Монгол Улсын Засгийн газар, сангийн сайд нар дөрөвдүгээр сарын 01-нд ОХУ-аас нэг сая тун спутник V вакцин авахаар гэрээ хийж байсан билээ. Манай улсын нилээдгүй иргэд Орос вакцин тариулах хүсэлтэй байсан боловч тус вакцины татан авалтыг хийж чадахгүй байгаа шалтгаанаа ОХУ дотооддоо нөөцөө хангаж чадахгүй байгаа хэмээн тайлбарлаж дөрөвдүгээр сарын 10-ны дотор 2 дахь тунгийнхаа татан авалтаа хийчихнэ гэж ам бардам хэлж байлаа. Гэтэл өнөөдөр Спутникийн 2 дахь тунгийн сураг алга. Эхний тунгаа тариулсан иргэд дараагийн тунгаа хүлээсээр. Дотоодод халдварын хяналтаа алдаж, хүнд байдалд орсон энэ үед вакцины бүрэн тунгаа тариулаагүй иргэдийн амь нас, эрүүл мэнд аюулд орсон гэсэн үг. ОХУ-аас авах спутник вакцин хэзээ ирэх нь тодорхойгүй байгаа тухай
ГХЯ-ны Төрийн нарийн бичгийн дарга Ц.Анхбаяр өчигдөр мэдээллээ. Тэрбээр “ОХУ-ын Хөрөнгө оруулалтын сантай бид өдөр бүр холбогдон ажиллаж байна. Спутник V вакциныг хүлээж буй иргэдийн бухимдлыг ойлгож байна. Олон үе шат дамжсаны дараа л вакцин нийлүүлэхийг зөвшөөрдөг. Нийлүүлэгч тал манай улсын эмнэлгүүдийн хүйтэн хэлхээний нөхцөл байдал, эмч нарын чадвар гэх мэт олон зүйлийг судалсны дараа бидэнд вакцинаа нийлүүлэхийг зөвшөөрдөг” гэх мэтчилэн биднээс шалтгаалах зүйлс байхгүй гэх өмнөхтэйгээ ижил шахуу хариулт өгөв. ОХУ Монгол улсад тусламжаар байтугай худалдаж авья гэсэн ч вакцинаа өгөхгүй маш ихээр чангалж байгаагийн цаад шалтгаан нь юу вэ?
Түүнчлэн спутник V вакцины эхний тунгаа тариулаад дараагийн тунгаа хүлээж, бухимдаж буй иргэдээ ч “хуурч”, тайвшруулахаа мартсангүй.
Эрүүл мэндийн яамны төрийн нарийн бичгийн дарга Ц.Эрдэмбилэг “Спутник V вакцины хоёр дахь тунг эхний тунгаа хийлгэснээс хойш 21-90 хоногийн дотор хийлгэнэ. Хэдий чинээ олон хоногийн дараа тариулна, төдий чинээ үр дүн сайтай” гэлээ. Өмнө нь БНХАУ-аас авах вероселл вакцин хойшлох үед албаныхан мөн л ийм хариулт хэлж ам таглаж байв. Тодруулбал “олон хоногийн дараа тариулна, төдий чинээ үр дүн сайтай” гэх үгэнд итгэсэн олон мянган хүн вероселл вакцины хоёр дахь тунгаа хугацаа хэтрүүлж тариулсан. Үр дүн нь яг үнэндээ сайн эсвэл муу эсэхийг хэн ч нотолж чадахгүйгээр үл барам Япон улсын эрдэмтэн вакцины хоёр дахь тунг хойшлуулах нь эсрэг биет үүсгэж чадахгүй, вирус мутацлагдаж бүр илүү аюултай болох талаар ярив. Цар тахлын үед эрсдлийн менежментээ буруу хийснээс болж иргэд өнөөдөр коронатайгаа зэрэгцэн амьдардаг боллоо.Урагшгүй ноёны Ухаангүй албат гэдэг үг зүгээр ч нэг санамсаргүй гараагүй ажээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
