М.Бат-Эрдэнэ: Зорилго, зарчим нь тодорхой бол хоршиж ажиллахад асуудалгүй

Төр.мн I www.tur.mn

2024-06-05

Төв аймгийн Батсүмбэр сумын “Үдлэгшим Агро” хоршооныхон анх сүүний үнийг тогтворжуулах зорилгоор 2021 онд нэгдэж ажиллаж эхэлжээ.

Улмаар гишүүд нь хамтарч, хоршиж ажиллахын давуу талыг мэдэрсэн тул тэд үйл ажиллагаагаа мах, ногоо, газар тариалангийн чиглэлээр өргөжүүлсэн байна. Тухайлбал, тус хоршооныхон өнгөрсөн намар зургаан тонн өргөст хэмх хураан авч зах зээлд нийлүүлжээ. Мөн хүчин чадлаа нэмэгдүүлж, арван тонн сүү нийлүүлэх боломжтой болсон байна.

Тус хоршооныхон үйл ажиллагаагаа ийн өргөжүүлж, холбогдох хууль, дүрэм журмын дагуу ашиг орлогоо хуваахаас гадна малчиддаа дэмжлэг үзүүлж, сум орон нутгийнхаа хөгжил дэвшилд хувь нэмэр оруулдаг болжээ.

Тухайлбал, өнгөрсөн өвлийн зуднаар нутгийнхаа малчдад хүнс, өвс, тэжээлийн тусламж үзүүлсэн бол Олон улсын хүүхдийн эрхийг хамгаалах өдрийг тохиолдуулан арван сая төгрөгийн өртөг бүхий хүүхдийн тоглоомын талбайн бүтээн байгуулалтын ажлыг сумандаа өрнүүлжээ.

Нэгэн зорилгын төлөө эвлэлдэн нэгдэж чадвал боломжгүй зүйлгүй байхгүйг мөн хоршиж ажиллахын давуу талыг үлгэрлэн харуулж буй тус хоршооны сайн туршлагаас хуваалцлаа. Хоршооны гишүүд “эв нэгдэл” гэдэг зарчмыг баримтлан ажилладаг тул үйл ажиллагаа нь тогтвортой байхаас гадна өдгөө ийн өргөжин тэлж чадсан гэдгийг тус хоршооны гишүүн М.Бат-Эрдэнэ онцоллоо.

Тэрбээр “Хоршоо байгуулахаас өмнө манайх өөрийн эзэмшлийн болон түрээсийн гээд нийт гурван га талбайд ногоон тэжээл тарьдаг байлаа. Үүнийг ганцаараа хийхэд маш хүндрэлтэй, бас алдагдалтай байдаг байсан. Харин хоршоо байгуулан ажиллаж эхэлснээр тоног төхөөрөмж, хүн хүч гээд бүх талаараа ямар ч асуудалгүй болсон. Энэ бол хамтарч, хоршиж ажиллахын нэг давуу тал. Мөн хоршооны бас нэгэн давуу талыг өнгөрсөн өвлийн зуд харууллаа. Манай хоршооныхон өвлийг малын хорогдол багатай даван туулахын зэрэгцээ зарим малчинд өвс, тэжээлийн тусламж хүртэл үзүүлсэн. Бид хуулийн дагуу дундын хуримтлалын данс нээж, аж ахуй, санхүү, техникийн хороо гэж хуваагдан ажилладаг. Энэ оны төлөвлөгөөндөө хоршооныхоо хоёр хүнийг малын эмчээр сургаж, мэргэшүүлэхээр тусгасан” хэмээн ярилаа.

Засгийн газраас “Шинэ сэргэлтийн бодлого"-ын хот, хөдөөгийн сэргэлтийн хүрээнд уур амьсгалын өөрчлөлтөөс шалтгаалан мал аж ахуйн салбарт үүсэж болзошгүй гамшгаас урьдчилан сэргийлэх, мал аж ахуйн үйлдвэрлэл, малчдын хоршоог дэмжих, тогтвортой хөгжүүлэх зорилгоор "Шинэ хоршоо хөдөлгөөн"-ийг өрнүүлж буй.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.