ХӨСҮТ: Хог болон, бохир ус гудамж талбайд ихээр урсаж байна, үүнээс үүдэн нян бактер тархаж, гэдэсний халдварт өвчин үүсгэх эрсдэлтэй

Эрүүл Мэндийн Яам

ХӨСҮТ: Хог болон, бохир ус гудамж талбайд ихээр урсаж байна, үүнээс үүдэн нян бактер тархаж, гэдэсний халдварт өвчин үүсгэх эрсдэлтэй

Төр.мн I www.tur.mn

2023-07-05

ХӨСҮТ-өөс гэдэсний халдварт өвчин нэмэгдэх эрсдэл үүсч буй талаар сэрэмжлүүлэг мэдээлэл өглөө.

ХӨСҮТ-ийн тандалт судалгааны албаны Гэдэсний халдварын тандах тасгийн эрхлэгч Ц.Амгалан: "Урин дулааны улиралтай холбоотойгоор хүн ам амралтын байдалд ордог. Энэ үед зайлшгүй баримтлах эрүүл мэндийн зөвлөмжийг хүргэж байна.

Он гарснаас хойш эхний зургаан сарын байдлаар 3800 гаруй хүн гэдэсний халдвараар өвдсөн байна. Үүний 80 хувь нь гар, хөл, амны өвчин байна. Тус халдвараар ихэнхдээ 0-4 насны хүүхдүүд өвчилдөг. Хүүхдийн гар, хөл, амаар цэврүүт тууралт гарч, өндөр халуурдаг, хүндрэл үүсэх магадлалтай өвчин. Мөн цусан суулгын халдвар өнөөдрийн байдлаар 490 гаруй хүн өвчилсөн байна.

Эдгээр халдварууд өмнөх онтой харьцуулахад 2 дахин нэмэгдсэн үзүүлэлттэй гарсан. Гэдэсний халдварт өвчин хоёр дахин өссөн бөгөөд жилийн дараа халдварын бүртгэл илүү их нэмэгдэх хандлагатай байгаа юм. Тиймээс эцэг эхчүүд бага насны хүүхдийнхээ гарыг тогтмол угаах, хүнсний бүтээгдэхүүнийг зөв сонгож хэрэглэхийг анхааруулж байна.

Цусан суулгалтын өвчлөлийг харахад 0-4 насны хүүхэд нийт өвчлөлийн 60 хувийг эзэлж байна. Энэ насны хүүхдүүд нь гэртээ, эцэг эхийн асаргаанд байдаг. Тэгэхээр эцэг эхийн асаргаа, ариун цэвэртэй холбоотойгоор энэ өвчлөл их гарч байна. Тэрнээс хүүхэд бие муутай байгаадаа өвдөж байгаа юм биш. Гаднаас ирэх нян бактер, бохирлогдсон усаар дамжиж гэдэсний халдвар үүсэж байна. Эцсийн бүлэгт хүүхдийг хооллож байгаа эцэг эх, асран хамгаалагч нар гараа угаах, ариун цэврийг сахихгүй байна гэсэн үг.

Үерийн улмаас гэр хорооллын гудамж талбайгаар бохир ус их урсаж, бие засах газрууд усаар дүүрч байна. Нийслэлийн хүн амын 70 хувь нь гэр хороололд амьдардаг. Гэр хороололд стандартын шаардлага хангасан бие засах газартай айл хомс. Үүнийгээ жил болгон ариутгаж, соруулж, цэвэрлэж ёстой. Харамсалтай нь хог болон, бохир ус гудамж талбайд ихээр урсаж байна.

Үүнээс үүдэн нян бактер тархаж, гэдэсний халдварт өвчин үүсгэх эрсдэлтэй. Үүнээс гадна ундны устай холбоотой гэдэсний халдвар бүртгэгдэх тохиолдол ихсэж байгаа тул ариутгаж, заавал буцалгаж хэрэглэхийг онцгойлон анхааруулж байна” гэв.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.