Инфляц 7-р сарын байдлаар 15.7 хувьд хүрч өсжээ

Эдийн засаг

0
1008

Инфляц 7-р сарын байдлаар 15.7 хувьд хүрч өсжээ

Төр.мн I www.tur.mn

2022-08-26

Ажлын хэсгийн мэдээллийг Эдийн засаг, хөгжлийн дэд сайд С.Наранцогт танилцууллаа. Тэрбээр, инфляцын нөхцөл байдал болон эрсдэлийн талаар танилцуулахдаа Монгол Улсын жилийн инфляц 2021 онд 13.4 хувьд хүрсэн бол 2022 оны 7 дугаар сарын байдлаар 15.7 хувьд хүрч өсөөд байна.

Цар тахлын өмнө нийт инфляцын 30 орчим хувь нь импортын барааны үнийн өсөлтөөс бүрддэг байсан бол өнөөдөр нийт инфляцын 54.1 хувь буюу 8.5 нэгж хувийг импортын инфляц бүрдүүлж байна.

Үндэсний статистикийн хорооны тооцсоноор дотоодын гол нэрийн бараа, үйлчилгээний үнийн өсөлтийг импортын орцоор авч үзвэл сав, баглаа, боодлын үнийн өсөлтийн 79.0 хувь, тавилга, хэрэгслийн 55.8 хувь, гурил, гоймонгийн 72.0 хувь, хувцас гутлын 45 хувь нь импортоос шалтгаалсан байна.

Инфляцын түвшин буюу хэрэглээний бараа, үйлчилгээний үнэ 2022 оны 7 дугаар сард улсын хэмжээнд 15.7 хувь гарсны 6.3 нэгж хувь буюу 40.1 хувь нь хүнсний бараа, ундаа, усны бүлгийн үнийн өсөлтөөс шалтгаалсан. Хүнс, бензин, шатахуун, түлшний бүлгийг хасаж тооцсон суурь инфляцын түвшин өмнөх оны мөн үеэс 11.8 хувь, өмнөх сараас 0.5 хувиар өссөн. 7 дугаар сарын байдлаар нийт инфляцийн 40 орчим хувь буюу 6.3 нэгж хувийг хүнсний бараа, ундаа, усны бүлгийн үнийн өсөлт бүрдүүлсэн.

Хүнс, бензин, шатахуун, түлшний бүлгийг хасаж тооцсон суурь инфляц буюу эрэлтийн гаралтай инфляц өмнөх оны мөн үеэс 11.8 хувьд хүрч, Монголбанкны зорилтот түвшнээс давсан гээд цар тахлын улмаас бий болсон үйлдвэрлэл, нийлүүлэлт, тээвэр ложистикийн хүндрэлүүдийг гадаад талаас шалтгаалсан нөхцөл байдал улам дордуулж байна.

Түүнчлэн, үнийн өсөлтийн эсрэг арга хэмжээний хүрээнд гол нэрийн бараа бүтээгдэхүүний үнийн өсөлтийн шалтгаан нөхцөлийг судалж, шаардлагатай арга хэмжээ авах чиглэл бүхий ажлын хэсгийг Ерөнхий сайдын 2022 оны 7 дугаар сарын 20-ны өдрийн 108 дугаар захирамжаар байгуулан ажиллаж буйг дурьдаад, шаардлагатай холбогдох арга хэмжээг тухай бүрд нь шуурхай шийдвэрлэн ажиллаж байна гэв.

Тухайлбал, Уул уурхай, хүнд үйлдвэрийн яамнаас гол ханган нийлүүлэгч ОХУ-ын Роснефть компанитай хэлцэл хийж, энэ оны 12 дугаар сарыг дуустал Аи-92 автобензиний үнийг тонн тутамд 830 ам.доллараар худалдан авах тохиролцоонд хүрсэн.

Ингэснээр 2022 оныг дуустал үнийг тогтвортой барих нөхцөл бүрдсэн гэх зэргээр яам тус бүр салбарынхаа гол нэрийн бараа бүтээгдэхүүний үнийн өсөлтийг хязгаарлах хүрээнд авч хэрэгжүүлж байна.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.