С.Амарсайхан: Монголын итгэмжлэлийн чадавхыг дэлхийн улс орнууд хүлээн зөвшөөрлөө

Төр.мн I www.tur.mn

2024-12-06

Монголын итгэмжлэлийн чадавхыг дэлхийн улсууд орнууд зөвшөөрсөн талаар Шадар сайд С.Амарсайхан өнөөдөр мэдээлэл хийлээ.

Тэрбээр “Шадар сайдаар томилогдсон цагаас эхлэн улсын хөгжлийн үндэс бол “Стандарт” хэмээн тодорхойлж, энэ чиглэлээр стандартыг бүх шатанд хэрэгжүүлж хэвшүүлэх, Стандартчилал, тохирлын үнэлгээний итгэмжлэлийн асуудлыг онцгойлон анхаарч, хариуцсан байгууллагуудын чадамжийг нэмэгдүүлэх, хууль, эрх зүйн орчныг сайжруулах чиглэлээр өнгөрсөн хугацаанд анхаарч ажилласан.

Ингэж ач холбогдол өгч байгаа шалтгаан нь итгэмжлэлээр дамжуулж дэлхийн улсууд хил дамнасан худалдаа, экспорт, импортыг ямар ч саадгүй зохицуулдаг. Харамсалтай нь манай улсын итгэмжлэлийн салбар олон улсын түвшинд хүрч, чадамжаа үнэлүүлж, бүрэн хүлээн зөвшөөрөгдөж чаддаггүй байсан. Шалтгаан нь хариуцсан байгууллагын үйл ажиллагаанд анхаардаггүй, орхигдуулсантай холбоотой.

Ази Номхон далайн Итгэмжлэлийн хамтын ажиллагааны байгууллага (APAC) дөрвөн жилд нэг удаа улс орнуудын Итгэмжлэлийн тогтолцоо, байгууллагын чадавх, үйл ажиллагаанд ижил түвшний үнэлгээ хийдэг. Уг байгууллагаас энэ оны тавдугаар сард манай улсын Итгэмжлэлийн байгууллагад ижил түвшний тус үнэлгээг хийсэн. Үнэлгээний ажлын хэсэгт Австрали, Шинэ Зеланд, БНХАУ, Канад улсын Итгэмжлэлийн байгууллагын төлөөлөл оролцсон. Ажлын хэсгийн үнэлгээний дүнг APAC-ийн Удирдах зөвлөл арваннэгдүгээр сарын 22-ний өдрийн хурлаар эцэслэн хэлэлцэж дэмжлээ. Тэрхүү хуралд нийт 61 улс оролцсоноос 55 нь буюу 90 хувийн саналаар манай улсын итгэмжлэлийн үнэлгээ дэмжигджээ.

Олон улсын итгэмжлэлийн хамтын ажиллагааны байгууллага (ILAC, IAF)-ын харилцан хүлээн зөвшөөрөх хэлэлцээрт (MRA, MLA) нэгдэж, чадамжаа хүлээн зөвшөөрүүлсэнээр Итгэмжлэгдсэн сорилт, хэмжил зүйн лаборатори, техникийн хяналт болон баталгаажуулалтын байгууллагын үр дүнг дэлхийн 140 гаруй улс Монгол Улсад үйлдвэрлэсэн бараа бүтээгдэхүүнийг олон улсын зах зээлд гаргахад дахин сорилт шинжилгээ хийхгүйгээр шууд хүлээн зөвшөөрнө гэсэн үг юм. Жишээ нь, бид хүнсний бүтээгдэхүүнээ БНХАУ-руу экспортлоход Монголын итгэмжлэгдсэн лабораторийн сорилт, шинжилгээний дүнг БНХАУ давтан сорилт шинжилгээ хийхгүй гэсэн үг. Ингэснээр бизнес эрхлэгчдэд хөрөнгө санхүүгийн болон цаг хугацааны хувьд маш том хэмнэлт гарна.

Итгэмжлэл нь худалдааны аливаа саад тотгорыг багасгах, худалдааг хөнгөвчлөх, тухайн бараа бүтээгдэхүүнд хэрэглэгчийн итгэх итгэлийг нэмэгдүүлэх зэрэг ихээхэн ач холбогдолтой. Нэг үгээр хэлбэл, итгэмжлэгдсэн л бол та бүрэн итгэж болно гэсэн үг. Цаашлаад итгэмжлэлээр дамжуулан стандартын хэрэгжилт сайжрах, ард иргэдийн эрүүл аюулгүй бараа бүтээгдэхүүн хэрэглэх нөхцөл бүрдэнэ.

Үүнээс гадна энэ онд багтааж Монгол Улсын итгэмжлэлийн хамрах хүрээг гураваас доошгүй чиглэлээр өргөжүүлэх, ирэх онд таваас доошгүй чиглэлээр хүрээгээ өргөтгөн Олон улсын итгэмжлэлийн байгууллагаар хүлээн зөвшөөрүүлэхийг Үндэсний Итгэмжлэлийн байгууллагад үүрэг болголоо. Түүэнчлэн олон улсад өргөн хэрэглэгдэж байгаа ногоон стандартуудыг нэвтрүүлэх чиглэлээр онцгойлон анхаарч ажиллах шаардлага байгаа. Улсын Шадар сайдын хувьд хил дамнасан худалдаа, үйлчилгээний асуудалд цаашид ч байнга анхаарч ажиллах болно” гэв.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.