МҮОХ-ны Олимпын музейг ОУОХ-ны Хүндэт гишүүн, Монгол Улсын Соёлын гавьяат зүтгэлтэн Ш.Магваны нэрэмжит болгох ёслол өнөөдөр Олимпик хауст боллоо. Энэхүү арга хэмжээний хүрээнд Олимпын музейд Ш.Магваны Алдрын буланг бий болгож тохижуулсан юм.
Ёслолын арга хэмжээнд нас сүүдэр 96 хүрээд буй “Олимпын өвөө” Ш.Магван гуай өөрөө хүрэлцэн ирж, МҮОХ-ноос үзүүлсэн хүндэтгэлд талархаж байгаагаа илэрхийлэв.
МҮОХ-ны Ерөнхийлөгч Б.Баттүшиг “Олимпын өдрийг угтсан цуврал арга хэмжээнүүд үргэлжилж, олимпизмоор амьсгалсан долоо хоног болж байна. Монгол Улсаас анх удаа ОУОХ-ны гишүүнээр сонгогдож, хойч үеийнхээ замыг нээж өгсөн Ш.Магван гуайд талархаж явдгаа илэрхийлье. Олимпын музейг анх Ш.Магван гуайн санаачилгаар 1987 онд байгуулсан түүхтэй. Харин өнөөдөр музей маань түүний нэрэмжит болж байгаад бахархал төрж байна” гэв.
Ш.Магваны нэрэмжит Олимпын музейд спорт, олимпизмын түүхэн ач холбогдол бүхий 3000 гаруй үзмэр хадгалагдаж байна. Өнгөрсөн жил Олимпын музейг давхардсан тоогоор 2000 гаруй хүн үзэж сонирхжээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
