Д.Амарбаясгалан: Монгол Улс хүний эрхийг хууль, эрх зүйн орчинд бүрэн хамгаалж чадсан улс болох том амбийцтайгаар зүтгэх болно

Улс төрийн намууд

0
1583

Д.Амарбаясгалан: Монгол Улс хүний эрхийг хууль, эрх зүйн орчинд бүрэн хамгаалж чадсан улс болох том амбийцтайгаар зүтгэх болно

Т.Төгөлдөр

2021-11-27

МАН ирэх сарын 6-нд болох 30 дугаар Их хурлаараа хүний эрхийн асуудлыг онцгойлон авч хэлэлцэхээр болжээ. Улмаар энэ чиглэлээр томоохон бодлого боловсруулан ажиллахаар болсноо зарлалаа.

Энэ талаарх мэдээллийг өчигдөр МАН-ын ерөнхий нарийн бичгийн дарга Д.Амарбаясгалан олон нийтэд өгсөн бөгөөд эрх баригч нам хүний эрхтэй холбоотой асуудлаас тойрч зугтдаг биш нүүр тулж, шийдэх чиглэлд тууштай ажиллах болно гэдгийг онцолсон юм.

Тийм ч учраас бусад улс төрийн намуудад энэ чиглэлээр тусгайлсан бодлого боловсруулан ажиллахыг эрх баригч намынхаа хувьд уриалав. Тэрбээр “Эрх баригч нам хүний эрхийн зөрчлөөс тойрч гардаг байсныг МАН болиулна. Монгол Улс цаашид дэлхийд хүний эрхийг хууль, эрх зүйн орчинд бүрэн хамгаалж чадсан улс гэж цоллогдох боломжийн төлөө бид том амбийцтайгаар зүтгэх болно. Энэ бодлогын үндсэн дээр цаашдаа улс төрийн намууд эмнэлэг, цэцэрлэг барихын төлөө өрсөлддөг биш Монгол дахь хүний эрхийн орчин нөхцөлийг сайжруулах, авлига хүнд суртал, хээл хахуультай холбоотой асуудалтай хэрхэн тэмцэх тухайд бодлого гарган өрсөлддөг байхын эхлэл суурийг МАН тавьж байна. 2004 оныг эс тооцвол МАН сүүлийн 30 жилийн хугацаанд парламентын сонгуульд үнэмлэхүй ялалт байгууллаа. МАН социал демократ үзэл баримтлалтай улс төрийн хүчний хувьд, нийгмийн дундаж давхаргыг дэмжсэн үндсэн хөтөлбөртэй улс төрийн намын хувьд хоёр удаагийн парламентын сонгуульд 65, 62 суудалтайгаар ялалт байгуулсан нь ард иргэдээс бидэнд хүлээлгэж буй том хариуцлага гэж бид үзэж байна.

Аль нам засгийн эрх барьж байгаагаас үл хамаараад өнөөдөр Монголын нийгмийн хүндрэл болсон авлига, албан тушаалын гэмт хэрэг, хүнд суртал, хариуцлагагүй байдалтай эрх баригч нам тууштай тэмцэнэ.

Манай нам засгийн эрх барьж буй цаг хугацаандаа төрд сонгогдож, томилогдож ажиллаж байгаа төрийн албан тушаалтнуудаар дамжуулан эдгээр асуудалтай тууштай тэмцэх бодлого, хөтөлбөрийг гаргахыг зорин ажиллаж байна. Тийм учраас намын 30 дугаар Их хурлаар хэлэлцэх асуудлын цөм нь хүний эрхтэй холбоотой байх болно” гэсэн юм.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.