Тулгар төрийн 2233, Их Монгол Улсын 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадам, “Төрийн далбааны өдөр”-ийг тохиолдуулж гаргасан Ерөнхийлөгчийн зарлигийн дагуу Төрийн далбааг өнө мөнхөд сүр жавхлантайгаар мандуулах ёслолыг нийслэлийн “Улаанбаатар” цэцэрлэгт хүрээлэнд анх удаа зохион байгууллаа.
Ёслолын арга хэмжээнд Монгол Улсын Ерөнхийлөгч У.Хүрэлсүх, УИХ-ын дарга Д.Амарбаясгалан, Ерөнхий сайд Л.Оюун-Эрдэнэ нар оролцож, цэргийн хүндэтгэлийн жагсаал, төрийн дуулал эгшиглүүлж Төрийн алтан соёмбот далбаагаа хүндэтгэлтэйгээр мандууллаа.
Үндэсний эв нэгдлийг бэхжүүлэх, эх оронч үзлийг төлөвшүүлэх, төрт ёс, түүхэн уламжлалаа хойч үедээ өвлүүлэн үлдээх, эх орноороо бахархах, улс орноо сурталчлах зорилгоор ард түмний түүхэн уламжлал, хүсэл тэмүүлэл, эв нэгдэл, шударга ёс, цог хийморийн илэрхийлэл болсон төрийн далбаагаа нийслэл Улаанбаатар хотноо байнга мандуулж байх зорилгоор Монгол Улсын Ерөнхийлөгч У.Хүрэлсүх өнөөдөр 111 тоот зарлиг гаргасан байна. Энэ дагуу өнөөдрөөс “Улаанбаатар” цэцэрлэгт хүрээлэнд 60 метрийн өндөрт 16х8 хэмжээтэй Төрийн далбаа мандаж эхэллээ.
Монгол Улс 2008 онд “Төрийн далбааны өдөр”-тэй болохыг хуульчлан 2009 оноос ёсчлон мандуулж буй. Төрийн бэлгэ тэмдгийн тухай хуулийн дагуу төрийн далбааг байнга мандуулах газар, байршлыг Монгол Улсын Ерөнхийлөгч тогтоож, Ерөнхийлөгч, Улсын Их Хурлын дарга, Ерөнхий сайд нар улс орноо сурталчлах, эх оронч үзлийг төлөвшүүлэх зорилгоор Төрийн далбааг иргэн, хуулийн этгээдэд гардуулж өгөх боломжтой болсон юм.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
