УИХ-ын ээлжит сонгуулийн II тойрог, баруун бүсэд нэр дэвшигчид өнөөдөр Говь-Алтай аймгийн иргэд сонгогчидтой уулзлаа.
МАН-ын дарга, Монгол Улсын Ерөнхий сайд Л.Оюун-Эрдэнэ Говь-Алтай аймгийн уулзалтад хүрэлцэн ирж, иргэд сонгогчдын уулзалтыг нээж үг хэлсэн юм.
Тэрбээр үгийнхээ эхэнд “Агуу их Ээж хайрхан, Сутай хайрхан, Хасагт хайрхан, Бурхан буудай уул, Аж Богдын нуруу, Хантайшир хайрхан гээд өндөр их уулсаа түшин суугаа эрхэм ард түмэн минь Монгол Улсын ардын уран зохиолч Л.Түдэв, Төрийн хошой шагналт Ч.Лодойдамба гуай, Монгол Улсыг шилжилтийн цаг үед удирдсан төр нийгмийн нэрт зүтгэлтэн Ерөнхий сайд П.Жасрай, эх орныхоо тусгаар тогтнол бүрэн эрхт байдлын төлөө зүтгэсэн үе үеийн түүхт генералуудын өлгий нутаг “Зулай цагаан Алтай”-гаар овоглосон Говь-Алтай нутгийн иргэд сонгогчид та бүхэндээ МАН-аас нэр дэвшигчдийн хамт мэндчилж байгаадаа баяртай байна” хэмээн тодотгов.
Үргэлжлүүлэн тэрбээр баруун бүсэд МАН-аас нэр дэвшигчдийг нэг бүрчлэн танилцуулсан бөгөөд тэднийг яагаад багаар нь дэмжих ёстойг тайлбарлалаа. 2024 оны УИХ-ын сонгуульд МАН бүсчилсэн тойрогт туршлагатай улстөрчдөө, жагсаалтад шинэ залуу үеийн, салбар бүрийн шилдэг төлөөллийг багтааснаараа онцлогтой. Түүнчлэн Улаанбаатарыг “20 минутын хот” болгох, Хөдөөг хоршоолох том бодлогыг зарлан, мөрийн хөтөлбөртөө тусгайлан тусгасан. Тэгвэл энэ бодлогыг ажил хэрэг болгоход манлайлах туршлагатай улстөрчдийг МАН баруун бүсэд дэвшүүлснийг МАН-ын дарга, Монгол Улсын Ерөнхий сайд Л.Оюун-Эрдэнэ онцоллоо. Түүнчлэн 2024 оны УИХ-ын сонгуулийн онцлог төдийгүй Үндсэн хуульд өөрчлөлт оруулж, холимог тогтолцоонд шилжсэнээр Монгол Улс анх удаа 126 гишүүнтэй парламенттай болж, нийгмийн төлөөлөл нэмэгдэх боломж бүрдсэн талаар танилцуулав.
МАН-ын дарга танилцуулгын эхэнд Говь-Алтай аймгийн унаган хүү, МАН-ын Ерөнхий нарийн бичгийн дарга, Монгол Улсын сайд, ЗГХЭГ-ын дарга Д.Амарбаясгаланг танилцуулсан.
Энэ тухайд тэрбээр ”Бид нэгэн зорилгын төлөө хамтдаа зүтгэж яваа нэгэн үеийн залуучууд. Д.Амарбаясгалан маань 2009 оноос хойш улс төрийн намын институцыг бэхжүүлж, дэвшилтэт, бодлогын, цахим нам болох ажлыг гардан гүйцэтгэж, амжилттай хэрэгжүүлж чадсан бөгөөд олон удаагийн сонгуульд намаа удирдан, ялалт байгуулж чадсан манлайлагч, ардчилсан үзэлтэн, стратегич. Мал аж ахуйн салбарт өмнө нь хийж байгаагүй том шинэчлэл болох хөдөөг хоршоолохоор эхлүүлсэн ажлаа дуусгах нь зүйтэй гэж үзэн Д.Амарбаясгаланг нэр дэвшүүлсэн” хэмээн тодотголоо.
.jpg)
Түүнчлэн баруун бүсэд МАН-аас дэвшүүлж буй С.Бямбацогт, Ч.Хүрэлбаатар, Б.Чойжилсүрэн, Б.Баярсайхан, Э.Болормаа, Ц.Цэрэнпунцаг, З.Мэндсайхан, С.Энхболд, Б.Заяабал нарыг нэгбүрчлэн танилцуулаад МАН-ын туршлагатай хүмүүст итгэл үзүүлэхийг Алтайчуудаас хүслээ. Ийнхүү МАН баруун бүсийн Увс, Завхан, Ховд, Говь-Алтай аймагт улс төрийн арвин туршлагатай, аймаг орон нутгийнхаа иргэдийн дуу хоолой болж чадахуйц 10 нэр дэвшигчийг илгээжээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
