Азийн хөгжлийн банкны хөнгөлөлттэй зээлээр хэрэгжиж буй “Зүүн өмнөд говийн хот байгуулалт, хилийн ойролцоо суурин газруудын хөгжлийн нэмэлт санхүүжилтийн MOН3388/3713 төсөл”-ийн хүрээнд есөн аймагт шинэ цэвэрлэх байгууламжууд барьж байна. Энэхүү төслийн хүрээнд Дорноговь аймгийн Сайншанд хотод хоногт 3000м3 бохир ус хүлээн авах хүчин чадалтай цэвэрлэх байгууламж, Ар шанд Өвөр шандыг холбосон 4.4км бохир усны төв магистрал шугам зэрэг нийт 9.7 тэрбум төгрөгний өртөгтэй дэд бүтцийн томоохон ажлуудыг хийж дууслаа.
Сайншанд хотын дэд бүтцийг хөгжүүлэх, оршин суугчдын тав тухтай амьдрах орчныг нэмэгдүүлэх, орон нутгийн байгаль орчныг сайжруулж, хөрсний бохирдлыг бууруулах, цэвэрлэгдсэн усыг говь нутгийн ногоон байгууламж, мод тарих, зам талбайн усалгаанд дахин ашиглах зэрэг олон талын ач холбогдолтой энэхүү төслийн барилгын гүйцэтгэгчээр “Комфорт импекс” ХХК ажиллаж, өнөөдөр буюу 2022.07.27-ны өдөр ийнхүү ашиглалтад хүлээлгэн өгч байна.
Цэвэрлэх байгууламжийг ашиглалтад өгөх нээлтийн арга хэмжээнд Барилга хот байгуулалтын дэд сайд Э.Золбоо, УИХ-ын гишүүн Б.Дэлгэрсайхан, Т.Энхтүвшин, Аймгийн ИТХ-ын дарга Б.Ганзориг, Дорноговь аймгийн засаг дарга О.Батжаргал, БХБЯ-ны Барилгын материалын үйлдвэрлэлийн хэлтсийн дарга Д. Батзориг, "Зүүн өмнөд говийн хот байгуулалт, хилийн ойролцоо суурин газруудын хөгжлийн төсөл” -ийн зохицуулагч Б.Оюун, “Комфорт импэкс” ХХК гүйцэтгэх захирал Г.Энхболд, “Чандмань илч” компанийн дарга Д.Эрдэнэбаяр, төслийн гүйцэтгэгч байгууллагуудын төлөөллүүд оролцлоо.
Монгол инженерүүд Эх орныхоо цаг уур, говь нутгийн онцлогт тохирохуйц цэвэрлэх байгууламжийн технологийн шийдэл бүхий зураг төсөл боловсруулж, ажилласан бөгөөд тус төслийн зураг зохиогчоор “Хайдро дизайн прожект” ХХК, төслийн зөвлөхөөр “Монхидро констракшн” ХХК ажиллалаа. Тус цэвэрлэх байгууламж нь механик, биологи, гүйцэд цэвэрлэгээний технологитой ба цэвэрлэгдсэн усыг цэцэрлэг, зүлэгжүүлэлт, зам талбай, хөрсний усалгаанд ашиглахад зориулагдсан цооногтой. Мөн цэвэрлэгээний явцад гарсан лагийг боловсруулан бордоо, түлш гаргах тоног төхөөрөмжтэй жишиг байгууламж болж байна.
Төслийн зураг төсөл, төлөвлөлтийн шатанд УИХ-ын гишүүн Б.Дэлгэрсайхан, Т.Энхтүвшин нарын санаачлагаар Ар шанд, Өвөр шандыг холбосон 4.4км бохир усны төв магистрал шугамыг төлөвлөж өгсөнөөр Ар шандын бохир усыг нэгдсэн цэвэрлэх байгууламжаар цэвэрлэх нөхцөл бүрдэв.
Цэвэрлэх байгууламжийн ашиглалтын үйл ажиллагааг “Чандмань илч” ХХК цаашид авч явуулах бөгөөд 17 ажилтнаа онолын болон дадлагажуулах сургалтад хамруулж, бэлдээд байна. Харин цэвэрлэх байгууламжийн тохируулга, зүгшрүүлэлтийн ажил нэг жилийн хугацаанд хийгдэж, ажилчдыг дагалдуулан сургах юм.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
