Улсын их дэлгүүрийн урд талбайд хичээлийн хэрэгслийн үзэсгэлэн худалдаа гарч, хөл хөдөлгөөн ихтэй байв. Энд сурагчдын хичээлд хэрэгтэй үзэг, дэвтэр, харандаа баллуур, цүнх, дүрэмт хувцас гээд бүгд байлаа.
Тус бүрийн үнийг судлаад үзэхэд сурагч цүнх 130.000-150.000 төгрөг, дүрэмт хувцас 104.000-201.000 төгрөг, бусад хичээлийн хэрэгслийг хамгийн багадаа л 100.000 төгрөгөөр авах нь.
Тооцож үзвэл нэг хүүхэдтэй айл 500.000 төгрөгөөр хүүхдийнхээ хичээлийн хэрэгслийг бэлдэнэ гэсэн үг. Тэгвэл дөрвөн хүүхэдтэй айл хэдэн сарын цалингаараа хүүхдийнхээ хичээлийн хэрэгслийг бэлдэх вэ?
Хоёр хүүхдийнхээ хэрэгслийг бэлдэж явсан нэг эмэгтэйтэй ярилцлаа.
Тэрбээр хэлэхдээ: “ Бараа бүтээгдэхүүний үнэ өнгөрсөн жилийнхээс маш их өссөн байна. Ялангуяа дүрэмт хувцасны үнэ нэмэгдсэн. Улаанбаатар пресс гэх мэт монгол дэвтэр л үйлдвэрийнхээ үнээр байгаа бусад хэрэгслийн тухайд харьцангуй үнэтэй байлаа. Дунд болон бага ангийн хоёр хүүхэдтэй хичээлийн хэрэгсэл болон дүрэмт хувцас бүгд нийлээд баримжаагаар нэг сая төгрөг болсон. Бараг хоёр сарын цалингаараа бэлдэж байна” хэмээн ярилаа.
Тухайн үзэсгэлэн худалдаан дээр “Торгон хийц” болон “Шилмэл загвар” гэсэн хоёр үйлдвэрийн дүрэмт хувцас зарагдаж байсан ба олонх нь Шилмэл загвар дээр дугаарлан зогссон харагдана.
Үзэсгэлэн Бөмбөгөр зах, Хар хорин зах, Их дэлгүүр, Ялалтын талбайд гарсан бөгөөд үнийн хувьд ойролцоо байна.
Эцэг эхчүүдийн хэлж байгаагаар дүрэмт хувцасны үнэ нэмэгдсэн нь дарамт болж, олон хүүхэдтэй айл илүү хэцүүдэж байгаа тухайгаа дурдлаа. Дээрх тооцоонд биеийн тамирын хувцас, өмд, цамц ороогүй бөгөөд бусад тооцоо нэмэгдвэл улам үнэтэй тусах нь.
Зөвхөн сургуулийн насны гэлтгүй цэцэрлэгийн хүүхдийн хичээлийн хэрэгслийг бэлдэхэд ч мөн чамгүй мөнгө орж байгаа талаар эцэг эхчүүд дахин дахин ярьсаар л...
Бэлтгэсэн: Б.Лхагва
Like
2
Зөв
0
0
Буруу
0
Воов
0
Уйтгартай
1
Дуртай
© 2013-2023. Вэб сайт бүтээсэн: Tsast Solution LLC
