Монгол Улсын Ерөнхий сайд, Монгол Ардын намын дарга, Жендэрийн Үндэсний хорооны дарга Л.Оюун-Эрдэнэ “ОРОЛЦЪЁ, ТӨЛӨӨЛЬЕ” жендэрийн эрх тэгш байдал Удирдах ажилтны хэлэлцүүлэг”-ийг нээж үг хэллээ.
Тэрбээр Монгол Ардын Нам жендэрийн мэдрэмжтэй нам болохынхоо хувьд хүний эрх, жендэрийн эрх тэгш байдлыг хангах бодлогыг тодорхойлж, одоогийн хүрсэн түвшнээ ахиулж, улс төрийн манлайлал үзүүлэх нь НҮБ-ын батлан гаргасан Тогтвортой хөгжил-2030 болон Монгол Улсын Тогтвортой хөгжлийн үзэл баримтлалыг амьдралд хэрэгжүүлэхэд чухал ач холбогдолтойг онцлон тэмдэглэв.
Мөн хүйсийн тэгш бус оролцоо, иргэдийн орлогын ялгаатай байдал зэрэг суурь нөхцөлүүд нь иргэдийн амьдралд зөрүүтэй байдлыг бий болгодог тул хүний эрх, жендэрийн тэгш оролцоог ханган ажиллахад Монгол Ардын Нам бодлогоо чиглүүлнэ. Шийдвэр гаргах түвшинд эмэгтэйчүүдийн эзлэх хувь ихсэх нь нийгмийн асуудлууд уян хатан байдлаар шийдэгдэх, төсвийн үргүй зарцуулалт буурах, нийгмийн сэтгэлзүй зөөлрөх зэрэг олон талын ач холбогдолтойг тэрээр онцлон тэмдэглэв.
“Парламент бол нийгмийн толь учраас хүйсийн тэгш оролцоог дэмждэг нийгмийн сэтгэлзүйн хөрсийг бүрдүүлэх нь чухал. Жендэрийн тэгш байдлыг хангах суурь тогтолцоог Монгол Ардын Нам тавьсан түүхтэй. Тухайлбал, 1924 оны гуравдугаар сарын 19-нд намын дэргэд эмэгтэйчүүдийн анхны байгууллагыг байгуулан зохиолч Д.Нацагдоржийн гэргий Д.Пагмадулам удирдан ажиллаж байжээ.
1924 онд намын нийт гишүүдэд эмэгтэйчүүдийн эзлэх хувь 18, 1979 онд 25,7 байсан бол эдүгээ 54,7 хувийг эзэлж байна. Миний бие Монгол Улсын Ерөнхий сайд, Монгол Ардын Намын дарга болоод Жендэрийн Үндэсний хорооны даргынхаа хувьд жендэрийн эрх тэгш байдлыг ханган ажиллахдаа нийгмийн суурь асуудлуудыг шийдэхэд онцгой анхаарна” гэлээ.
Хэлэлцүүлгийн үеэр Монгол Улсын Ерөнхий сайд, Монгол Ардын намын дарга Л.Оюун-Эрдэнэ Шинэ сэргэлтийн бодлогын эдийн засгийн өнөөгийн нөхцөл байдал, цаашид хэрэгжүүлэх арга хэмжээний тухай хэлэлцүүлэгт оролцож буй намын удирдах ажилтнуудад танилцууллаа.
Тэрээр иргэдийн амьдралын чанарыг сайжруулах нь хүний эрх, жендэрийн тэгш эрхийг хангах чухал нөхцөлийн нэг гэдгийг онцолсон юм.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
