БАРИМТ: Яармаг дахь орон сууцны хорооллын санхүүжилтийг Засгийн газрын ТОГТООЛГҮЙ, УИХ-аар БАТЛУУЛАЛГҮЙ гаргажээ

Төр.мн I Сэтгүүлч

2022-03-31

“Шинэ яармаг” орон сууцны цогцолбор хороолол барих төсөл нь Монгол Улсын Их хурлаас баталсан. Эл төсөл нь “Шинэ бүтээн байгуулалт” дунд хугацааны зорилтот хөтөлбөр болон Монгол Улсын Засгийн газраас хэрэгжүүлсэн “100 мянган айлын орон сууц” хөтөлбөрт хамрагддаг бөгөөд төслийн хэрэгжүүлэгч нь “Юнайтэд Прожект Групп” ХХК юм. Тус компани 2015 оны 7 дүгээр сарын 30-ны өдөр ТОСК ТӨҮГ-тэй “Шинэ Яармаг” орон сууцны хороолол барих төслийг хэрэгжүүлэх хөрөнгө оруулалт, санхүүжилт хийж хамтран ажиллах гэрээ байгуулан, төслийн гүйцэтгэгчээр нь Юнайтэд Прожект Групп ХХК-ийн 100 хувийн хөрөнгө оруулалттай охин компани болох Нью Яармаг Хаусинг Прожект ХХК-ийг ажиллуулахаар тохирсон

Нью Яармаг Хаусинг Прожект ХХК нь LOT 1, 2, 3 гэсэн үе шаттай нийт 230 сая ам.долларын төсөвт өртөгтэй орон сууцны барилгын төсөл хэрэгжүүлсэн. Нийт санхүүжүүлэлтийн 85 хувийг Хятад улсын Экспорт Импорт банкнаас зээл авч санхүүжүүлэх төлөвлөгөөтэй бөгөөд Монгол Улсын Засгийн Газрын дээрх зээлд Хөгжлийн банкаар дамжуулан 50 сая.ам.долларын зээл олгосон байна.

Засгийн газар 2011 оны 8 дугаар сарын 17-ны өдрийн 246 дугаар тогтоолоор Нью Яармаг Хаусинг Прожект ХХК-ийн Хятадын EXIM банкнаас авч буй зээлд 300 тэрбум төгрөгтэй тэнцэх дүн бүхий 12 жилийн хугацаатай баталгаа гаргахыг Хөгжлийн банкинд үүрэг болгосон аж. Дээрх тогтоолыг үндэслэн Хөгжлийн банкны зээлийн хороо 2011 оны 11 дүгээр сарын 24-ний өдөр нийт санхүүжилтийн 85 хувьтай тэнцэх 195,8 сая долларыг 21 жилийн хугацаатай баталгаа гаргахаар шийдвэр гарган, ТУЗ уг шийдвэрийг үндэслэн 300 тэрбум төгрөгийн баталгааг гаргахаар шийдвэрлэж 2/261 дугаартай албан бичгээр Хятад улсын EXIM банкинд 195,8 сая долларын баталгааг гаргасан байдаг.

Гэтэл Хятадын EXIM банк болон Шинэ Яармаг Хаусинг Прожект ХХК-ийн хооронд байгуулсан зээлийн гэрээ нь 2012 оны 4 дүгээр сарын 20-ны өдрийн он сартай буюу баталгаа гарснаас хойш зурагдсан байна. Хөгжлийн банкны ТУЗ-ийн 2011 оны 12 дугаар сарын 16-ны өдрийн 26 дугаар тогтоолоор дээрх баталгааг хүчингүй болгох шийдвэр гарган тус банкинд 2011 оны 12 дугаар сарын 23-ны өдрийн 1/305 тоот албан бичгээр мэдэгдсэн. Үүний дараа хөгжлийн банкны дээрх баталгааны асуудлыг дахин хэлэлцэж 2012 оны 9 дүгээр сарын 12-ны өдрийн 023 тоот зээлийн хорооны хурлаар Шинэ яармаг төслийн LOT нэгийн санхүүжилт болох 83,8 сая ам.долларын зээлд 6 жилийн хугацаатай баталгаа гаргахаар шийдвэрлэсэн. Үүнийг ТУЗ хэлэлцэж 2012 оны 9 дүгээр сарын 13-ны өдрийн 43 тоот тушаалаар шийдвэрлэн 2012 оны 9 дүгээр сарын 13-ны өдрийн 1/488 албан бичгээр 83.881.157.75 ам.долларын батлагааг хүргүүлсэн байна. Гэтэл үүнээс хойш уг баталгаа нь хэрэгжээгүй бөгөөд Нью Яармаг Хаусинг Прожект ХХК-ийн 2016 оны 7 дугаар сарын 05-ны өдрийн 1/169 дугаар албан бичгээр зээлдэгч банк нь Голомт банкаар дамжуулан зээлийг олгох тухай мэдэгджээ.

Энэ нь Хөгжлийн банкны гаргасан баталгааны нөхцлийг буюу зээлдэгчийг өөрчилж байгаа тул хөгжлийн банк 2016 оны 8 дугаар сарын 10-ны өдрийн 6/867 дугаар албан бичгээр баталгааны нөхцөлд гарсан өөрчлөлттэй холбоотой судалгаа шинжилгээ хийх шаардлагатай байгааг мэдэгдэн хариу хүргүүлсэн байна. Өөрөөр хэлбэл Хөгжлийн банк Хятад улсын Экспорт Импорт банкинд гаргасан баталгаагаа Голомт банкинд гаргах нөхцөл үүссэн нь Засгийн Газрын холбогдох тогтоолд нийцэхгүй байгаа юм.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.