Зөвшилцөж чадвал энэ удаагийн Үндсэн хуулийн өөрчлөлт бүх алдааг засах боломжтой

Улс төрийн намууд

0
1182

Зөвшилцөж чадвал энэ удаагийн Үндсэн хуулийн өөрчлөлт бүх алдааг засах боломжтой

Төр.мн I www.tur.mn

2022-06-24

Үндсэн хуульдаа өөрчлөлт оруулах гэсэн монголчуудын халуун мэтгэлцээн нарлаг зуны аагим халуун өдрүүдэд хөвөрч байна. Хууль тогтоох байгууллагын эрхэм гишүүд ч тойрогтоо ажиллан, олон нийтийн санаа бодлыг сонсож, төслийн талаар амаа цангатал ярьж буй. Энэ удаагийн Үндсэн хуулийн нэмэлт өөрчлөлт өмнө хийгдсэн өөрчлөлтөөс илүү нийгмийн шаардлагаар хийгдэх гэж байна. Энэ хавар залуучууд төв талбайд томоохон жагсаал хийж УИХ, Засгийн газарт нэлээдгүй даалгавар өгсөн байдаг.

Даалгавруудын нэг нь Үндсэн хуульд нэмэлт өөрчлөлт оруулж, сонгуулийн тогтолцоо болоод УИХ-ын гишүүд, дарга нарт хариуцлага тооцдог механизмийг сайжруулах байсан юм. Тиймээс парламентад суудалтай МАН, АН, ХҮН парламентад суудалгүй улс төрийн намууд Үндсэн хуульд нэмэлт өөрчлөлт оруулахыг дэмжиж “Тунхаг бичиг”-т гарын үсэг зурсан. Хүний эрх, эрх чөлөөг баталгаатай хангах, иргэдийн эвлэлдэн нэгдэх эрхийг хязгаарласан заалтуудыг засах, популист улс төрөөс татгалзаж, хөгжлийн хөтөлбөрөөр өрсөлддөг үндэсний хэмжээний бодлоыг намуудад төлөвшүүлэх, ард түмнийг бүрэн төлөөлөх парламентын чадавхыг нэмэгдүүлэхийн тулд иргэд, улс төрийн намууд санал нэгдээд байна.

Гэвч нийгмийн нэг хэсэг нь Үндсэн хуулийн өөрчлөлтийг хүлээн зөвшөөрөхгүй байна. Жишээлбэл 2019 оны Үндсэн хуулийн нэмэлт өөрчлөлтийг тухайн үед МАН-ын 62 гишүүн санаачлан өргөн барьсан. Тэр өөрчлөлт маань нийгэмд тодорхой дэвшлүүдийг авчрах байв. Гэвч хуулийн хэлэлцүүлгийн явцад тухайн үеийн Ерөнхийлөгч Х.Баттулгын санал гэгч зүйл орж ирсэн. Тэрхүү санал болон МАН-ын 62 гишүүний өргөн барьсан хуулийн төслийг нэгтгэн хэлэлцэж, эцэстээ зөвшилцөл гэх нэртэй ямар ч хууль тогтоомжид байхгүй процессоор хэлэлцэж, Үндсэн хуулийн нэмэлт, өөрчлөлтийг баталсан. Үүнээс шалтгаалаад 2019 оны нэмэлт, өөрчлөлт дутуу дулимаг, үр дүн муутай болсон гэж улстөрчид шүүмжлээд байгаа юм. Тиймээс л энэ удаагийн Үндсэн хуулийн өөрчлөлт нь иргэд, Ерөнхийлөгч, УИХ, Засгийн газар нэг талдаа гараад зөвшилцөөд хийх юм бол цаашид улсын хөгжилд нөлөө үзүүлэхүйц өөрчлөлт байх боломжтой. Харин ингэхийн тулд УИХ-ын эрхэм гишүүд иргэддээ энэ өөрчлөлтийг сайтар ойлгуулж, таниулах шаардлагатай байна.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.