УИХ-ын гишүүн Б.Энх-Амгалангийн "Бусдад давуу байдал бий болгосон" гэх хэргийг шүүхэд шилжүүлэх саналтайгаар прокурорт хүргүүлсэн талаар АТГ-аас албан ёсоор мэдээлэв. Б.Энх-Амгалан нь "нүүрсний" гэх хэрэгт холбогдсон гишүүдийн нэг билээ. Тухайлбал,
Өнгөрсөн хоёрдугаар сард АТГ-аас Говь-Алтай аймгаас сонгогдсон хоёр гишүүн буюу Ш.Раднаасэд, Б.Энх-Амгалан нарыг "нүүрсний" гэх тодотголтой хэрэгт холбогдуулан яллагдагчаар татан шалгаж байгаа талаар мэдээлж байсан.
УИХ-ын гишүүн Б.Энх-Амгалан “Шалгагдаж байгаа нь үнэн. Хуулийн дагуу мэдүүлэг өгч байгаа. Би хууль зөрчөөгүй, хулгай хийгээгүй, хэн нэгэнд давуу байдал олгоогүй. Монгол Улсын сайдад олгогдсон эрхийн хүрээнд хуулийн дагуу шийдвэр гаргасан. Нэг шуудай нүүрс, нэг хүрз шороо ч аваагүй” гэх тайлбарыг өгч байлаа.
Ийнхүү хагас жил гаруй шалгасны эцэст УИХ-ын гишүүн Б.Энх-Амгалангийн хэргийг прокурорт хүргүүлжээ. Түүнийг Зам, тээврийн хөгжлийн сайдаар ажиллаж байхдаа "Албан тушаалын байдлаа ашиглан бусдад давуу байдал бий болгож, улсад хохирол учруулсан" хэмээн Эрүүгийн хуулийн 22.1.3-аар яллагдагчаар татсан.
УИХ-ын намрын чуулганы тухайд "нүүрсний" гэх тодотголтой хэргээр хамгийн түрүүнд шалгагдаж эхэлсэн УИХ-ын гишүүн А.Адъяасүрэн, Т.Аюурсайхан, Ш.Раднаасэд, Ж.Мөнхбат, Н.Наранбаатар, Б.Энх-Амгалан нарын гишүүдээс хаврын чуулганаар гурвынх нь бүрэн эрхийг түдгэлзүүлэх асуудлыг прокуророос оруулж, хоёр гишүүний бүрэн эрхийг түдгэлзүүлэн шалгаж байгаа. Тэгвэл намрын чуулганаар хамгийн түрүүнд Б.Энх-Амгалангийн нэр орж ирж магадгүй болжээ.
Like
2
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
