Сүүлийн үед Боловсролын салбарт ажиллаж байгаа тэр дундаа цэцэрлэг болон ЕБС-ийн сурган хүмүүжүүлэгч багш нар сурагчдаа хэл амаар доромжлох,ялгаварлан гадуурхах цаашлаад гар хүрэх, хүчирхийлэл үйлдэх нь газар авсаар байна.
Тодруулбал, бага насны хүүхдүүд болох цэцэрлэгийн насны хүүхдүүдийг алгадаж, цохих, 1-3-р ангийн хүүхдүүдийг ялгаварлан харьцаж, гадуурхах, гар хүрч хүчирхийлэл үйлдсэн хэргүүд удаа дараа гарч байгааг та бүхэн мэдэж байгаа билээ. Үүнээс улбаалан ЕБС-ийн сэтгэлзүйч нэгэн эмэгтэй хүүхдэд гар хүрч, хүчирхийлэл үйлдэж байгаа багш нарын эсрэг БСШУЯ-ны гадаа үсээ хусуулж байсан үйл явдал ч саяхан.
Гэтэл хэдхэн хоногийн өмнө Дорнод аймгийн Халхгол сумын ЕБС-ийн хими, физикийн н.Алтан-Од багш 8-р ангийн сурагчдаа “Даалгавар хийгээгүй” гэх шалтгаанаар гар хүрч, үстэж чирч, зоджээ.
Эх сурвалжийн хэлж буйгаар тус ангийн 6 сурагчийг багш нь зодсон. Уг хүүхдүүд гэрийнхэндээ хэлснээр сургуулийн захиргаанд мэдэгдэж гомдол гаргасан. Гэтэл сургуулийн захиргаанаас “Багшийг ажлаас нь халахгүй. Гэхдээ хариуцлага тооцож, даваа гарагт танилцуулна” гэсэн хариу өгсөн байна.
Ийм жишгээр хүчирхийлэлд өртсөн сурагч нарын тоо өдрөөс өдөрт ихсэж байхад сургуулийн захиргаанаас хүч хэрэглэсэн багшийн цалингийн 30 хувийг хасаад л өнгөрөөдөг. Үндсэн цалин биш урамшуулалт цалингаас нь хасаад өнгөрдөг үзэгдэл газар авч багш нарыг өөгшүүлэн өнгөрөөдөг.
Хүүхэд бүхэн эрүүл, аюулгүй орчинд сурч боловсрох эрхтэй, Гэтэл Монголын ирээдүй болсон та бидний нүдний цөцгий мэт хайрладаг бяцхан хүүхдүүд маань сургагч багш гэх нэртэй “Яргалагчид”-ын гарын шүүс болсоор байх уу?
Иймд сурган хүмүүжүүлэгч багш нарын боловсролыг сайжруулах, 21-р зууны хүүхэд багачуудад тохирсон арга барилаар сургагч багш нарыг ажиллуулах, хүүхдийг ялгаварлан гадуурхах, хэл амаар доромжлох, хүч хэрэглэсэн үйлдлүүдэд шат дараатай арга хэмжээ авч, цаашлаад эрүүгийн хариуцлага хүлээлгэх гэх мэт боовсролын системд өөрчлөлт оруулахыг нийт хохирогч хүүхдүүдийн аав, ээж болон хохирогч болох ойрхон байгаа хүүхдүүдийн өмнөөс салбарын сайд Л.Энх-Амгалан болон ХЗДХЯ-ны Х.Нямбаатар сайдад уламжилъя.
Like
0
Зөв
0
2
Буруу
0
Воов
1
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
