"Хараагүй" иргэнийг доромжилсон З.Төмөртөмөө Төрийн албан хаагчийн ёс зүйн тухай хуулийг НОЦТОЙ зөрчжээ

Админ

2023-08-30

Монголын "Хараагүйчүүдийн үндэсний холбоо"-ноос нийслэлийн удирдах шатны албан тушаалтанд хараагүйгээрээ доромжлуулсан тухай мэдээлэл өглөө. Тодруулбал,

Нийслэлийн Засаг даргын орлогч З.Төмөртөмөө хараагүй иргэн өөртэй нь уулзах хүсэлт тавихад "Чи хажуудаа байгаа хүнийг харж чадах уу, хүний нүүр харж чадах юм уу" хэмээн доромжилсон гэдгийг тус холбооны Ерөнхийлөгч Б.Ганзориг хэллээ.

Асуудлын тухайд,

"Хараагүйчүүдийн үндэсний холбоо"-ны дэргэдэх зам талбай шавар шалбааг ихтэй, хараагүй иргэд зорчиход хүндрэлтэй байдаг аж. Дээрх асуудлаар энэ оны тавдугаар сард Хотын даргын орлогч З.Төмөртөмөө нь бусад албаны хүмүүстэй орчин нөхцөлтэй нь танилцаж, Азийн хөгжлийн банкны "Цэвэр агаар сан" төслийн хүрээнд тохижилт хийхээр болжээ. Зохих шатны дагуу өнгөрсөн долдугаар сарын эцэст зураг төслийг эцэслэн баталсан аж.

Гэвч "Хараагүйчүүдийн холбоо" санхүүжилтээ хүсэхэд "Заасан хугацаа нь өнгөрсөн учраас олгох боломжгүй" гэжээ. Ингээд Хотын даргын орлогч З.Төмөртөмөөд хандтал мөн л "Зураг төслөө удаасан тул боломжгүй" гэх хариуг өгсөн гэв.

Холбооны Ерөнхийлөгч Б.Ганзориг бухимдаж, твиттер хуудаснаа "З.Төмөртөмөө хараагүй иргэдийг хулхидлаа" хэмээн жиргэтэл утсаар залгаж "За Б.Ганзориг оо, аятайхан байгаарай. Чи хажуудаа байгаа хүнээ харж чадах уу, хүний нүүр харах уу" хэмээн доромжилсон бөгөөд гомдолтой байгаагаа тэрбээр онцолж, огцруулах шаардлагыг хүргүүлжээ.

З.Төмөртөмөөгийн гаргасан үйлдэл нь нотлогдсон тохиолдолд Төрийн албан хаагчийн ёс зүйн тухай хуулийн хэд хэдэн заалтыг НОЦТОЙ-гоор зөрчсөнд тооцогдох юм. Тухайлбал,

Төрийн албан хаагчийн ёс зүйн тухай хуулийн 6 дугаар зүйлийн 6.1.1-т "Хүнлэг энэрэнгүй байх", 7 дугаар зүйлийн 7.1.2-т "Зан харилцаа, үг үйлдлээрээ хүний эрх, эрх чөлөөг хүндэтгэх", 8 дугаар зүйлийн 8.1.3-т "Бусдын бие эрхтний онцлогийг зохисгүй үг, үйлдлээр илэрхийлэхийг цээрлэх, хөгжлийн бэрхшээлтэй хүний өөрийгөө илэрхийлэх үйлдлийг даган дуурайхгүй байх, ёс бус үг, хэллэг хэрэглэхгүй байх" гэж заасныг тус тус зөрчжээ.

Харин хүлээлгэх хариуцлагын тухайд:

Төрийн албан хаагчийн ёс зүйн тухай хуулийн 16 дугаар зүйлийн 16.1.4-т "Төрийн албанаас халах" хэмээн заасан байна.

Хуулийн заалтаас харахад, З.Төмөртөмөө нь албан тушаалаасаа огцрох болзлоо аль хэдийнэ хангачихсан байгааг та харж болно.

Нийт сэтгэгдэл 1

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.