Сэтгүүлч Т.Сайхнаагийн “Нийтийн тооллын өмнөх ирээдүй” номын нээлт боллоо

Админ I Төр.мн

2022-05-18

“Чадраабалын Лодойдамба” сангийн тэргүүлэгч гишүүн, сэтгүүлч Т.Сайхнаагийн “Нийтийн тооллын өмнөх ирээдүй” яруу найргийн номын нээлт боллоо. Номын нээлтэд уран зохиол, сэтгүүл зүй, хэлбичгийн салбарын гурван үеийн төлөөлөл болсон уран бүтээлчид, зохиогчийн ажил, уран бүтээлийн хамтран зүтгэгчид, найз нөхөд, гэр бүл нь оролцож, баяр хүргэлээ.

Номын редактор, “Алтан өд”-ийн шагналт яруу найрагч Х.Нямхишиг уран бүтээлчийн шинэлэг байдлыг нь онцолж, цаашид ч шинэлэг байхыг хүссэн бол Монгол Улсын соёлын гавьяат зүтгэлтэн, хэл бичгийн ухааны доктор, сэтгүүлч, яруу найрагч Л.Мөнхтөр “Сайхнаагийн өвөрмөц сэтгэлгээний гадаад, дотоод нэгдэл. Агуулга нь хэлбэртээ багтсан, хэлбэр нь агуулгаа тодруулсан нэгдмэл шинжтэй, хэлбэрийн хувьд сонирхолтой, агуулгын хувьд шинэчлэлийн шинжтэй ном” гэж үнэлэв.

Мөн “Алсад суугаа ээж” дууны шүлгийн зохиогч, яруу найрагч, доктор П.Лхагвасүрэн “Би математикч хүний хувьд “Матеамьдрал”, “Ургийн мод”, “Тойрогт багтсан гурвалжин” шүлгүүдийг нь шохоорхож, хамгийн түрүүнд харлаа. Дахин дахин уншиж, дахин дахин бодож ойлгох, ухааны шүлгүүдтэй ном юм” гэлээ.

Номын нээлтэд яруу найрагч Намбарын Пүрэв, Лхагвасүрэнгийн Батцэнгэл, Дашзэвэгийн Цогбадрах, Ядамсүрэнгийн Отгонбаяр, Ядамсүрэнгийн Одгэрэл, зохиолч, яруу найрагч Дамдинсүрэнгийн Дамдинжав, зохиолч Жогноогийн Бямбасайхан, “Монгол коммент” нэвтрүүлгийн хөтлөгч, сэтгүүлч Мягмаржавын Батбилэг зэрэг уран бүтээлчид оролцож, зарим нөхөд нь үг хэлж, ном бүтээлээ бэлэглэж байв.

“Нийтийн тооллын өмнөх ирээдүй” ном хэдийгээр энэ жил хэвлүүлж байгаа ч зохиогч Говь-Алтай аймгийн Тайшир сумын дунд сургуулийн хоёрдугаар ангид суралцаж байхаасаа буюу 9 настайгаасаа хойш бичсэн шүлгүүдээсээ түүж, түүвэрлэжээ.

Түүний 13 настайдаа бичиж, өсвөрийн яруу найрагчдын “Хүрэл тулга” улсын уралдаанд уншиж, III байрт шалгарч байсан “Би Монгол” шүлгийг “Шинэ Монгол Харумафүжи” сургуулийн 6-р сурагч Б.Уужим уншиж, жүжигчин Л.Эрдэнэпүрэв, МУИС-ийн оюутан Ц.Ням-Очир нар шинэ шүлгүүдээс нь дуудлаа.

“Нийтийн тооллын өмнөх ирээдүй” номын зохиогч энэхүү номоо өөрийн танилцсан анхны “уран зохиолч” хэмээн тодотгосон Элэнц нагац Шагдарын Долгор агсны 100 насны тохиолоор хэвлүүлсэн байна.

Наробанчин хутагтын шавийн уугуул Ш.Долгор гуайн үр сад бөгөөд Т.Сайхнаагийн хаяал дүү, 12 дугаар ангийн сурагч Барцадгүйн Ариунзаяа 2021 онд “Тэнгэрийн туяа” зөгнөлт туужаа монгол, англиар хэвлүүлснийг нээлтийн үеэр онцолж байлаа.

Монголын зохиолчдын эвлэлийн Хүүхдийн уран зохиолын үндэсний төвийн тэргүүн, Д.Нацагдоржийн шагналт зохиолч Оюунбадамын Сундуй “Элэнц нагац Долгор, эмэг эх Цогзол нарынхаа гаргасан улбааг хүүхэд насандаа жим болгож, өнөөдөр ийнхүү зам болгож чадсан байна” гээд цаашдын уран бүтээлд нь амжилт хүсэв. Тус номонд Монгол яруу найргийн уламжлалт сэдвүүдээс гадна математик, мэдээллийн технологи, тухайлбал: ирээдүйн хүн, компьютер, алгоритм, зүйлсийн интернет зэрэг шинэ сонирхолтой сэдвүүд байгааг нээлтэд оролцогчид онцолж байлаа.

“Нийтийн тооллын өмнөх ирээдүй” номыг зохиогчийн бага найз, Барилга, хот байгуулалтын яамны Барилгын хөгжлийн төвийн дэд захирал бөгөөд ерөнхий инженер Батцагааны Энхболд ивээн тэтгэж, хэвлүүлжээ.

Нийт сэтгэгдэл 2

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.