Замын-Үүд-Эрээн чиглэлийн хөдөлгөөнийг тодорхойгүй хугацаагаар хаах болсон талаар бид мэдээлж байсан. Тэгвэл уг асуудлын хүрээнд БНХАУ-ын Өвөр Монголын ӨЗО-ы Эрээн хотод Ковид-19 цар тахлын халдварын нэг тохиолдол бүртгэгдсэнтэй холбоотойгоор Эрээн болон манай улсын Замын-Үүд хоорондын хилийн боомт тодорхойгүй хугацаагаар хаасан байна. Эрээн хотод бүх нийтийг Коронавирусийн PCR шинжилгээнд хамруулах ажил энэ сарын 14-ны өдрөөс хэлсэн талаар Хятадын төрийн төв хэвлэл мэдээллийн хэрэгсэл “Синьхуа” агентлаг мэдээлжээ.
Тухайлбал, энэ долоо хоногийн мягмар гарагт тээвэр логистикийн паркийн ажилтнуудаас ээлжит шинжилгээг авахад нэг хүнээс халдвар илэрсэн юм. Эрээн хотын цар тахлаас урьдчилан сэргийлэх, тахал өвчнийг хянах газрын мэдэгдсэнээр, тус паркийн хаалттай бүсэд ажиллаж байсан бусад 31 ажилтны шинжилгээний хариу сөрөг гарсан байна.
Халдвартай нэг хүнийг эмнэлэгт хэвтүүлэн эмчилж байгаа аж. Тус хотод тархвар судлал болон холбогдох газруудыг халдваргүйжүүлэх ажил хийгдсээр байна. Халдвар авсан нь тогтоогдоод буй нэг хүнтэй харьцсан бүх хүнийг тусгаарлан ажиглаж байгаа гэнэ. Халдвар илэрсэнтэй холбогдуулан тус хотын төрийн албаны бүх агентлаг болон аж ахуйн нэгжүүд, сургууль цэцэрлэгийн үйл ажиллагааг бүрэн зогсоожээ. Одоогоор тус хотод зөвхөн ус, цахилгаан, шатахуун, халаалт, харилцаа холбоо гэх мэт өдөр тутмын хэрэгцээ хангамж хариуцсан газрууд л ажиллаж байгаа аж. Эрээн хот нь Хятад болон Монгол хоорондын хилийн хамгийн том боомт билээ.
Like
0
Зөв
0
1
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
