Говь-Алтай аймгийн оюутан, залуучуудын “ИРЭЭДҮЙ-АЛТАЙ” холбоо өнгөрсөн 20 жилийн хугацаанд олон бүтээлч ажлыг өрнүүлж ирсний нэг нь “GOOD STUDENTS” оюутны сургалтын тэтгэлэг хөтөлбөр юм. Тус сургалтын тэтгэлэг есөн жил дараалан олгогдож нийт 284 оюутанд 190 орчим сая төгрөгийн тэтгэлэг гардуулж залуусын хүсэл мөрөөдөлдөө хүрэх гүүр, дэмжлэг болж иржээ.
Тэгвэл тус холбоо 20 жилийнхээ түүхэн ойн хүрээнд 10 дахь нь удаагийн “GOOD STUDENTS-2023” оюутны сургалтын тэтгэлэг хөтөлбөрийг зарлалаа.
30 сая төгрөгийн тэтгэлэгт хөтөлбөрийг хамтран хэрэгжүүлэхээр “Ирээдүй Алтай” холбооны тэргүүн Н.Амартүвшин, “ББМНТ” ХХК-ийн захирал Ц.Баянмөнх нар “ХАМТРАН АЖИЛЛАХ САНАМЖ БИЧИГ”-т гарын үсэг зурж баталгаажууллаа.
.jpg)
Тус холбоог 20 жилийн хугацаанд 7 тэргүүн удирдаж ирсэн бөгөөд тус холбооны 2 дах үеийн тэргүүн Цэдэвийн Дашдорж агсны санаачилга, дэмжлэгээр “Good students” сургалтын тэтгэлэг олгогдож иржээ. Тэгвэл Цэдэвийн Дашдорж агсны дүү “ББМНТ” ХХК-ийн захирал Ц.Баянмөнх ахынхаа гэгээн дурсгалд зориулж дээрх хөтөлбөрийг хамтран хэрэгжүүлж, санхүүжүүлэхээ илэрхийллээ.
Тус тэтгэлэгт Говь-Алтай аймгийн харьяат бөгөөд 2023-2024 оны хичээлийн жилд их, дээд сургууль, коллежийн бакалаврын түвшний 2-6 дугаар дамжаанд суралцагч оюутнууд, орон нутгийн их, дээд сургууль, коллежид суралцагч хамрагдах бөгөөд Есөнбулаг сумаас 3, бусад сумаас нэг, нийт 20 оюутанд тус бүр 1.500.000 төгрөгийн тэтгэлэг олгогдох юм.
Тэтгэлэгт тавигдах шаардлага, бүрдүүлэх материал:
-Иргэний харьяаллаар оршин суугаа баг, хорооны Засаг даргын тодорхойлолт
-2022-2023 оны хичээлийн жилийн сурлагын дүнгийн тодорхойлолт (3.2 ба түүнээс дээш голчтой суралцсан байх)
-Оюутан болсноосоо хойш олон улс, улс, бүс, аймгийн чанартай уралдаан, тэмцээн, шалгаруулалт, эрдэм шинжилгээний бага хурал, эдгээртэй дүйцэх үйл ажиллагаанд амжилт гаргасныг батлах 5 хүртэл баримт бичгийн хуулбар (медалийн үнэмлэх, гэрчилгээ, батламж, эрдэм шинжилгээ, судалгааны ажил, ном, бүтээлийн талаарх мэдээлэл гэх мэт) \Нотариатаар батлуулах шаардлагагүй\
-Тухайн сумын оюутнууд материал ирүүлээгүй, эсвэл ирүүлсэн оюутнуудын дүн, шалгуурын үнэлгээ илэрхий доогуур тохиолдолд тэр суманд оногдох хуваарийг бусад сум руу шилжүүлж болно.
Материал хүлээн авах:
Шаардлагыг хангаж, бүрэн бүрдүүлсэн материалыг 2023 оны наймдугаар сарын 15-ны 17:00 цагаас өмнө “Ирээдүй-Алтай” холбоонд хүлээлгэн өгнө.
• Хамтарсан ажлын хэсэг 2023 оны наймдугаар сарын 25-ны дотор шалгаруулж, “Ирээдүй-Алтай” холбооны цахим хуудсаар нийтэд зарлана.
• Тэтгэлгийн мөнгийг суралцагчийн сургуулийн нэхэмжлэхийг үндэслэн сургуулийн данс руу 2023 оны есдүгээр сарын 1-ний дотор шилжүүлнэ.
• Шалгарсан оюутнуудад батламж олгоно.
• Шалгарсан оюутнууд хамтарсан багийн зохион байгуулалтаар 2023 оны 10-11 дүгээр сард “Ирээдүй-Алтай” холбооны удирдлага дор сайн дурын ажил зохион байгуулна.
Сургалтын тэтгэлэгт хөтөлбөртэй холбоотой мэдээллийг 9488-8780 дугаараас авах боломжтой.
.jpg)
2003 онд үүсэн байгуулагдсан тус холбоо 20 жилийн түүхэн ойгоо угтаж 20 ажил хийхээр зорьжээ. Энэ хүрээнд “Хязгаараа тэл” хөгжлийн форумыг Алтайн 18 суманд, “Цагийн зөрүү” форумыг Улаанбаатар хотноо зохион байгуулж, “Нутаг, сэтгэл, үргэлжлэл” цуврал уулзалт, “Ээ дээ энэ Алтайхан уу” цуврал контент, Жолооны хөнгөлөлттэй сургалт, 20 жилийн түүхэн сэтгүүл, Үе үеийн тэргүүнүүдийн нэвтрүүлэг зэрэг ажлыг шат дараалалтай өрнүүлээд байна.
Like
20
Зөв
0
0
Буруу
0
Воов
0
Уйтгартай
5
Дуртай
Сайн байна уу та бүхэнд ажлын амжилт маш их зүйл хийж байгаад талархаж байна.
© 2013-2023. Вэб сайт бүтээсэн: Tsast Solution LLC
