Зэвсэгт хүчний 014 дүгээр ангиас 2021 оны намар хугацаат цэргийн албанд татагдан ирсэн дайчид руу чиглэсэн соёл хүмүүжлийн ажил, арга хэмжээ төлөвлөгөөний дагуу амжилттай зохион байгуулж байна. Тухайлбал, энэ сарын 13-ны өдөр шинэ дайчдад “Цэргийн алба хаахын ач тус", "Монгол цэргийн бахархал" сэдвээр бэлтгэл хурандаа С.Энхтайван багшаар яриа танилцуулга хийлгэлээ. Тэрээр өөрийн алба хааж байсан дурсамжаа дэлгэж, үргэлжлүүлэн сайн цэрэг байхын тулд хэрхэн суралцах, цэргийн албанаас амьдралын олон арга ухааныг олж мэддэг тухай, цэргийн нөхөрлөлийн үнэ цэн гээд олон чухал асуудлыг хөндөж, яриа өрнүүллээ.
Үүний дараа бэлтгэл хурандаа С.Энхтайван тус ангийн Сургалтын төвийн офицер, ахлагч нарт “Цэргийн сэтгэл зүйн тогтвортой байдал", "Цэргийн алба хаагчидтай ажиллах арга барил"-ын талаарх ярилцлагыг үргэлжлүүлэн хийв. Ахмад багш ярихдаа "Хувь хүн өөрөө өөрийнхөө сэтгэл зүйн тогтвортой байдлыг хангах нь хамгийн чухал юм. Цэргийн алба хаагчдын сэтгэл зүйн тогтвортой байдал нь ангийн хашаанаас эхлэхгүй. Таны гэр бүлийн харилцаанаас эхэлнэ. Энэ цаг үед бие бялдрын бэлтгэлжилтээс гадна сэтгэл зүйн бэлтгэлжилт Зэвсэгт хүчинд маань маш их чухал байна. Урам зоригтой, эрч хүчтэй, албандаа дэндүү хайртай, хамт олондоо элэгтэй тийм алба хаагчийг ангийн хашаагаар дүүрэн болгохын төлөө даргаасаа цэрэг хүртлээ өөрсдөө хичээх хэрэгтэй” хэмээн дэлгэрэнгүй ярьсан юм. Сургалтын төгсгөлд ангийн захирагч, хурандаа Г.Эрдэнэбаатар бэлтгэл хурандаа С.Энхтайванд хугацаат албаны дайчид болон офицер, ахлагч нарт олон чухал сэдвээр яриа өрнүүлсэнд талархсанаа илэрхийлсэн юм.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
