Моннис групп маш том “АРТАЙ”, шийдвэр гаргагчдын “НӨЛӨӨТЭЙ”. Тиймдээ ч зөвхөн өөрсдөдөө зориулж тендер “зарлуулдаг” бололтой. Тэгвэл Моннис Группын Ерөнхийлөгч, ТУЗ-ийн дарга Б.Чулуунбаатар, “Моннис Моторс” ХХК-ийн захирал Г.Мөнхбаатар  нар хэрхэн ТӨСВИЙН МӨНГИЙГ УГААЖ, хэрхэн яаж, зальжин аргаар “ЗАВШДАГ” болохыг ганцхан жишээгээр энд сийрүүлье. 

“Моннис Моторс” ХХК-ийн 200 автобус 25 болж болж “ХУГА” буурав

Нэг талаас хотын түгжрэлийг бууруулах, нөгөө талаас сурагчдын аюулгүй байдлыг хангах үүднээс 2020 оны хичээлийн жилд 200 сурагчдын автобус үйлчилгээнд явуулна гэж шийдвэр гарч тендер зарлахад “Моннис Моторс” ХХК шалгарсан байдаг. Өөрөөр хэлбэл 23,5 тэрбум төгрөгийн тендерийг ямар ч өрсөлдөгчгүйгээр авав. Гэтэл цар тахал, хил гааль хаалттай гэх шалтгаанаар өнөөх 200 автобус 75 болж “ХУГА” буурав. Одоо үнийн өсөлт гэх шалтгаанаар 75 автобус нь 25 болж “нам уналаа”. 2020 оноос хойш “Моннис Моторс”  ХХК таван л автобусыг Хотод хүлээлгэн өгөөд байгаа юм. Өөрөөр хэлбэл анх гэрээгээр 200 автобус хүлээлгэн өгөх атал зөвхөн 5-ийг. Харин тендерийн үнэд өөрчлөлт оруулж, үнийн дүнг нэмбэл 75 автобус нийлүүлнэ, эс бөгөөс  25-ийг  хүлээлгэн өгөхөөр ярьж байгаа аж. 

“Моннис Моторс” ХХК-д “зориулж” 5.4 тэрбум төгрөгийн тендер зарлажээ

Г.Мөнхбаатар захиралтай “Моннис Моторс” ХХК тендер “ХУСАГЧ” болохыг дараах тендер зарласан байдлаас харж болно. Өмнөх гэрээ, тендерийн гүйцэтгэл  хийгдэж дуусаагүй байхад Боловсрол, шинжлэх ухааны сайд Л.Энх-Амгалан, Төрийн нарийн бичгийн дарга Л.Цэдэвсүрэн тэргүүтнүүд сурагчдын автобус нэн шаардлагатай гэх шалтгаанаар зөвхөн “Моннис Моторс” ХХК-д “зориулж” 5.4 тэрбум төгрөгийн тендер зарласан байх юм. Энэ тендер Моннист зориулсан гэлтэй. 

Тендерийг 2022 оны 04-р сарын 20-ны өдөр зарлаж энэ онд санхүүжүүлэх дүн  нь 1.5 тэрбум хэмээн тусгажээ. Гэвч 2022 оны 05-р сарын 24-ны өдөр тендерт өөрчлөлт оруулж уг төсөл, арга хэмжээний техникийн тодорхойлолтыг захиалагчаас баталгаажуулж ирүүлэх хүртэл тодорхойгүй хугацаагаар өөрчлөлтийн хүсэлт гаргасан байна. 

Боловсрол, шинжлэх ухааны яамны Төрийн нарийн бичгийн дарга Л.Цэдэвсүрэнгийн баталсан тендерийн бичиг баримтад “DONGFENG хойд тэнхлэгтэй, Eaton хурдны хайрцагтай, Jingyida урд тэнхлэгтэй” байхаар, мөн 2019, 2020, 2021 онд Монгол Улсад сургуулийн автобус нийлүүлж байсан туршлагатай байх шалгуур тавьсан нь яах аргагүй Моннист зориулж. Өөрөөр хэлбэл Dongfeng автобусыг ганцхан “Моннис Моторс” компани оруулж ирдэг шүү дээ. 

Ингэж л яам нь хувийн хэвшилтэйгээ “ХУЙВАЛДАЖ” төсвийн мөнгийг тендер нэрээр “ШАМШИГДУУЛДАГ” жишээ энэ. 

Тансаг загварын ЖИПТЭЙ дүйцэхүйц үнэтэй сурагчдын автобус

Хотын дарга асан, одоогийн шадар сайд С.Амарсайхан, Моннис группт давуу байдал олгосон нь үнэн. Одоо БШУЯ нь хүртэл оролцож байна. Тэгвэл тэд худал хэлсэн ч хоёр алхахгүй “үнэнд гүйцэгдэх” нь тэр. Сурагчдын автобусны нэг бүрийн үнийг одоогийн шадар сайд С.Амарсайхан ч тэр Моннис ч тэр “НУУДАГ”. Тэгвэл  alibaba.com сайтад тавигдсан Dong Fenf Motor Indutry компанийн сургуулийн автобуснуудыг үнийг харвал хамгийн үнэтэй нь 113,000 ам.долларын үнэтэй. Уг автобус нь 24 хүүхдийн суудалтай, тансаг кабинтай, түлшний зарцуулалт багатай зэрэг давуу талтай аж. Харин Моннис компанийн 52 хүүхдийн суудалтай автобусны хамгийн өндөр ханштай нь 72,500 ам.доллар байгаа гэх.

      Шадар сайд С.Амарсайхан Моннис компанийг цээжээрээ хамгаалж өмөөрөв. Тухайн үед хотын дарга байхдаа тэрбээр  “20 тэрбум төгрөгийг 75 автобусанд хуваагаад үз” гэв. Ингээд бодвол нэг бүрийн үнэ нь 267 сая төгрөг буюу 93.4 мянган ам.доллар болж байна. Энэ бол“Мөнхада”, “Таванбогд моторс”-ийн борлуулдаг цоо шинэ жип автомашинтай дүйцэхүйц үнэ. Тодруулбал Моннис-ийн оруулж ирэх сурагчдын автобус Тансаг загварын жиптэй дүйцэхүйц үнэтэй аж. 

МАН-ын бага хурлын гишүүн Б.Чулуунбаатарт олгож буй “ДАВУУ ЭРХ” биш биз

Моннис группийн ерөнхийлөгч, ТУЗ-ийн дарга Б.Чулуунбаатар МАН-ын Бага хурлын гишүүн. Иймээс бизнесийн талаар ч тэр, улс төрийн нөлөөллөөр ч тэр намдаа нөлөөлөх хэмжээний хүн. Магадгүй түүнийг бага хурлын гишүүн учраас “давуу эрх” олгож, зөвхөн түүнд зориулж тендер зарладаг юм биш биз гэх хардлага байна. Үгүй гэх ч үндэслэл алга.

Харин энэ давуу эрхээ хотын дарга асан, шадар сайд С.Амарсайхан, Боловсрол, шинжлэх ухааны сайд Л.Энх-Амгалан, Төрийн нарийн бичгийн дарга Л.Цэдэвсүрэн нараар “гүйцэтгүүлж” байж мэдэх. 

Төр.мн сайт дараагийн дугаарт шадар сайд С.Амарсайхан Моннис групптэй хэрхэн “ХАЛААС” нэг болох, Моннис Моторс группын Хөгжлийн банкны зээлийн асуудлыг хөндөн хүргэх болно. 

Төр.мн
Б.БАДАРЧ