Эзэнгүй ТӨР, эмх замбараагүй үйлдлүүд

Админ I Төр.мн

2022-04-07

У.Хүрэлсүхийн засгийн газар огцорч, Л.Оюун-Эрдэнийн засгийн газар ноёрхсон 2022 он.

Монгол улсад болж бүтэж байгаа зүйл алга. Хөгжлийн банкны луйвар, түүнийг тойрсон сайд дарга нарын асуудал, амьжиргаагаа залгуулж яваа ядруухан ард иргэд. Иргэд Хөгжлийн банкны зээлээс илүүтэй өнөөдрийн өдрийн хоол, өр зээлний асуудалд дарамтлуулсан.

Мянга орилж чарлаж, зовлонгоо ярихад ТӨР тэднийг сонсдог гэж үү. Замбараагүй үйлдлүүд ар араасаа гарахад үр дүнд нь иргэд л шоронд хоригддог олон арван жишээ бий.

Энэ бүхэнд иргэд буруутай юу, төр буруутай юу, Нэг өдөр ч сайхан үйл явдал сайн мэдээ гарахаа байлаа. Энэ нь нийгэм доройтож бид ядуурч байгаагийн шинж биз.

Тодруулбал, зөвхөн өнөөдөр буюу 2022 оны 04-р сарын 07-ны өдөр болсон үйл явдлуудаас тоймлон дурдъя.

Төрийн ордонд эдийн засгийн чуулган болж, Ерөнхийлөгч, Ерөнхий сайдаас эхлээд өөдрөг төсөөлөл ярьж байхад ордны гадна талд олон зуун залуус үнийн хөөрөгдөл, ажилгүйдэл, цалин хөлс, амьжиргааны талаар үзэл бодлоо илэрхийлэн "Амьдрах арга алга", "Юмны үнэ арай л өссөн байна" “Ажлаа хий” хэмээн тайван жагсаал хийсээр гурав дахь хоног руу орлоо. Тэднийг төр даана ч тоосонгүй ордон дотроо том том юм ярих суух нь хэвийн үзэгдэл боллоо.

Мөн МАН-ын сөрөг хүчин гэгдэх АН-ын ээлжит бус хуралдаан болж “UB pаlace”-ийн концертын их танхимд ойрын хэдэн жилдээ хараагүй зритлээр дүүрсэн Ардчилсан намын 3000 гаруй гишүүд Х.Баттулгыг даргаар батламжилсны гэрч болсон бол Х.Баттулгыг иргэд луйврын эзэн хэмээн өргөмжлөн жагсаж байх юм.

Дарга нарыг бид гаргаж алга ташиж баталчхаад, эргээд муулах үзэгдэл Монголд мөн л газар авсаар.

Энд бас хэн буруутай вэ? Сонгож гаргасан иргэд үү? Сонгогдож гарсан дарга нар уу?

Цаашилбал булан тойроод БШУ-ны яамны гадаа Дархан-Уул аймгийн сургуулийн сэтгэл зүйч, Н.Болорцэцэг хүүхдэд гар хүрч хүч хэрэглэдэг байдлыг эсэргүүцэж байгааг илэрхийлэн үсээ хуслаа. Энэ мэтчилэн үйл явдалд Төр засаг хариу өгдөг үү, тоодог уу? Өдрөөс өдөрт ихсэж эмх замбараагүй байдал үүсвэл хэн хариуцлага хүлээх вэ? Эзэнгүй төрийн замбараагүй үйлдлүүд үргэлжилсээр байх уу?

Сүхбаатарын талбай тойрон ард иргэд үзэл бодлоо илэрхийлж байгаа дүр зургууд өдрөөс өдөрт нэмэгдсээр.

Аз жаргал, инээд баясалтай Сүхбаатарын талбайд ард түмэн уулздаг бол одоо хэн бүхний стрессийг тайлдаг газар болжээ. Эзэнгүй төрийн эмх замбараагүй үйлдлүүдэд хэн хариуцлага хүлээх вэ?

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.