Монгол Улсын Шадар сайд С.Амарсайхан өнөөдөр (2024.09.24) БНХАУ-ын ӨМӨЗО-ы Эрээн хотын Улс төрийн зөвлөлийн дарга Цог тэргүүтэй төлөөлөгчидтэй албан уулзалт хийлээ.
Монгол Улсын Засгийн газрын 2024-2028 оны үйл ажиллагааны мөрийн хөтөлбөрт Бүсчилсэн хөгжил, хилийн боомтуудын бүтээн байгуулалт, эдийн засгийн хамтын ажиллагааны бүсийн үйл ажиллагааг эрчимжүүлэхээр тусгасныг Монгол Улсын Шадар сайд С.Амарсайхан онцлоод эдгээр асуудлыг хариуцаж ажиллах болсноо дуулгалаа.
Тэрбээр “Монгол Улсын Засгийн газраас “Монгол, Хятадын Замын-Үүд, Эрээний эдийн засгийн хамтын ажиллагааны бүс байгуулах тухай” хоёр улсын Засгийн газар хоорондын 2019 оны хэлэлцээрийн хэрэгжилтэд ихээхэн анхаарч байгаа. Учир нь энэ бол Монгол Улс, БНХАУ, ОХУ-ын хооронд худалдаа эдийн засгийн коридор байгуулах, транзит тээвэр хөгжүүлэх, экспортыг нэмэгдүүлэх, мөн Евро-Азийн орнуудтай хамтын ажиллагааг өргөжүүлэх, хил орчмын хамтын ажиллагааг шинэ түвшинд гаргах боломж юм.
Иймд Монгол Улсын Засгийн газраас Замын-Үүд, Эрээний эдийн засгийн хамтын ажиллагааны бүсийн дэд бүтцийн бүтээн байгуулалтад анхаарч, улсын төсвийн хөрөнгө оруулалт болон БНХАУ-ын 50 сая ам.долларын хөнгөлөлттэй зээлээр Дулааны станц, Ус цэвэршүүлэх үйлдвэр, цэвэрлэх байгууламж, авто зам, цахилгаан хангамж гэх мэт дэд бүтцийн бүтээн байгуулалтыг хийсэн. Мөн Азийн хөгжлийн банктай хамтран хэрэгжүүлж буй “Эдийн засгийн хамтын ажиллагааны бүс хөгжүүлэх төсөл”-ийн хүрээнд Замын-Үүд чөлөөт бүсийн бүтээн байгуулалтын ажлыг 2025 онд дуусгана” хэмээв.
Нэн түрүүнд Замын-Үүд, Эрээний эдийн засгийн Хамтын ажиллагааны бүсийн хамтарсан хөгжлийн ерөнхий төлөвлөгөөг эцэслэж хэрэгжилтийг хангахад анхаарах шаардлагатай байгаа бөгөөд улмаар Хоёр улсын хилийг огтлон гарах цэгийг тогтоож, чөлөөт бүсийг хооронд нь авто замаар холбох, мөн Дэд бүтцийн бүтээн байгуулалтыг эрчимжүүлж, ирэх ондоо багтаж хоёр талын эдийн засгийн хамтын ажиллагааны бүсийг нээхэд хоёр улсын Засгийн газраас анхаарч ажиллаж байгааг мөн хэллээ.
Энэ жил Монгол Улс, БНХАУ хооронд дипломат харилцаа тогтоосны 75 жил, Найрсаг харилцаа, хамтын ажиллагааны хэлэлцээр байгуулсны 30, Иж бүрэн стратегийн түншлэлийн харилцаанд хүрсний 10 жилийн ой тохиож байгаа учраас Хамтын ажиллагааны бүсийн бүтээн байгуулалтын ажил богино хугацаанд үр дүнтэй хэрэгжинэ гэдэгт бүрэн итгэлтэй байгаагаа талууд илэрхийлэв.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
