“Улаанбаатар кап” тэмцээн дөрөвдүгээр сарын 22-ноос эхэлнэ

Нийслэл

0
1006

“Улаанбаатар кап” тэмцээн дөрөвдүгээр сарын 22-ноос эхэлнэ

Төр.мн I www.tur.mn

2023-04-13

Нийтийн биеийн тамирыг хөгжүүлэх, хүүхэд залууст спортоор хичээллэх, чөлөөт цагаа зөв боловсон өнгөрүүлэх боломжийг бүрдүүлэхэд нийслэлийн зүгээс онцгой анхаарч буй. Энэ хүрээнд НЗДТГ, Монголын 3x3 сагсан бөмбөгийн холбоо хамтран “Улаанбаатар кап” 3x3 сагсан бөмбөгийн тэмцээнийг энэ сарын 22-ноос зохион байгуулна.

Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ:

-Нийслэлийн иргэд, тэр дундаа хүүхэд залууст биеийн тамир, спортоор хичээллэх боломжийг бүрдүүлэхээр есөн дүүрэгт 3x3 сагсан бөмбөгийн 118 талбай байгуулах ажлыг эхлүүлсэн. Өнгөрсөн онд 34 талбайг ашиглалтад оруулсан бол энэ жил 40 талбай байгуулахаар төлөвлөж байна. Ирэх жил мөн энэ ажил үргэлжилнэ. Тэгэхээр сагсан бөмбөг сонирхогчдод олон улсын стандартад нийцсэн талбайд тоглох боломж бүрдэж буй. Энэ нь иргэдэд амьдралын эрүүл хэв маягийг хэвшүүлэх, спортоор хичээллэхэд нь нөлөөлнө хэмээлээ.

Монголын сагсан бөмбөгийн холбооны ерөнхий нарийн бичгийн дарга С.Төгсжаргал:

-НЗДТГ, Монголын 3x3 сагсан бөмбөгийн холбоотой хамтран өнгөрсөн жилээс эхлэн уг тэмцээнийг зохион байгуулж байна. Энэ жилийн “Улаанбаатар кап”-ын хүрээнд нийслэлийн есөн дүүргийн аварга шалгаруулах тэмцээн дөрөвдүгээр сарын 22-ноос эхлэн амралтын өдрүүдээр Д.Сүхбаатарын талбайд болно. Тавдугаар сарын 21-нд аваргуудын аварга буюу финалын тэмцээнийг зохион байгуулах юм. Энэ тэмцээнд ялсан баг долоодугаар сард болох Макаод болох “ФИБА 3x3 Макао” дэлхийн их дуулгын тэмцээнд оролцох эрх авна. Монголын 3x3 сагсан бөмбөгийн холбооны сошиал хуудсуудаар мэдээлэл өгч, багуудын бүртгэлийг тэмцээн болохын өмнөх өдөр зохион байгуулна. Ангиллын хувьд нас хүрэгчдийн эрэгтэй, эмэгтэй гэсэн ангиллаар зохион байгуулах тул 16-аас дээш насны хэн бүхэн оролцоход нээлттэй. Спортын энэ төрлөөр манай тамирчид өндөр амжилт гаргасаар байна. Цаашид олон хүүхэд, залуус 3x3 сагсан бөмбөгийн спортоор хичээллэх суурийг тавьж, стандарт талбайнуудыг байгуулж байгаад талархал илэрхийлье гэсэн юм.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.