Улсын эх дагина Ц.Дондовдуламын мэлмий гийсний 150 жилийн ой энэ жил тохиож байгаа. Үндэсний эрх чөлөө, тусгаар тогтнолоо сэргээсний баярын өдрийг жил бүрийн 12 дугаар сарын 29-ний өдөр бид улс даяараа тэмдэглэн өнгөрүүлдэг.
Гэхдээ энэ өдөр Эх дагина Ц.Дондовдулам хатны байгуулсан гавьяаг эрдэмтэн судлаач, музей, шашны байгууллагууд зэрэг хүрээнд, мэдэх хэсэгхэн хүмүүс л анхаарал хандуулж, ач холбогдол өгч ирсэн үү гэхээс ихэнх хүмүүс энэ талаар сайн мэддэггүй.
Өнөөдөр бид эвтэй байж, улс орноо гэсэн чин сэтгэлтэй, түүнээ харуулсан зөв шийдвэр, үйлдлийг эрхэмлэн хэрэгжүүлж байж л тэр эх оронч сэтгэлгээг хойчдоо хоногшуулж үлдээнэ. Үүний тулд өвөг дээдсийн төр, түмнээ удирдах ухаанаас өчүүхэн ч болтугай суралцах, туулсан замнал, хийсэн үйлийг санан бодож тунгаах л ёстой гэж багш хүнийхээ болон уран бүтээлч хүний хувьд боддог.
Тиймээс Улсын эх дагина Ц.Дондовдулам хатны үйлсийг таниулах санал санаачилгад бид уран бүтээлээр нэгдэх, үүнд манай эмэгтэй мэргэжлийн бүжигчдийн “Эрхэмсэг” хамтлаг мөн 15 жилийн ойгоо угтан оролцож бүжгэн тахил өргөх саналыг Зүүн хүрээ Дашчойлин хийд, тус хамтлагийнханд хүргэсэн. “Эрхэмсэг” хамтлаг бол Монголынхоо их хатдын цэцэн ухаан, эр зориг, гоо сайхан, баатарлаг гавьяаг Их театрынхаа уран бүтээлээр дамжуулан сэтгэлд хүргэсэн, мөн их эрэл хайгуул хийж ажилладаг онцлогтой мэргэжлийн чадварлаг бүжигчдийн хамтлаг.
Тоглолтын маркетингаа Эрхэмсэгийнхэн өөрсдөө хариуцаж байгаа. Харин бидний хувьд шашны талаарх оролцоо болон маш сайхан орчныг мэдрүүлэхэд хамтран ажиллана. Нэмж хэлэхэд бид Гэрэлт зул хөгжмийн тоглолт /candle concert project/ төслийг энэхүү бүжгэн тахилын нэгэн эд эс болгон эхлүүлж байгаа юм. Хүмүүст маш гоё мэдрэмжийг өгдөг энэ тоглолтууд гадаадад cүм, түүхэн дурсгалт газруудад зохион байгуулагддаг онцлогтой. Бид монгол үзэгчдэдээ болон гадны жуулчдад зориулж энэ төслийг хэрэгжүүлнэ, мөн бусад улс орны энэ тоглолтод нь оролцох ажлыг төлөвлөн ажиллаж байна. Гадаадад амжилттай ажиллаж уран бүтээлээ хүргэж байгаа уран бүтээлчдээс ч монголдоо хийх тоглолтод минь ирж оролцохоо илэрхийлсэн гээд бидэнд цаашид хийх ажил их байна даа.
Энэ цаг мөчид шинэ жил гээд хүн бүр л сэтгэл нь догдолж, амьдралынхаа сайхан дурсамжтай өдрүүдийг үлдээхийг хүсэж байгаа байх. Оюун санаа, мэдрэмжийг цогцлоосон “Эрхэмсэг оршихуй” бүжгэн тахил өргөх тоглолтын ард шилдэг хөгжмийн зохиолчид, бүжиг дэглээчид, дуу, гэрэл, тайзны мэргэжлийн хүмүүс дэмжин хамтран оролцож байгаа. Энэ үдэш ердөө л 100-аад хүн л оролцох боломжтой тул та бүхэн энэ боломжийг бүү алдаарай, тасалбараа тус хамтлагтай холбогдож аваарай.
Дашрамд дурдахад бид Монголынхоо соёлын өв, түүхэн уламжлалыг хамгаалах, сурталчлан таниулах үйл ажиллагааг 20 гаруй жил хэрэгжүүлж байгаа туршлага дээрээ тулгуурлан өвөг дээдсээс уламжлагдан ирсэн бурхны шашны сургаал ном, ард түмний билэг авьяас, эрдэм ухаан, уламжлалт зан үйл, арга барил, урлаг, шинжлэх ухааны ач холбогдол бүхий соёлын үнэт зүйлийг түгээн дэлгэрүүлэх, соёлын аялал жуулчлалын бүтээгдэхүүн үйлчилгээг дотоод, гадаадын иргэд, жуулчдад хүргэх, нийгэмд ёс суртахууны эерэг хандлагыг бий болгоход хувь нэмэр оруулах зорилгоор Зүүн хүрээ Дашчойлин хийдтэйгээ хамтран ажилладаг. Соёлын өвийг хамгаалах, түгээх танин мэдэхүйн сургалтаас гадна “Эхийн ачийг санахуй” шашин, урлагийн тоглолтыг 3 жил дараалан тус хийд оронд зохион байгуулсан нь олон сайхан хүмүүсээс урмын үг хүртэж, үүндээ хичээж ажиллаж байна.
Бямбасүрэнгийн Баасансүрэн
“Этүгэн” уран бүтээлийн нэгдлийн ахлагч,
МУК-ийн багш, урлаг судлалын докторант, “Бодь мөрийн жим” ТББ-ын гишүүн
Like
0
Зөв
0
0
Буруу
0
Воов
0
Уйтгартай
2
Дуртай
© 2013-2023. Вэб сайт бүтээсэн: Tsast Solution LLC
