Банкууд ирэх сарын 11-ний дотор ипотекийн зээлийн "нэг хувь"-ийн шимтгэлийг буцаан олгох үүрэгтэй

1
2402

Банкууд ирэх сарын 11-ний дотор ипотекийн зээлийн "нэг хувь"-ийн шимтгэлийг буцаан олгох үүрэгтэй

Админ

2023-09-23

ШӨХТГ-аас "Арилжааны банкуудын ипотекийн зээл олголтын шимтгэлийн нэг хувьтай" холбоотой асуудлаар мэдээлэл өглөө.

ШӨХТГ-ын дарга С.Ням-Эрдэнэ “Арилжааны банкуудад ипотекийн зээлийн нэг хувийн шимтгэл авч байгаа нь үндэслэлгүй буюу "хууль ёсны ашиг сонирхолд харшлах болон хэрэглэгчийг хууль бусаар хохироох худалдааны арга хэрэглэсэн” гэх үндэслэлээр нэр бүхий есөн банканд 20 сая төгрөгийн торгууль ногдуулсан.

Улмаар зөрчил үр дагаварыг арилгах шаардлага хүргүүлсэн улсын байцаагчийн шийдвэрийг "хууль зүйн үндэслэлтэй" гэж Улсын Дээд Шүүхээс эцэслэн шийдвэрлээд байгаа.

Улсын Дээд шүүхийн захиргааны хэргийн танхимын нийт шүүгчдийн хуралдаанаар нэр бүхий арилжааны есөн банкны гомдлыг хяналтын шатны шүүх хуралдаанаар хэлэлцүүлэхээс татгалзсан шийдвэр гарсанаар ШӨХТГ-ын улсын байцаагчийн тавьсан торгууль, зөрчлийн үр дагавар арилгах албан даалгавар хүчин төгөлдөр үйлчилж байна.

Банкууд шүүхийн шийдвэрийг сайн дураар биелүүлэх хугацаа 30 хоног үргэлжлэх буюу ирэх аравдугаар сарын 11-ний өдрөөр дуусгавар болох юм. Тухайн хугацаанд банкууд шийдвэрийг биелүүлээгүй тохиолдолд албадан гүйцэтгүүлэх, шийдвэрийн хэрэгжилтийг хангах үйл ажиллагааг зохион байгуулах шаардлага үүсэж байна.

Иймд тус хэргийг шүүхээр шийдвэрлүүлэхэд эхнээс нь хамтран ажиллаж байсан өмгөөлөгчид болох С.Ялалт, Б.Цэнгэл, Г.Чинбат нартай үргэлжлүүлэн хамтран ажиллах гэрээг өчигдөр албан ёсоор байгууллаа” гэлээ.

Мөн тэрбээр шүүхийн шийдвэр гарсан өдрөөс эхлэн олон нийтийн сүлжээнд иргэдийг төөрөглүүлэх мэдээ, мэдээллийг нэр бүхий хүмүүс өөрийн цахим хуудсаар олон нийтэд нэр хүндээ өсгөх, олны хандалт авах, улс төрийн зорилгоор ашиглаж манай байгууллагын мэдээлэл мэтээр илэрхийлж байгаа тул энэ үйлдлийг хуулийн хүрээнд таслан зогсоох арга хэмжээ авахаа илэрхийлсэн юм.

Цаашид ШӨХТГ-аас арилжааны банкуудаас олгож буй бүх төрлийн зээлийн шимтгэлүүд үндэслэлтэй эсэхэд хяналт, шалгалт хийхээр төлөвлөж байна. Мөн АМГТГ-аас шатахууны нөөц хэвийн байгаа талаар мэдээлэл авснаа дурдаад хэрэглэгчдийг буруу ташаа мэдээлэлд автахгүй байх, шатахууныг нөөцлөх, зохиомлоор хомсдол үүсгэхгүй байх, үнийн хөөрөгдөл гаргахгүй байх зөвлөмжийг өглөө.

Нийт сэтгэгдэл 1

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.