж байсан бөгөөд 2008-2016 онд НИТХ-ын төлөөлөгчөөр сонгогдож, 2016, 2020 оны УИХ-ын сонгуульд ялалт байгуулсанаар гишүүн болсон нэгэн. Мөн энэ хугацаанд Байгаль орчин, хүнс, хөдөө аж ахуйн байнгын хорооны даргаар ажиллаж буй. Түүнийг намынхаа "ГЕНСЕК" Д.Амарбаясгалан болон Ерөнхий сайд Л.Оюун-Эрдэнэтэй ойр бөгөөд тэднээс "дэмжлэг" авах магадлал гэж "АНГИЙНХАН" нь хардаж буй аж.
Тэгвэл дээрх хоёр эмэгтэйтэй УИХ-ын гишүүн Н.Энхболд өрсөлдөж эхэлсэн байна. Тэрбээр Ж.Мөнхбатын оронд ТББХ-г удирдахаар болсон бөгөөд улстөрчид дотроо ЧАМГҮЙ туршлагатай нэгэн. Тухайлбал, УИХ-ын гишүүнээр 6 удаа, яамдын сайдаар 3 удаа мөн байнгын хороодыг ч багагүй удирдаж байв. Иймдээ ч намынхан нь түүнийг ШОХООРХОЖ байж болох юм.
Ийнхүү өдөр ирэх тусам ХНХ-ын сайдын суудал горилж буй хүмүүсийн хүрээ өргөжиж, Ерөнхий сайд Л.Оюун-Эрдэний “ТОЛГОЙ” эргэх шиг болж байна. Хуулиндаа, өмнөх сайдыг чөлөөлснөөс хойш 14 хоногийн дотор шинэ сайдыг томилох заалттай. Тэгэхээр энэ 7 хоногт сайдын ТОМИЛГОО хийх магадлал өндөр байгаа ажээ.
Like
0
Зөв
2
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
