Г.Монголжингоо: “POP UP ALTAI-2” арга хэмжээгээр шинэ уран бүтээлч гаргаж ирэх зорилготой

Админ I Төр.мн

2025-05-07

Говь-Алтай аймгийн залуучуудын анхны чөлөөт холбоо болох “Ирээдүй-Алтай” холбооны бодлогын хорооны гишүүн, “Pop up Altai-2” арга хэмжээний ажлын хэсгийн ахлагч Г.Монголжингоогоос тодрууллаа.

“Pop Up Altai” ковер дууны үдэшлэгт хоёрдох удаагаа болох гэж байгаа юм байна. Энэ талаар яриагаа эхэлбэл?

Тиймээ сайн байцгаана уу? авьяаслаг, эрч хүчтэй Алтайн залуус аа!
“Ирээдүй-Алтай” холбооныхоо олон бүтээлч ажлуудын нэг болох “POP UP ALTAI” арга хэмжээг хоёр дахь жилдээ зохион байгуулж, ажлын хэсгийг нь ахлан ажиллаж байна. Уг арга хэмжээ бол Алтай нутгийн залуусын авьяас чадвар, зүрх сэтгэл, эрч хүчийг нэгэн тайзан дээр гарган урлагийн чөлөөт орчныг бүрдүүлдэг онцгой үдэш гэж хэлж болно.

Бид өнгөрсөн жил зохион байгуулахдаа олон залуу авьяастнуудыг илрүүлж, тэдний дуу хоолойг олон нийтэд хүргэсэн. Энэ жил илүү өргөн хүрээтэй, оролцогч залуусын ур чадварыг бодитойгоор дэмжин ажиллахаар зорьж байна. Зөвхөн дуулж байгаа авьяас төдийгүй, өөрийгөө илэрхийлэх, зориг гаргах, өөртэйгөө өрсөлдөх боломжийг олгож байгаа юм.

“Pop up Altai” ковер дууны үдэш шилдэг оролцогчийг шалгаруулж шинэ уран бүтээл хийхэд дэмжлэг үзүүлнэ гэж байсан энэ талаар?

Алтай нутаг бол авьяастнуудын өлгий нутаг, тэр утгаараа алд суу нь түгсэн олон бахархалт хүмүүстэй бидний өмнө үлгэрлэж ирсэн. Тэдгээр алдартнуудын асаасан амжилтын бамбарыг үргэлжлүүлэн буухиалах шинэ уран бүтээлчийг гарган ирж бодитоор дэмжинэ. Бодитоор гэдэг нь шинэ уран бүтээл хийхэд дэмжлэг үзүүлэх, бүх талын менежмент хийнэ гэсэн үг юм. Ингэснээр алдартнуудын цуваа тасралтгүй буухиална гэж харж байгаа.

Магадгүй өнөөдрийн тайзан дээр гарч байгаа тэр авьяастан ирээдүйн Монголын нэрт уран бүтээлч, урлагийн од байж ч мэднэ. Тийм ч учраас энэ арга хэмжээ
“Ирээдүйн урлагийн тод од — Ирээдүй Алтайгаас” уриан дор зохион байгуулагдаж байна.

Танд баярлалаа залууст хандаж уриалах зүйл байвал?
Хэрвээ та Алтай нутгийн залуу бол энэ бол таны тайз! Хэрвээ та үзэгч бол, ирээдүйн ододтой нэгэн үдшийг дурсамж болгон өнгөрүүлэх азтай зочин. Та бүхнийг “POP UP ALTAI-2” арга хэмжээнд халуун дотноор урьж байна!

Нийт сэтгэгдэл 2

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.