“Эрдэнэт үйлдвэр” ТӨҮГ-ыг 2031 он хүртэл хугацаанд хөгжүүлэх үндсэн чиглэлийн 2022-2026 оны дунд хугацааны стратегийн төлөвлөгөөний төслийн танилцуулга-хэлэлцүүлэг өнөөдөр “Оюу” танхимд боллоо. Дунд хугацааны стратеги төлөвлөгөөний төслийг Олон улсын чиг хандлага болсон тогтвортой хөгжлийн зорилтууд, Монгол Улсын хөгжлийн бодлогын үзэл баримтлалууд, Эрдэнэт үйлдвэрийг 2031 он хүртэл хугацаанд хөгжүүлэх үндсэн чиглэл, алсын хараа, эрхэм зорилго, үнэт зүйлс, тогтвортой хөгжлийн цогц бодлоготой уялдуулан стратегийн үндсэн чиглэл болон тэнцвэржүүлсэн үнэлгээний аргаар боловсруулсан байна. Тэргүүлэх чиглэлээ Аюулгүй, хариуцлагатай, ашигтай үйлдвэрлэл эрхлэх, Судалгаа, хөгжлийн ажлыг дэмжих, Хамтын үнэ цэнийг бүтээх, Үйлдвэрийн газрын засаглалыг сайжруулах хэмээн тодорхойлжээ. Эрдэнэт үйлдвэр нь олон улсын түвшинд хүлээн зөвшөөрөгдсөн, жишиг болохуйц стандарт бүхий үйл ажиллагаатай, Монгол Улсын хөгжилд бодитой хувь нэмэр оруулдаг, үлгэр жишээ засаглал бүхий үйлдвэрийн газар байх алсын хараатай. Харин эрхэм зорилгоо нийгэм, эдийн засаг, байгаль орчин гэсэн гурван тулгуурт үзэл баримтлалыг эрхэмлэж, ирээдүй хойч үеийнхээ боломжийг хязгаарлахгүйгээр эдийн засгийн үр ашигтай, бүтээмжтэй, бүх оролцогч талуудын оролцоог хангасан, байгаль орчинд сөрөг нөлөө багатай, мэдлэг, туршлагад тулгуурласан, хууль ёсонд нийцсэн, ил тод үйл ажиллагаа явуулна хэмээн тодорхойлсноо Ажлын хэсэг танилцуулсан юм.
Энэхүү хэлэлцүүлэгт “Эрдэнэт үйлдвэр” ТӨҮГ-ын Ерөнхий захирал, түүний чиглэл хариуцсан орлогч нар, бүтцийн нэгжийн удирдлагууд оролцож, 2022-2026 оны дунд хугацааны стратеги төлөвлөгөөний төслийг дахин сайжруулах, гадаад орчныг шинжлэхийн зэрэгцээ дотоод хүчин зүйлсийг сайн судлах, зорилтод түвшнээ зөв тодорхойлох, чиглэл хоорондын уялдаа холбоог хангах зэрэг санал зөвлөмж өглөө. Үр ашиг, бүтээмжид суурилсан, инновац, хамтын үйл ажиллагааг дэмжсэн, тогтвортой хөгжлийг хангасан, олон улсын стандартад нийцсэн стратеги төлөвлөгөөний төсөл боловсруулахад МУИС-ийн Бизнесийн сургуулийн эрдэмтэд хамтран ажиллаж байна.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
