Ч.Хүрэлбаатар: Улс орныхоо хөгжлийн төлөө гишүүд, улс төрчид улс төрийн, иргэний зориг гаргах ёстой

Админ I Төр.мн

2024-01-18

УИХ-ын чуулганы өнөөдрийн хуралдаан дээр "Хөрөнгө оруулалтын тухай хууль"-тай холбоотойгоор Эдийн засаг, хөгжлийн сайд Ч.Хүрэлбаатар үг хэллээ.

Эдийн засаг, хөгжлийн сайд Ч.Хүрэлбаатар: "Хөрөнгө оруулалтын тухай хууль бол хоёр хүний хоорондын асуудал биш юм. Энэ бол Монгол Улсын хөгжлийн талаарх асуудал юм. Нэг зүйлийг ярих нь зөв. 10 орчим жилийн өмнө манай улс экспортын зах зээл рүүгээ дэлхийн ихэнх орнуудад хэрэглэгддэг олон улсын царигаар төмөр зам барих гэж байх үед танк дүүрэн Хятадууд ороод ирнэ гэсэн үлгэрийн зүйл ярьж тухайн үеийн олон улс төрчид, УИХ-ын гишүүдийг айлгасан. Ард иргэдийн ч ихэнх нь тэр үлгэрт итгэсэн. Эцэст нь ямар үр дүнд хүрсэн бэ? гэхээр Монгол Улсын хөгжил 10 жилээр хойшилсон.

Олон тэрбум долларын хохирол Монгол Улсын эдийн засагт учирсан. Нүүрс өрсөлдөх чадваргүй болсон. Ийм нөхцөл байдлыг тухайн үедээ авчирч байсан. Энэ хуулийн төслийг одоо бас танкны үлгэрийн хэлбэр рүү оруулах гэж байна. Өмнө нь танк дүүрэн Хятадууд орж ирнэ гэдэг шигээ одоо ч тийм суртал ухуулгуудыг явуулж байгаа нь туйлын хариуцлагагүй зүйл юм. Надад харамсаж явдаг нэг зүйл байдаг.

Тэр нь тухайн үед би олигтойхон дуугарах ёстой байж гэсэн бодол. Тухайн үед би энэ чинь худлаа, худлаа, үлгэр гэдгийг чанга дуугарсан бол Монголын нийгэмд нэлээд эерэг зүйлүүдийг авчрах байсан байх гэж бодож харамсаж явдаг. Тухайн үед миний хариуцсан зүйл биш гэж бодоод сулхан дуугараад өнгөрөөсөн. Эцэст нь Монгол Улсын эдийн засаг, хөгжлийг тэр танкны үлгэрийг зохион байгуулсан хүмүүс 10 жилээр хойш нь татсан. Энэ үед танкны үлгэрийг зохион байгуулж байсан хүмүүс одоо ч үүний ард байна. Одоо энэ асуудлыг шийдэж хэлэлцэхгүй бол хөгжлөө дахиад л хэдэн жилээр хойш нь татна. Эх орныхоо хөгжлийн чиглэлээр хичээл зүтгэл гаргаж тууштай ажилламаар байна. Идсэн эрүү хувхайрч, идүүлсэн бут ургадаг гэж айлгах, хор хутгах тактикийн эсрэг улс төрийн иргэний эр зориг гаргаж таслан зогсоох ёстой" гэв.

Бэлтгэсэн: Т.Сарантуяа

Нийт сэтгэгдэл 1

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.

Irgen - 1 жил өмнө

хариулах

Ene hyn hyrelbaatar 30 jil monhol ulsiin sangiin said hurungiin ezen shahyy blaa yu hiisen bee uls oron ard irgediig dampuuryylah ajil hiisen hulgaich shyydee odoo uls ornoo hudaldah yum yarij bna ene met luivarvhfiig yter tyrgen huuj zailuulcgaaya.