Төр - хувийн хэвшлийн түншлэл - 2024” Ховд аймаг 2024 оны 08 сарын 23-24 өдрүүд АДАПТ төслийн нэг томоохон зорилт нь уур амьсгалд тэсвэртэй, тогтвортой хөгжлийн шалгуур хангасан мал аж ахуйн бүтээгдэхүүнийг дэмжих, зах зээлтэй холбох юм.

Энэ хүрээнд төслийн зорилтот 4 аймгийн 8 суманд уур амьсгалд тэсвэртэй мал аж ахуйн загвар үйл ажиллагааг төр-хувийн хэвшил, малчдын түншлэл зарчмаар туршин хэрэгжүүлж байгаа билээ.

    “Төр - хувийн хэвшлийн түншлэл - 2024” үзэсгэлэнд Ховд, Завхан аймгийн нийт 80 гаруй малчид, хоршоодын төлөөлөл хүрэлцэн ирж бүтээгдэхүүн, үйл ажиллаг-аагаа сурталчлан, сайн туршлагаа хуваалцлаа. Мөн төслийн хүрээнд “Нэг цэг”-ийн загвар хоршоог хэрэгжүүлж буй Ховд, Завхан аймгийн малчдын бүлэг үйл ажиллагаагаа танилцуулж, үр дүн, сургамжаа хуваалцлаа. Үзэсгэлэнгийн үеэр хоршооны төлөөлөл зарим үйлдвэрлэгч байгууллагуудтай “Хамтран ажиллах санамж бичиг”-ийг байгуулсан юм. Санамж бичгийн хүрээнд талууд төсөл хэрэгжих хугацаанд ноолуур бэлтгэлийн чанар, стандартын шаардлага хангасан түүхий эдийг зах зээлийн үнээр, тогтвортой нийлүүлэх чиглэлээр хамтран ажиллахаар боллоо.

ХХААХҮЯ-ны Бодлого төлөвлөлтийн газрын шинжээч Э.Сугарбаяр малчид, хоршооны гишүүдийн сайн туршлагыг хуваалцах, загвар хоршооны үйл ажиллагааг танилцуулах, төр-хувийн хэвшлийн түншлэлийг дэмжих зорилгоор АДАПТ төслөөс зохион байгуулж буй үзэсгэлэн, сургалтын үйл ажиллагаанд оролцогчдод төрийн бодлого, чиглэлийн танилцуулав.

     Тус арга хэмжээнд НҮБ-ын туслах- Нарийн бичгийн дарга бөгөөд НҮБ-ын Хөгжлийн хөтөлбөрийн Ази, Номхон далайн бүс хариуцсан з-ахирал Канни Вигнаража Ховд аймагт ажиллаж АДАПТ төслийн үйл ажиллагаатай танилцлаа.

    Хатагтай Канни Вигнаража болон албаны бусад хүмүүс Ховд аймагт Уур амьсгалын Ногоон сангийн санхүүжилтээр ХХААХҮЯ, БОУАӨЯам хамтран НҮБХХ-ийн дэмжлэгтэйгээр хэрэгжүүлж буй АДАПТ төслийн уур амьсгалын өөрчлөлтөд дасан зохицох чиглэлээр хэрэгжүүлж буй ажлуудтай газар дээр нь очиж танилцан, үр шим хүртэгч малчин айлд зочилсон юм. Мөн төслийн оролцогч талууд болох аймаг, орон нутаг, мэргэжлийн байгууллагуудын төлөөлөлтэй уулзалт хийлээ. Уулзалтаар талууд орон нутагт хэрэгжиж буй дасан зохицох ажлуудын үр дүн, орон нутгийн оролцоо, малчдын идэвх, хамтын ажиллагааны талаар хэлэлцэн, саналаа солилцсон юм. Хатагтай Канни Вигнаража болон холбогдох албаны хүмүүс АДАПТ төслөөс зохион байгуулж буй “Төр - хувийн хэвшлийн түншлэл - 2024” үзэсгэлэн худалдаагаар зочилж төслийн хүрээнд бий болсон малчдын хоршооны загвар үйл ажиллагаатай танилцан, малчдын төлөөлөлтэй уулзлаа.

НҮБХХ-ийн тухай

НҮБХХ нь ядуурал, тэгш бус байдал болон уур амьсгалын өөрчлөлтөөс үүдэлтэй шударга бус байдлыг эцэслэх зорилго бүхий НҮБ-ын тэргүүлэх байгууллага юм. Дэлхийн 170 орны түншлэгчид болон мэргэжилтнүүдийн өргөн цар хүрээт хамтын ажиллагааны дүнд эх дэлхий, хүн бүрийн сайн сайхны төлөө хөгжлийн урт хугацааны, цогц шийдлийг бий болгоход улс үндэстнүүдийг дэмжин ажилладаг.

АДАПТ төслийн тухай:

Уур амьсгалын Ногоон сангийн санхүүжилтээр НҮБ-ын Хөгжлийн Хөтөлбөр (НҮБХХ), БОУАӨЯ, ХХААХҮЯ хамтран хэрэгжүүлж буй “Монгол орны хөдөөгийн иргэдийн дасан зохицох чадамж болон эрсдэлийн менежментийг сайжруулах нь” (АДАПТ)  төсөл нь Ховд, Завхан, Дорнод, Сүхбаатар аймагт 2021-2028 онуудад хэрэгжиж байна.

АДАПТ төсөл нь зорилтот аймгийн иргэдийн уур амьсгалын өөрчлөлтөд дасан зохицох чадамжийг дээшлүүлэх зорилгоор дараах чиглэлийн хүрээнд ажиллаж байна. Үүнд.

Үндэсний болон бүс нутгийн түвшинд газар, усны ашиглалтыг уур амьсгалын мэдээлэлд тулгуурлан төлөвлөж хэрэглэх; Сумдын нутаг дэвсгэрийн хөгжлийн төлөвлөгөөг боловсруулах аргачлалыг боловсронгуй болгож, уур амьсгалын өөрчлөлтийн нөлөөлөл, эрсдэл, эмзэг байдлын дүн шинжилгээ, дасан зохицох арга хэмжээг төлөвлөлтөд тусгаж байна.
Уур амьсгалын өөрчлөлтөд зохицсон ус, хөрсний менежментийн арга ажиллагааг өргөн хүрээнд нэвтрүүлэн, байгалийн нөөцийн менежментэд малчдын оролцоог нэмэгдүүлэх; Бэлчээрийн тогтвортой менежментийг хэрэгжүүлэх, өвс тэжээлийн агуулах барих болон засварлах, урсац бүрдэх эх болон гол мөрний сав газрын унаган төрх, экосистемийг хамгаалах, усны хэмнэлттэй технологи нэвтрүүлэх замаар усны нөөцийн хүрэлцээг хангах зорилгоор татмын ойжуулалт, тармаг ойн нөхөн сэргээлт хийх, булаг шандыг хашиж хамгаалах, инженерийн хийцтэй худаг гаргах болон засварлах, бага оврын хөв цөөрөм барих зэрэг арга хэмжээг хэрэгжүүлж байна.
Гарал үүсэл нь тогтвортой, уур амьсгалын өөрчлөлтөд тэсвэртэй мал аж ахуйг бий болгох, малын бүтээгдэхүүнийг зах зээлд нийлүүлэх, малчдын чадавхыг нэмэгдүүлж бэхжүүлэх; Мал аж ахуйн бүтээгдэхүүнийг зах зээлд нийлүүлэхэд Төр-хувийн хэвшил-малчдын түншлэлийг бий болгох, малчдын байгууллагын чадавхыг бэхжүүлэх чиглэлээр мал, малын гаралтай бүтээгдэхүүнийг нэг цэгийн үйлчилгээгээр дамжуулан борлуулах ажлыг төслийн аймаг бүрд хоёр малчдын байгууллагад хэрэгжүүлж шаардлагатай хөрөнгө оруулалтын ажлуудыг хийн, дэмжин ажиллаж байна. Мөн нутгийн үүлдрийн малын цөм сүргүүдийг төслийн 4 аймагт бий болгож байна.