Монгол Улсын Их Хурал болон түүний Тамгын газрын 2019-2024 оны стратеги төлөвлөгөөнд аймаг, нийслэл, сум, дүүргийн иргэдийн Төлөөлөгчдийн Хурлын дэргэд Улсын Их Хурлын үйл ажиллагааг сурталчлах төв байгуулж, мэдээллийн нэгдсэн сүлжээнд холбон, албан бус боловсролын болон зайны сургалтын арга, хэлбэрээр иргэдэд хууль, эрх зүйн мэдлэг олгох, хууль тогтоомжийг сурталчлах ажлыг үр нөлөөтэй зохион байгуулах, ЕБС-ийн сурагчид, их, дээд сургуулийн оюутан залууст зориулсан Парламентын боловсролын хөтөлбөрийг боловсруулан хэрэгжүүлэх зэрэг бодлогын зорилтуудыг дэвшүүлсэн байдаг.
Дархан-Уул аймгийн Хууль тогтоомж сурталчлах төвийн нээлт Хамтран ажиллах санамж бичигт гарын үсэг зурах үйл ажиллагаагаар эхэлсэн. Төвийн үйл ажиллагааны хэвийн, тасралтгүй байдлыг хангахад талуудын хүлээх эрх, үүргийг тодорхойлж, хууль тогтоомжийн хүрээнд хамтран ажиллахаар Улсын Их Хурлын Ерөнхий нарийн бичгийн дарга, хууль зүйн ухааны доктор Л.Өлзийсайхан, Дархан-Уул аймгийн иргэдийн Төлөөлөгчдийн Хурлын дарга С.Насанбат нар Хамтран ажиллах санамж бичигт гарын үсэг зурлаа.
Хамтран ажиллах санамж бичиг байгуулснаар ийнхүү Хууль тогтоомж сурталчлах төв Дархан-Уул аймгийн иргэдийн Төлөөлөгчдийн Хурлын дэргэд нээгдэх эрх зүйн орчин бүрдсэн юм.
Улсын Их Хурлын Ерөнхий нарийн бичгийн дарга, хууль зүйн ухааны доктор Л.Өлзийсайхан: бид парламент нь шийдвэр, үйл ажиллагааныхаа талаарх мэдээлэл болон иргэдийн хууль эрх зүйн мэдлэгийг дээшлүүлэх ажлыг орон нутгийн төлөөллийн байгууллагатай хамтран зохион байгуулдаг олон улсын практикийг судалж, сайн туршлагыг харгалзан үзсэн гэдгийг тэмдэглэж, тус төв нь иргэд, олон нийтийг Улсын Их Хурлын шийдвэр, үйл ажиллагааны талаарх мэдээллээр тогтмол хангах, ард иргэд парламентын гишүүд, орон нутгийн хурлын төлөөлөгчидтэйгөө эгэх холбоотой байхад “гүүр” болно гэдэгт итгэлтэй байна. “Хууль тогтоомж сурталчлах төв”-ийг байгуулахад дэмжлэг үзүүлж, хамтран ажиллаж буй Швейцарын хөгжлийн агентлагийн хамт олон, тэр дундаа өнөөдрийн арга хэмжээнд алс холоос хүрэлцэн ирсэн Швейцарын Холбооны Улсын Гадаад хэргийн дэд сайд бөгөөд Швейцарын хөгжлийн агентлагийн Ерөнхий захирал, Элчин сайд Патрисиа Данци, Монгол Улс дахь Швейцарын хөгжлийн агентлагийн дарга, хатагтай Стефани Бурри, Засгийн газрын Хэрэг эрхлэх газар, Дархан-Уул аймгийн иргэдийн Төлөөлөгчдийн Хурал, төвийг хариуцан ажиллах албан хаагчид болон энэ ажлыг гардан зохион байгуулж байгаа Швейцарын хөгжлийн агентлагийн дэмжлэгтэйгээр хэрэгжүүлж буй “Монгол Улсад парламентын ардчиллыг бэхжүүлэх нь” дэд төсөл, Нутгийн өөрөө удирдах байгууллагын институцын чадавхыг бэхжүүлэх нь” дэд төслийн хамт олонд Улсын Их Хурлын Тамгын газрын нэрийн өмнөөс болон хувиасаа чин сэтгэлийн талархал илэрхийлье гэлээ.
Дархан-Уул аймгийн иргэдийн Төлөөлөгчдийн Хурлын дарга С.Насанбат хэлэхдээ, Монгол Улсын Засгийн газрын Хэрэг эрхлэх газарт Швейцарын Хөгжлийн агентлагийн санхүүжилтээр 2015 оноос хэрэгжиж эхэлсэн Төвлөрлийг сааруулах бодлогын дэмжлэг төсөлтэй cүүлийн жилүүдэд үр дүнтэй хамтран ажиллаж төслийн хүрээнд хийж хэрэгжүүлсэн ажил Дархан хотод болон Монгол Улсад засаглалын шинэчлэлд үр дүнгээ өгч байгаа гэдэгт итгэлтэй байгаа. Энэ удаад Улсын Их Хурлын Тамгын газар, Засгийн газрын Хэрэг эрхлэх газартай хамтран Швейцарын Хөгжлийн агентлагийн дэмжлэгтэйгээр Хууль тогтоомж сурталчлах төвийг богино хугацаанд байгууллаа. Тус төвийг байнгын удирдлагаар хангаж, үйл ажиллагааг дэмжин ажиллах болно гэдгийг илэрхийллээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
