Монгол Улсын нийслэл Улаанбаатар хот ЮНЕСКО-гийн “БҮТЭЭЛЧ ХОТУУДЫН СҮЛЖЭЭ”-нд нэгдсэний батламж гардуулах ёслол өнөөдөр /2023.12.01/ боллоо.
Улаанбаатар хот ЮНЕСКО-гийн “БҮТЭЭЛЧ ХОТУУДЫН СҮЛЖЭЭ”-нд нэгдсэний батламж гардуулах ёслолыг нээж Нийслэлийн засаг дарга бөгөөд Улаанбаатар хотын захирагч Х.Нямбаатар, ЮНЕСКО-ийн Зүүн ази дахь Төлөөлөгчийн газрын захирал Шахбаз Хан, “Нийслэлийн жижиг, дунд үйлдвэр, үйлчилгээг дэмжих төв” НӨҮГ-ын дарга Г.Гангамөрөн нар үг хэлж жижиг, дунд үйлдвэр, үйлчилгээ эрхлэгчид, албаны төлөөллүүд оролцов.
ЮНЕСКО-оос 2023 оны 10 дугаар сарын 31-ний өдөр буюу “Дэлхийн хотуудын өдөр”-өөр “Бүтээлч хотуудын сүлжээ”-нд нэгдсэн дэлхийн хотуудыг зарласан бөгөөд Улаанбаатар хот гар урлал, ардын урлагаар нэгдэн орж буй анхны хот боллоо.
Ноён Шахбаз Хан “Улаанбаатар хот жуулчдад нэгэн зэрэг олон зүйлийг санал болгох боломжтой хот гэдгээрээ онцлогтой. Бүтээлч байх нь тогтвортой хөгжлийн үндэс. Улаанбаатар хотод ЮНЕСКО-ийн албан ёсны оффисыг байгуулахаар ярилцана” хэмээн онцлон Нийслэлийн засаг дарга бөгөөд Улаанбаатар хотын захирагч Х.Нямбаатарт Улаанбаатар хот ЮНЕСКО-гийн “Бүтээлч хотуудын сүлжээ”-нд нэгдсэний батламжийг гардуулан өглөө.
Нийслэлийн Засаг дарга бөгөөд Улаанбаатар хотын Захирагч Х.Нямбаатар "Засгийн газар хийгээд нийслэлийн бодлогын бичиг баримтуудыг хэрэгжүүлэхэд өнөөдрийн үйл ажиллагаа томоохон үүд хаалгыг нээж байна. Эсгий урлал бол Монгол төдийгүй дэлхий дахинд танигдсан байгаль орчинд ээлтэй, “амьсгалдаг” технологи учраас олон улсын зах зээлд гарах бүрэн боломжтой. Үндэсний хувцас, эсгий урлал, ардын бүжгийг бүтээлч үйлдвэрлэлээр хотын эдийн засгийг нэмэгдүүлэх боломж хэмээн үзэж байна” гэлээ.
“Бүтээлч хотуудын сүлжээ”-нд нэгдэн орохын тулд улс орнууд өөрсдийн хотын соёлын үнэт зүйл, бүтээгдэхүүн үйлдвэрлэл, өв тээгчдийн нөөц, дэд бүтцийн хөгжлийн онцлогуудаас хамааран соёлын бүтээлч үйлдвэрлэлийн нэг салбараас (уран зохиол, хөгжмийн урлаг, кино урлаг, дизайн урлаг, хоолны урлаг, хэвлэл мэдээллийн урлаг, гар урлал ба ардын урлаг) сонгон хүсэлт хүргүүлдэг.
Энэ дагуу “Нийслэлийн жижиг, дунд үйлдвэр, үйлчилгээг дэмжих төв” НӨҮГ-ын дарга Г.Гангамөрөнөөр ахлуулсан ажлын хэсэг Бодлогын болоод салбарын зөвлөх үйлчилгээний багийг мэргэжлийн хүмүүсээр бүрдүүлэн нарийн судалгаа хийн ажилласнаар ардын урлаг, уламжлалт гар урлал /Folk and crafts/ төрлөөр ЮНЕСКО-гийн “БҮТЭЭЛЧ ХОТУУДЫН СҮЛЖЭЭ”-нд Улаанбаатар хотыг амжилттай бүртгүүлж чадлаа.
“Нийслэлийн жижиг, дунд үйлдвэр, үйлчилгээг дэмжих төв” НӨҮГ-ын дарга Г.Гангамөрөн “Монгол Улсын нийт хүн амын 60 хувь нь Улаанбаатар хотод ажиллаж, амьдарч байна. ДНБ-ий 64 хувь буюу 35 их наяд гаруй төгрөгийг Улаанбаатар хот “үйлдвэрлэдэг”. ЮНЕСКО-ийн “Бүтээлч хотуудын сүлжээ”-нд бүртгүүлэх Ажлын хэсгийг хагас жилийн хугацаанд ахлан ажиллалаа. Тус сүлжээнд Улаанбаатар хот нэгдэн орсноор ЖДҮҮ эрхлэгчид шинэ түвшинд гарч, дэлхийн зах зээлд соёлын бүтээлч үйлдвэрлэлийг таниулаад зогсохгүй хотын эдийн засаг, тогтвортой хөгжилд чухал нөлөө үзүүлэх боломж бүрдэнэ” хэмээн тодотгов.
Улаанбаатар хот гар урлал, үндэсний хувцас, үндэсний бүжгээр тус сүлжээнд нэгдэж БҮТЭЭЛЧ ХОТООР сонгогдсон нь үндэсний өв соёл, уламжлалаа дэлхийн 355 хотод сурталчлан таниулах боломж төдийгүй хотын эдийн засаг, тогтвортой хөгжилд чухал нөлөө үзүүлэх боломж бүрдлээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
