Хилийн цэргийн 0285 дугаар ангийн Ахлах инженер дэд ахлагч С.Серигжан:
-Монгол Улсын хамгийн том мэдээлэл технологийн байгууллага болох "ICT Group"-д программ хөгжүүлэгчээр ажиллаж байгаад сэтгэлийнхээ дуудлагаар төрсөн нутагтаа ирж, цэргийн хүн болох мөрөөдлөө биелүүлэн Хилийн цэргийн 0285 дугаар ангид ажилд орж бүтээн туурвихын их хүслэнд хөтлөгдөн, хөглөгдөн амьдарч явна.
2021 онд ШУТИС-ийг Инженер мэргэжлээр төгссөн. Тухайн үед ажлын санал тавьсан гадаад дотоодын толгой компаниудад татгалзсан хариу өгч, эх орны дархан хил, төрүүлж өсгөсөн ээж аав, төрсөн нутгаа зорин ирсэн. Би Баян-Өлгий аймгийн Цагааннуур тосгоны хүүхэд. Цэргийн хувцастай ах нарыг хараад энэ хувцасыг өмсөөд хилийн албанд орох юмсан гэж мөрөөддөг байсан. Тэр ч утгаараа нутаг ус, аав ээж, мөрөөдлийн албандаа орохоор сэтгэл шулуудсан юм.
Бид мэдээлэл технологийн эрин үед амьдарч байна. Бүх зүйл цахим болж байна. Хил хамгаалах байгууллагадаа өөрийн сурч мэдсэн бүхний үрийг тарьж, хөгжилд хөтлөхийг хичээж байна. Шинэхэн албандаа ороод удаагүй ч албаны дотоод сүлжээнд ашиглах программ зохион бүтээж, ангийнхаа хариуцсан хэсгийн застав харуулуудын өдөр тутмын үйл ажиллагаанд нэвтрүүлсэн.
Ингэснээр "эх орон тайван байна" гэсэн мэдээг хилээс төврүү утсаар залгаж хэлэх шаардлагагүй. Товчлуур дараад л мэдээ хоромын дотор ангируу илгээгдэх юм. Мөн цаг бүртгэлийн програм бүтээж, цаг агаарын эрс тэс нөхцөлд гадаа зогсож цаасан дээр тэмдэглэл хөтөлдөг ирцийн бүртгэлийг халж, дэлгэцээр царай таниулж цагийн бүртгэлийг автоматаар хийх боломжтой ухаалаг системийг нэвтрүүлсэн.
Намайг чөлөөтэй сэтгэж ажиллах боломж, орчин нөхцлөөр хангадаг Хилийн цэргийн 0285 дугаар ангийн захирагч дэд хурандаа Б.Хүрэлсүх тэргүүтэй зөвлөлийн гишүүддээ талархаж явдагаа энэ завшааныг тохиолдуулан хэлмээр байна.
Орон нутгийн хөгжлийн сангийн хөрөнгө оруулалтаар Баян-Өлгий аймгийн Гэмт хэргээс урьдчилан сэргийлэх ажлыг зохицуулах салбар зөвлөлтэй хамтарч Хариуцсан хэсгийн хилийн бүс нутагт оршин сууж буй ард иргэдийн малыг цахимжуулах зорилгоор мал бүртгэлийн “Сүлд-23” веб программыг хөгжүүлэн цахим системийн сан бүрдүүлж байна.
Хил орчмын нутагт амьдардаг айлын мал хил давах зөрчил их гардаг учир энэхүү программын тусламжтайгаар тоо толгойг нь бүрэн, дутуу эсэхийг нягтлан шалгах бүрэн боломжтой. Ийнхүү улсын хил хамгаалалтад шаардлагатай, албаны өдөр тутмын үйл ажиллагааг хөнгөвчлөх, мэдээллийн аюулгүй байдлыг хангасан цахим инженерчлэлийн ажлыг үе шаттайгаар хийж байна.
Техник технологийн энэ эрин зуунд цаасан дээр төлөвлөгөө батлуулах, даргаас чөлөө зөвшөөрөл авах гэж өдөржин даргын үүд сахидаг тогтолцоо дэлхийд хоцрогдож, өдрөөс өдөрт бүх зүйл цахим болж байна. Архив албан хэрэг хөтлөлт цаасан хэлбэрээр биш үүлэн технологиор илүү найдвартай, хүртээмжтэй байдлаар хадгалагдах болжээ. Бид цаг үетэйгээ хөл нийлүүлэн алхах хэрэгтэй. Хилийн цэрэг дэлхий нийтийн техник технологийн хөгжлийн эхэн үед явна. Улсын торгон хилд үүрэг гүйцэтгэж буй залуусын өдөр тутмын албаны болон ахуй амьдралын хэв маягт хэрэгцээтэй программ хөгжүүлэлтийг зохион бүтээж, илүү сайжруулан хөгжүүлсээр байх урт холын зорилго тээж яваа.
Энхийн цагт эх орноо эрдэм мэдлэгээрээ сахин хамгаалах болно. Монгол Улсын төлөө зүтгэе.
Like
35
Зөв
0
0
Буруу
3
Воов
0
Уйтгартай
4
Дуртай
Мундаг залуу цаашдын ажил хөдөлмөрт нь өндрөөс өндөр амжилт хүсье.
© 2013-2023. Вэб сайт бүтээсэн: Tsast Solution LLC
