Тэрбээр цахим хуудаснаа "Манай Засгийн газар сүүлийн 3 жилийн хугацаанд өнгөрсөн 30 жилийн алдаа оноог засах, мөнгө эрх мэдлээр сүлбэлдсэн “Бүлэглэл”-ийн хуйвалдааныг таслан зогсоож, иргэддээ баялгийг тэгш, шударга хуваарилах, хөгжлийг хязгаарлаж буй хүчин зүйлсийг шийдвэрлэхээр хичээн ажиллаж тодорхой үр дүнд хүрсээр байгаа билээ.

Үүнд:

-Эрдэнэтийн 49 хувийг төрд авч, Хөтөлийн цемент, Дарханы төмөрлөгийн үйлдвэрийн хууль бус хувьчлалын эсрэг тууштай тэмцэж, төрийн өмчид эргүүлэн авсан ялалт,

-Дубайн гэрээг цуцалж, Оюу Толгойн 2.4 тэрбум ам.долларын өрийг тэглүүлж, Гүний уурхайн ажлыг ирэх онд ашиглалтад оруулах тохиролцоонд хүрсэн амжилт,

-Хөгжлийн банкнаас улс төрчдийн нөлөөллөөр чанаргүй 1 их наяд төгрөгийн зээл гарснаар банк дампуурах эрсдэлд орсон байсныг хагас жилийн хугацаанд олон нийтийн хэлэлцүүлэгт оруулж, 803 тэрбум төгрөгийг эргэн төлүүлээд байгаа зэрэг бодит үнэнийг дурдаж болно.

-Л.Оюун-Эрдэнийн засгийн газраас “ШИНЭ СЭРГЭЛТИЙН БОДЛОГО”-ыг хэрэгжүүлж, эдийн засгийн хурдацтай хөгжлийг бий болгохын төлөө эрчимтэй ажиллаж байгаагийн үр дүнд:

-”Боомтын сэргэлтийн бодлого”-ын хүрээнд Тавантолгой-Гашуунсухайт чиглэлийн 233,6 км төмөр замыг өнгөрсөн 9-р сард нээсэн бол экспортын бас нэг шинэ гарц болох Зүүнбаян-Ханги чиглэлийн 226,9 км төмөр замыг үндэсний бүтээн байгуулагчид 8 сарын дотор барьж дуусгаад байна.

-”Эрчим хүчний сэргэлтийн бодлого”-ын хүрээнд Эрдэнэбүрэнгийн Усан цахилгаан станцыг эхлүүлэх, зарим цахилгаан станцуудыг өргөтгөх, шинэчлэх ажил хийж байна.

-Олон жил бугшсан нүүрсний хулгайг таслан зогсоож, гэмт этгээдүүдийг илрүүлэн хариуцлага тооцохоор Засгийн газар олон нийтэд зарлаад ажиллаж байна.

Нүүрсний хулгайтай холбоотойгоор “Эрдэнэс Тавантолгой”-д 6 сарын хугацаатай онцгой дэглэм тогтоож, бүрэн эрхт төлөөлөгч томилон ажилуулж байна. Үүний үр дүнд:

-Сар гаруйн хугацаанд нүүрсний экспортыг ил тод болгож, хатуу хяналт тавьснаар экспорт 2 дахин нэмэгдлээ. 2022 оны 12 сарын 9-ний өдөр л гэхэд түүхэндээ анх удаа өдөрт 1062 тээврийн хэрэгслээр 110,618 тонн нүүрс экспортоллоо.

-“Эрдэнэс Тавантолгой”-н 603 сая ам.долларын өрийг ердөө сарын хугацаанд 418 сая ам.доллар хүртэл буурууллаа.

-Улсын валютын нөөц 2.0 тэрбум $ руу бууж байсан бол 2.9 тэрбум $ хүртэл өсөж валютын ханш тогтворжиж байна. Хулгай луйврыг таслан зогсоож чадвал үр дүн нь богино хугацаанд гарахыг энэ бодит баримт харуулж байна.

Асар их мөнгө, эрх мэдэл авлига, хээл хахуул, албан тушаалын наймаа явж байгаа, маш олон хүн аж ахуйн нэгж оролцсон нүүрсний хулгайг таслан зогсоож, гэмт бүлэглэлд хариуцлага тооцохын төлөө ажиллаж байгаа Засгийн газрын эсрэг МАФ- ын “Бүлэглэл”-үүд маш хүчтэй эсэргүүцэн тэмцэж байна

Энэ тэмцэлд анх шүгэл үлээсэн ЗАСГИЙН ГАЗАР ялах учиртай. Хулгайтай тэмцэж байгаа Ерөнхий сайд, түүний Засгийн газар ялагдах ёсгүй

Хэрэв ялагдвал мөнгө эрх мэдлээр сүлбэлдсэн энэ МАФ-ын сүлжээ улс орон, ард түмний хувь заяаг монголчууд бидний урьд өмнө үзэж, туулж байгаагүй төсөөлшгүй эмгэнэлт байдалд оруулах нь эргэлзээгүй. Эх орноо ийм байдалд оруулахгүйн тулд ЗАСГИЙН ГАЗАРТ ард түмний дэмжлэг туйлын хэрэгтэй байна. Маш нарийн зохион байгуулалттай “Бүлэглэл”-тэй тэмцэхдээ ард түмнийхээ төлөөллийн зарим хэсгийн тавьж байгаа хэт яарсан, цаг хугацааны хувьд боломжгүй шаардлагын дагуу таамаг багцаагаар хөдөлбөл ЗАСГИЙН ГАЗАР хууль зөрчин, улмаар буруудаж, ялагдахад хүрнэ.

Иймд нүүрсний хулгайтай шаргуу, нухацтай тэмцэж байгаа ЗАСГИЙН ГАЗАРТАА итгэл үзүүлэн хүлээцтэй байхыг ард түмэндээ хандан уриалж байна. Мөнгө эрх мэдлээр сүлбэлдсэн МАФ-ын “Бүлэглэл” гэдэг өргөн цар хүрээг хамарсан сүлжээ, бат бэх хэрэм тул ЗАСГИЙН ГАЗАР хуулийн бүх боломжоо дайчлан ажиллаж байж баттай нотлох баримтыг олж бүрдүүлээд ПРОКУРОРТ шилжүүлэх учиртай. Үүнд бага биш цаг хугацаа шаардлагатай. ПРОКУРОР хэргийг шалгаад ШҮҮХЭД шилжүүлэх ёстой. Шүүх хуулийн дагуу зохих шийтгэлийг ноогдуулах учиртай. Арав гаруй жил үргэлжилсэн НҮҮРСНИЙ ХУЛГАЙГ ингэж л уг үндсээр нь хуулийн дагуу дарж авна, өөр арга байхгүй

ЗАСГИЙН ГАЗРАА ДЭМЖИНЭ ГЭДЭГ БОЛ ЗАСГИЙН ГАЗАРТАА БУСАД ЗҮЙЛД САТААРАЛГҮЙ ТӨВЛӨРЧ АЖИЛЛАХ БОЛОЛЦООГ НЬ ОЛГОХЫН ХАМТ ЗАСГИЙН ГАЗРААС ХУЛГАЙ ЛУЙВАРТ ОРОЛЦСОН ХҮМҮҮС, ӨНДӨР АЛБАН ТУШААЛТНУУДЫГ ХААЦАЙЛАХГҮЙ, НАМ ХАРГАЛЗАХГҮЙ ХАРИУЦЛАГА ТООЦОХЫГ ШААРДАХ, ХУУЛЬ ХЯНАЛТЫН БАЙГУУЛЛАГУУДААС ШУДАРГА, ШУУРХАЙ АЖИЛЛАХЫГ ШААРДАХ ЯВДАЛ МӨН. АРД ТҮМНИЙ ЭНЭ ТЭМЦЭЛ ГЭМТ БҮЛЭГЛЭЛ, ГАДААДЫН ЗАРИМ ХҮЧНИЙ ТҮЛХЭЭСЭЭР ЗАСГИЙН ГАЗРАА УНАГАХЫН ТӨЛӨӨ ТЭМЦЭЛ БОЛОН ХУВИРАХ ЁСГҮЙ. ХЭРЭВ ИНГЭВЭЛ ЭНЭ НЬ ГАДААДЫН ОЛОН ОРОНД БОЛСОН ЭЛДЭВ ӨНГӨТ ХУВЬСГАЛЫН АДИЛ ХЭРЭГ БОЛНО ГЭДГИЙГ АРД ТҮМЭН МААНЬ МЭРГЭН УХААНДАА БОЛГООХ БОЛТУГАЙ" гэсэн байна.