Нийслэлийн Засаг даргын 2022 оны “Газрын зөрчил арилгах талаар авах зарим хэмжээний тухай” А/388 дугаар захирамж гарсан. Энэ хүрээнд нийслэлийн нутаг дэвсгэрт иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, тохижилтын ажил гүйцэтгэх боломжийг бүрдүүлэхээр 188 байршилд 4860 гарааш буулгах ажил гуравдугаар сарын 15-нд эхэлсэн. Өнөөдрийн байдлаар 2073 гарааш буулгаад байна.
ГАРААШ БУУЛГАХ, ГАЗРЫН ЗӨРЧИЛ АРИЛГАХ АЖЛЫН ЯВЦ 42.6 ХУВЬТАЙ БАЙНА
Нийслэлийн Газар зохион байгуулалтын албаны Кадастрын хэлтсийн дарга Ж.Галаас зарим зүйлийг тодрууллаа. Эхний ээлжид Үндэсний хөрөнгө оруулалтын банк болон “Сити” их сургуулийн хашааг буулгахаар төлөвлөжээ.
-Гарааш буулгах ажлын явц ямар шатандаа байна вэ?
-Нийслэлийн Засаг даргын захирамжийн хүрээнд энэ жил 188 байршилд 4860 гарааш буулгахаар төлөвлөсөн. Өнөөдрийн байдлаар 42.6 хувь буюу 2073 гарааш буулгасан байна. Тухайн 188 байршилд Хот байгуулалт, хөгжлийн газраас тохижилтын А даалгаврыг баталсан. Түүнчлэн ямар тохижилт хийх талаар иргэдээс санал, хүсэлт хүлээн авч, байршил бүрд өөр өөр тохижилтын ажил хийхээр төлөвлөн ажиллаж байна.
-Гарааш буулгахыг иргэдийн зүгээс хэрхэн хүлээн авч байна вэ?
-Иргэд гарааш буулгах явцад бидний ажлыг дэмжиж байна. Гараашнаас шалтгаалж хөрсний бохирдол үүсэж, иргэдийн эрүүл, аюулгүй орчинд амьдрах эрх зөрчигдөж, хүүхэд гэмтэж бэртэх, замын хөдөлгөөнд саад болох зэрэг аюултай нөхцөл байдал үүсэж байгаа. Иймд тухайн байршлуудыг чөлөөлөхөд иргэдийн зүгээс идэвхтэй дэмжиж байгаад талархалтай байна.
-Гарааш буулгасны дараа тохижилт хийхгүй удаж байна гэх шүүмжлэл байна. Энэ тал дээр ямар арга хэмжээ авч байгаа вэ?
-Хот байгуулалт, хөгжлийн газраас 188 байршилд тохижилтын А даалгавар баталсны хүрээнд нийслэл, дүүргүүд тодорхой байршлуудад тохижилтын зураг төсөл хийлгэн, тендер зарласан.
376 БАЙРШИЛД ХАШАА, ХАЙС ЧӨЛӨӨЛНӨ
Нийслэлийн Газар зохион байгуулалтын албаны Газар ашиглалт, мониторингийн хэлтсийн дарга Г.Мөнхбаатараас зөвшөөрөлгүй барьсан хашаа, хайс буулгах ажлын явцыг тодрууллаа.
-Хашаа, хайс буулгалтын ажил хэзээнээс эхэлсэн бэ. Улаанбаатар хотод хашаа, хайстай байх зайлшгүй шаардлагатай ямар байгууламжууд байдаг вэ?
-Дөрөвдүгээр сарын 5-нд Нийслэлийн Засаг даргын А/476 дугаар захирамжаар иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ, хангамжийг нэмэгдүүлэх зорилгоор Ажлын хэсэг байгуулж, Нийслэлийн Засаг даргын ахлах зөвлөх Д.Мөнх-Эрдэнээр ахлуулан ажиллаж байна. Их тойрууд хамаарах 1104 га газарт Нийслэлийн Газар зохион байгуулалтын албаны албан хаагчид хашаа, хайстай холбоотой судалгааг хийн, 971 байршилд 3566 зөрчил илрүүлсэн. Тус судалгаанд үндэслэн 376 байршилд хашаа, хайс чөлөөлөхөөр Нийслэлийн Засаг даргын 2022 оны A/585 дугаар захирамж гарч, газар чөлөөлөхөөр бэлдэж байна. Хашаа, хайсны стандартыг сахиулах арга хэмжээг өнгөрсөн жил хийж байсан. Энэ жил үргэлжлүүлэн хэрэгжүүлж байна. НИТХ-ын 2019 оны тогтоолоор хашаа, хайстай байх 16 байгууллагыг баталсан. Үүний дагуу хэрэгжилтийг ханган ажиллаж байна.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
