Эмч, эмнэлгийн мэргэжилтнүүдийг чадавхижуулах, эмчилгээ, оношлогооны шинэ технологи, арга зүйг эзэмшүүлэх чиглэлд хамтран ажиллах санамж бичгийг ЭМЯ-ны харьяа Эрүүл мэндийн хөгжлийн төв болон БНЭУ-ын “Маренго Ази” эмнэлэг, “Глобал кейр” байгууллагууд байгуулж өнөөдөр гарын үсэг зурж баталгаажууллаа.
Санамж бичигт гарын үсэг зурах ёслолд УИХ-ын гишүүн, Засгийн газрын гишүүн, Эрүүл мэндийн сайд С.Чинзориг, УИХ-ын гишүүн Ж.Чинбүрэн нар оролцож, хамтын ажиллагааг өргөжүүлэхэд бүхий л талаар дэмжиж ажиллахаа илэрхийллээ.
Хамтын ажиллагааны Санамж бичгийн хүрээнд эмч, эмнэлгийн мэргэжилтнийг чадавхжуулах, төгсөлтийн дараах тасралтгүй сургалт хамтран зохион байгуулах, анагаах ухааны дэвшилтэт технологийг нутагшуулах, хамтарсан эрдэм шинжилгээ судалгааны ажил хийх, инженер техникийн болон эрүүл мэндийн мэдээллийн технологийн мэргэжилтнүүдэд зориулсан сургалтуудыг зохион байгуулах зэрэг хэд хэдэн чиглэлд хамтарч ажиллах юм.
“Маренго Ази” эмнэлэг хамтын ажиллагааны эхлэл болгон нэг жилийн хугацаанд Энэтхэг улсад 15 эмч, эмнэлгийн мэргэжилтнийг тасралтгүй сургалтанд хамруулж, суралцах хугацааны сургалт, байр, хоолны зардлыг бүрэн хариуцахаар болсон. Цаашид эмч, эмнэлгийн мэргэжилтнүүдийг ажлын байран дээр чадавхжуулах сургалтын хөтөлбөр хэрэгжүүлэхээр төлөвлөж байгаа юм байна.
Санамж бичиг байгуулж хамтран ажиллах болсонд Эрүүл мэндийн сайд С.Чинзориг талархал илэрхийлж “Засгийн газраас эрүүл мэндийн тусламж үйлчилгээг чанартай, хүртээмжтэй болгох бодлого барьж байгаа. Энэ бодлогын хүрээнд эрүүл мэндийн байгууллагуудад эмчилгээ, оношлогооны орчин үеийн шинэ технологи, арга зүйг нэвтрүүлэх, тэдгээрийг эзэмшсэн ур чадвартай боловсон хүчин бэлтгэх нь маш чухал байна.
Эхний ээлжинд сургах 15 эмчийг маш зөв сонгож, зайлшгүй шаардлагатай чиглэлээр сургалтад хамруулахад анхаарч ажиллахыг та бүхнээс хүсье. Сураад ирсэн эмч нарыг тогтвор суурьшилтай, үр дүнтэй ажиллуулах тал дээр яам анхаарах болно” гэв.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
