Монгол Улсын Ерөнхийлөгчийн Тамгын газар, Улсын Их Хурлын Тамгын газар хамтран “Улс төрийн намын эрх зүйн шинэтгэл” сэдэвт хэлэлцүүлгийг Төрийн ордонд зохион байгуулж байна.
Хэлэлцүүлгийг Улсын Их Хурлын дарга Г.Занданшатар, Улс төрийн намын тухай хуулийн шинэчилсэн найруулгын төсөл боловсруулах Ажлын хэсгийн ахлагч, Ерөнхийлөгчийн Тамгын газрын дарга Я.Содбаатар нар нээлээ.
Төрийн тэргүүн улс төрийн намын шинэтгэлийг цогцоор нь, Монгол Улсын хөгжлийн урт хугацааны бодлогод тулгуурлан хийх ёстой гэсэн байр суурьтай байна.
Ерөнхийлөгч мөрийн хөтөлбөртөө улс төрийн намуудын шинэчлэлийг гүнзгийрүүлж, ёс зүй, сахилга хариуцлагыг дээшлүүлэн, санхүүжилтийг нь шилэн болгохтой холбоотой хуулийн төсөл санаачлахаар тусгасныг Тамгын газрын дарга Я.Содбаатар хэлэв.
Энэ хүрээнд нам дэвшилтэт бодлого хэрэгжүүлэх, санхүүжилт нь ил тод байх, түүнд тавих хяналтыг боловсронгуй болгох, нам зохион байгуулалтын хувьд ардчилсан зарчимд нийцсэн, асуудлаа ширээний ард сууж ярилцдаг эрх зүйн орчин бүрдүүлэхийг эрмэлзэж байгааг тодотголоо.
Улсын Их Хурлын гишүүн Ц.Мөнхцэцэг “Улс төрийн намын эрх зүйн шинэтгэл”, Монгол Улсын Боловсролын их сургуулийн багш, судлаач, доктор Э.Гэрэлт-Од “Монгол дахь улс төрийн намын төлөвшлийн асуудлууд”, “Нээлттэй нийгэм” форумын судлаач, Засаглалын хөтөлбөрийн менежер Д.Энхцэцэг “Улс төрийн намын санхүүжилт” сэдвээр илтгэл тавьж, хэлэлцүүлэг өрнүүлэх юм.
Хэлэлцүүлэгт Улсын Их Хуралд суудалтай болон Улсын Дээд шүүхэд бүртгэлтэй, үйл ажиллагаа явуулдаг намуудын төлөөлөл оролцож байна.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
