Сонгинохайрхан дүүргийн иргэд өөрт ойр хорооны байрнаасаа төрийн үйлчилгээг авах боломж бүрдлээ

Нийслэл

Сонгинохайрхан дүүргийн иргэд өөрт ойр хорооны байрнаасаа төрийн үйлчилгээг авах боломж бүрдлээ

Б.Шүрэнцэцэг I Төр.мн

2025-01-21

УИХ-ын гишүүн Э.Батшугар Сонгинохайрхан дүүргийн бүх хороонд "ХУРДАН" цэг, киоск төхөөрөмж, иж бүрэн компьютер, хурууны хээ уншигч гардуулан өглөө.

Ингэснээр нийслэлийн хүн ам олонтой томоохон дүүрэг болох Сонгинохайрхан дүүргийн нийт 43 хороонд төрийн цахим үйлчилгээний “ХУРДАН” цэгийн үйлчилгээг нэвтрүүлж партизан, эмээлт, найрамдал, орбит, тахилт гэх мэт төвөөс алслагдсан хороодын иргэд төрийн үйлчилгээг хорооны байрнаасаа авах боломж бүрдлээ.

“ХУРДАН” цэг байгуулагдсанаар иргэд төрийн 451 төрлийн үйлчилгээг нэг дороос, цаг алдахгүй, хүндрэл чирэгдэлгүй, харьяалал харгалзахгүй авах боломжтой болж байгаа юм.

УИХ-ын гишүүн Э.Батшугар Инновац, цахим бодлогын байнгын хорооны даргаар ажиллаж байх үедээ цахим шилжилтийг эрчимжүүлэх ажлын хүрээнд 109 хуульд нэмэлт өөрчлөлт оруулан батлуулсан. Мөн УИХ-ын тогтоол гарч төрийн цахим үйлчилгээг хүн, хуулийн этгээдэд операторын горимоор хүргэх цэгийг аймаг, сум, нийслэл, дүүрэг, хороонд байгуулахаар болсон. Монгол Улсад Төрийн цахим үйлчилгээг гар утасны e-mongolia аппликейшн, портал сайт, операторын горим “ХУРДАН” цэг, киоск машин, хөдөлгөөнт “ХУРДАН” цэг, 24/7 цагийн өөртөө үйлчлэх цэг зэргээр хүргэж байна.

Тус цэг нь нийслэлд 6 дүүргийн 108 цэг, 21 аймгийн 295 цэг, хилийн чанадад 31 улсад 47 цэг, Монгол шуудан ХК, цахилгаан холбоо ХК-ийн байр зэргээр нийт 486 цэгээр иргэдэд төрийн цахим үйлчилгээг хүргэж байгаа бөгөөд нийслэлд 297,584 үйлчилгээ, орон нутагт 679,968 үйлчилгээ, хилийн чанад 9,019 үйлчилгээ, Монгол шуудан ХК-ын салбарууд 24,207 үйлчилгээ, Монголын цахилгаан холбоо ХК-ын салбарууд 21,861 үйлчилгээ буюу нийт 1,041,945 үйлчилгээг иргэдэд үзүүлсэн байна.

Мөн төрийн цахим үйлчилгээг хүн, хуулийн этгээд 250 киоск машинаар улсын хэмжээнд нийт 105 үйлчилгээг авах боломжийг бүрдүүлсэн. Ингэснээр цахим баримт бичгийг цаасан баримт бичигтэй ижил түвшинд хүлээн зөвшөөрч иргэдийг төрийн байгууллагууд хооронд олон дахин явуулдаг хүнд суртал учруулдаг байдлыг зогсоох боломж бүрдсэн.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.