УИХ-ын өнөөдрийн чуулганаар хүүхдийн эрхийн зөрчил, аюулгүй байдлын талаар асуудлыг хэлэлцэж байна. Хуралдааны эхэнд УИХ-ын дарга Г.Занданшатар "Гудамж талбайн гэрэлтүүлэг, камержуулалтыг иргэд, хүүхдийн аюулгүй байдлыг хангах түвшинд хийх хэрэгтэй. Сургуулийн автобусны хүрэлцээг сайжруулах, сургалтын хөтөлбөрт гэр бүл, хүүхэд хамгааллын талаар мэдлэг олгох агуулгыг багтаах шаардлагатай" гэлээ.
ХНХ-ын сайд Х.Булгантуяа: "Харин хүүхэд хамгааллын чиглэлээр тулгамдсан асуудлын тухайд "Хүүхдийн эсрэг хүчирхийллийн 70 гаруй хувь нь эцэг, эх асран хамгаалагч харгалзан дэмжигчийн зүгээс үйлдэгдэж байна. 2023 оны есөн сарын байдлаар хүүхдийн хамгааллын утсанд 78,300 дуудлага мэдээлэл бүртгэгдсэн.
Төрийн өмчийн 72, төрийн бус өмчийн 22 сургууль автобустай байгаа нь хүүхэд сургууль, гэр хоёрын хооронд аюулгүй зорчиход тулгамдсан асуудал болж байна. Иймээс автобусны тоог нэмэх шаардлагатай.
Төрийн өмчийн 650 сургуулиас 560 нь гаднаа камертай, огт камергүй 90 сургууль байна. Ерөнхий боловсролын 61 сургууль огт камергүй. Сургууль доторх аюулгүй байдлыг хангахаас гадна сургуульдаа очиж, ирэх зам харгуйн аюулгүй байдлыг хангах учиртай.
Хүүхэд хамгааллын цэгүүд, түр хамгаалах байрууд гэх мэтчилэн хамгаалах, нөхөн сэргээх үйлчилгээний зардал нийт төсвийн 50 хувийг эзэлж байна. Хүүхэд хамгааллын үйлчилгээний мэдээллийн санг хөгжүүлж байна" гэсэн юм.
Үргэлжлүүлэн гишүүд байр сууриа илэрхийлж, ХНХ-ын сайд Х.Булгантуяаг багагүй шүүмжиллээ. Тухайлбал,
УИХ-ын гишүүн Д.Сарангэрэл: Оны эхний хагас жилийн байдлаар 251 хүүхэд бэлгийн хүчирхийлэлд өртсөн байна. Бид сэтгэл сэртхийлгэм хэрэг гарахаар нийгмээрээ цочиж, баахан юм болоод өнгөрдөг. Одоо бүгдээрээ хийдэг байя. Хүчирхийлэл үйлдсэн этгээдүүдийг бүх насаар нь хорьдог, өршөөл үзүүлдэггүй, магадлангаар оруулахгүй байх зэрэг арга хэмжээнүүдийг авдаг баймаар байна. Хуулийн бодлогоо чангатгая.
УИХ-ын гишүүн Б.Баярсайхан: Х.Булгантуяа сайд аа, танай яам ганцаараа хийж чадахгүй болохоор чинь би ажлыг чинь хийсэн. Хөдөлмөрийн тухай хуулийн 43 дугаар зүйлийг батлуулсан. Би таныг шүүмжилсэн гээд байгаа бол аудитын дүгнэлтээ харчих. Хүүхэд хамгаалалд төсөвлөсөн НАЙМАН ТЭРБУМ төгрөгөөр дарс виски, цахилгаан хэрэгсэл авсан нь ил болоод байна. Худлаа гэвэл энэ дүгнэлтээ хар л даа, Х.Булгантуяа сайд аа.
УИХ-ын гишүүн М.Оюунчимэг: Хөвсгөл аймагт 2010 онд найман настай охиныг хэрцгийгээр хөнөөсөн этгээд жилийн дараа "магадлан"-аар суллагдах гэж байна. Хуулиа чангатгахгүй бол энэ хэргүүд гарсаар байна. Сүүлийн кэйс дээр ч гэсэн "Хүчирхийлэл үйлдэхийг завдсан" гэдгээр таван жилийн ял авч гарч ирээд, хэрэг үйлдэж байна.
Нийгэмд "УИХ-ын эмэгтэй гишүүд хүүхэд хамгааллын асуудалд дуугарахгүй байна, ажил хийхгүй байна" гэх шүүмжлэл олонтаа гардаг. Тэгвэл эмэгтэйг гишүүд дараах байр суурийг илэрхийлэв.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
