Барилга, хот байгуулалтын дэд сайд Э.Золбоо барилгын материалын татан авалт, цементийн үнийн өсөлттэй холбоотой авч хэрэгжүүлж байгаа бодлого арга хэмжээний талаар сэтгүүлчдэд мэдээлэл өглөө.
Тэрбээр Бүтээн байгуулалтын улирал эхэлж байгаа энэ үед яамны зүгээс тодорхой бодлого зохицуулалтыг хийж байна. Тухайлбал Арматур чингэлэг тээвэрт багтахгүй учир задгай вагоноор оруулж ирэхээр боллоо.
БНХАУ-аас оруулж ирэх ачаа тээврийн 1000 вагоны квотоос 410 вагон ачааг энэ гуравдугаар сард оруулж ирэхээр болоод эхнээс нь татаж байна. 410 вагон ачаанаас 350 вагонд арматур татах юм бол 20 мянган тонн арматур орж ирнэ. Одоогоор 80 мянган тонн арматурын нөөц бий. Үүн дээр ОХУ-аас 30 орчим мянган тонн арматур оруулж ирэхээр нийт 130 мянган тонн арматурын нөөц бүрдэж байгаа юм. Манай улсын хэрэглээ 250 мянган тонн гэхээр хэрэглээнийхээ 50 гаруй хувийг бүрдүүлчихэж байна. Цаашдаа 4,5 дугаар сард дахин татан авалтууд хийхээр энэ оны бүтээн байгуулалтын арматур болон цемент дээр хомсдол үүсэхгүй гэж тооцож байна.
Бид цар тахлын үед амьдарч байна, өмнөд хөршийн хувьд цар тахлын улмаас хилийн нөхцөл байдал нь яаж ч өөрчлөгдөж магадгүй, хойд хөршийн хувьд дайнтай байгаа. Ингэхээр маргааш нөгөөдөр юу болохыг таахад хэцүү. Гэсэн ч салбар яам бэлтгэл ажлыг боломжоороо хангаж байна. Цементийн хувьд хомсдол гарахгүй ч үйлдвэрлэгч нар өнгөрсөн долоо хоногт үнээ өсгөсөн. Тухайлбал, нийт дөрвөн үйлдвэр 16-28 хувиар үнийг өсгөсөн үзүүлэлттэй байна. Энэ өсөлт бодит эсэхийг яаралтай шалгаж тогтоохоор ажлын хэсэг байгуулж, ШӨХТГ-т чиглэл өгсөн байгаа. БНХАУ-д цемент яг адилхан үнэтэй байгаа. Тонн нь 550-750 юаны хооронд хэлбэлзэж байгаа. Дээрээс нь гааль, татвар нэмэгдэнэ. Тэгэхээр бид цаашдаа цементээ дотоодоосоо ашиглаж үндэсний үйлдвэрээ дэмжих ёстой.
Бид цементийн үйлдвэрүүдийн төлөөлөлтэй уулзахад тэдний зүгээс өнгөрсөн онд цементийн үнийг огт нэмээгүй, алдагдалтай ажилласан. Тиймээс 2022 оны бүтээн байгуулалтад оролцохын тулд тодорхой хэмжээнд үнэ өсгөхөөс өөр аргагүйд хүрсэн гэх байр суурийг илэрхийлсэн.
Цементийн үнийн өсөлтийн асуудлаар шадар сайд С.Амарсайхан хоёр чиглэлийн үүрэг өгсөн. Нэгдүгээрт ШӨХТГ үнийн өсөлт бодит эсэхийг шалгаж тогтоох, БХБЯ цемент үйлдвэрлэгч нартай уулзаж, яаж хамтарч ажиллаж, цементийн үнийг буулгах вэ гэдэг санал боловсруулах, үнэ буулгах чиглэлээр төрийн зүгээс ямар дэмжлэг үзүүлж болох талаар гарц гаргалгаа хийх хугацаатай үүрэг өгсөн хэмээн цаг үеийн асуудлаар мэдээлэл өглөө.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
