Өнөө жилийн улсын наадам өнгөрснөөс хойш "ДОПИНГ"-ийн хэрүүл тасраагүй. Ер нь ганц энэ жил ч биш, наадам бүрийн дараа энэ хэрүүл урт хугацаанд үргэлжилдэг. Энэ жилийн тухайд, 32 бөхийн шинжилгээнээс "шөвгөрсөн" нэг бөхийнх ЭЕРЭГ буюу допингтой гэж гарсныг ХЗДХЯ-ны Төрийн нарийн бичгийн дарга, Үндэсний бөхийн салбар хорооны дарга П.Сайнзориг хэлсэн. "Энэ бөхийн нэр хэн бэ" гэж багагүй таамаг өрнөв.
Явж явж, түрүү бөх, шинэхэн арслан М.Бадарч байж таарсан. Өөрөө ч цахим хуудсаараа дамжуулж, хүлээн зөвшөөрч буйгаа мэдэгдсэн бөгөөд "Б" сорьц өгч нягтлуулж буйгаа хэлсэн билээ.
Ингэхдээ "Олон нийтийн сүлжээнд сэтгүүлчид "Бөхчүүдийн шинжилгээний хариу ирсэн, нэг бөхийнх дутуу тэр бөх нь наадмын түрүү бөх М.Бадарч байна" гэсэн мэдээллийг тараасан. Энэ нь Допингийн эсрэг ОУ-ын дүрэм, Монголын допингийн эсрэг үндэсний журмыг илтэд зөрчсөн үйлдэл болсон.
Энэ үйлдлийг гардан хийсэн нь шинжилгээг авсан Допингийн эсрэг үндэсний төв, шинжилгээний захиалагч тал болох ХЗДХЯ-нд төвлөрсөн Бөхийн салбар хорооны дарга удирдлагууд бөгөөд тэд мэдээллийг хууль журмыг илтээр зөрчин сэтгүүлчдэд өгч идэвхтэйгээр тараалгаж байсанд маш их харамсаж байна" хэмээсэн.
Тэгвэл Үндэсний бөхийн салбар хорооны дарга П.Сайнзориг сэтгүүлчдэд хариу тайлбарч өгч "Шинжилгээ авах процесс бүхэлдээ хууль, хяналтын байгууллагын хяналтан дор явагддаг. Ямар нэгэн байдлаар хоорондоо солигдох боломжгүй. Бөхчүүд өөрсдийнхөө хариуцлагыг хүлээж, ёс зүйтэй байж сурмаар байна. Жаахан "жудаг"-тай байя. Түрүүлж амжилтад хүрэхийн тулд янз бүрийн арга ашиглаж, энэ нь илчлэгдээд ирэхээр иргэдийн худал мэдээллээр талцуулдаг байдал гаарч байна. Гэхдээ энэ арга нь "явахаа" больсон. Өнгөрсөн жилийн тухайд ч эерэг гарсан бөхийн хариу үлдэж байсан. Асуудалтай хүнийх үлддэг юм билээ. Үүнийг сайтар нягталж байж, хариуг ирүүлдэг" гэх тайлбарыг өгсөн юм.
М.Бадарчийн тухайд "Б" сорьцын хариугаа ирсэн даруйд олон нийтэд хандаж, мэдээлэл өгөхөө зарласан. Хэрвээ "Б" сорьцын хариу ЭЕРЭГ гарч, допинг хэрэглэсэн нь батлагдвал түүний арслан цолыг хурааж, үзүүрлэсэн Ц.Бямба-Отгон цол ахих юм. Түүнчлэн, М.Бадарчид "өвдөг шороодсон" бөхчүүдийн цол чимгийг нөхөн олгох журамтай.
М.Бадарч, П.Сайнзориг хоёрын хэн нь наадам БУДИЛУУЛСАН бэ...
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
