Стандартчилал, техникийн зохицуулалт, тохирлын үнэлгээний итгэмжлэлийн тухай хуулийн шинэчилсэн найруулгын төсөл боловсруулагдаж байгаатай холбоотойгоор Монгол Улсын Шадар сайд С.Амарсайхан УИХ-ын даргын 84 дүгээр тогтоолоор байгуулагдсан Стандартын эрх зүйн орчныг шинэчлэх санал, дүгнэлт гаргах, холбогдох хууль тогтоомжийн төсөл боловсруулах үүрэг бүхий ажлын хэсгийн гишүүдийг хүлээн авч уулзлаа.
Тэрбээр уулзалтын эхэнд Стандарт, хэмжил зүйн газрын өнөөгийн байдал, тус салбарт тулгарч байгаа асуудал, цаашид хэрэгжүүлэх бодлого төлөвлөлт болон Стандартчилал, техникийн зохицуулалт, тохирлын үнэлгээний итгэмжлэлийн тухай хуулийн шинэчилсэн найруулгын төслийг танилцууллаа.
Анх 1994 онд Стандартчилал, чанарын баталгаажуулалтын тухай хууль батлагдаж, 2003 онд Стандартчилал, тохирлын үнэлгээний хууль болгон өөрчилж, дараа нь 2017 онд Стандартчилал, тохирлын үнэлгээний итгэмжлэлийн тухай хууль болгон шинэчилснээс хойш өдийг хүртэл тус хуульд ямар ч өөрчлөлт ороогүй байна.
Шадар сайд С.Амарсайхан “Стандарт бол эрүүл, аюулгүй орчинд амьдрах суурь нөхцөлийг бүрдүүлдэг гол хүчин зүйл. Монгол Улсын иргэд эрүүл, аюулгүй орчинд амьдрах Үндсэн хуулиар олгогдсон эрхтэй. Тиймээс Үндсэн хуулийн энэхүү заалттай уялдуулж Монгол Улсын Засгийн газрын 2020-2024 онд хэрэгжүүлэх үйл ажиллагааны хөтөлбөрт “Нэг улс-Нэгдсэн стандарт” зорилт туссан. Түүнчлэн “Алсын хараа-2050” Монгол Улсын урт хугацааны хөгжлийн бодлого болоод Шинэ сэргэлтийн бодлого, Хүнсний хангамж, аюулгүй байдлыг хангах талаар авах зарим арга хэмжээний тухай зэрэг бодлогын олон баримт бичигт стандартчилал, тохирлын үнэлгээний талаар тусгагдсан байдаг. Гэтэл өнгөрсөн хугацаанд манай нийгмийн бүхий л үйл ажиллагаанд стандартын хэрэгжилт туйлын дутмаг явж ирсэн. Учир нь Стандартчилал, тохирлын үнэлгээний итгэмжлэлийн тухай хуулийн “стандартыг сонгон хэрэглэнэ” хэмээх заалт нь стандартгүй, дүрэмгүй явах нөхцөлийг бүрдүүлсэн. Нөгөөтээгүүр стандартын хэрэгжилтийг биечлэн хариуцаж хэрэгжүүлж, хяналт тавих үүрэгтэй Мэргэжлийн хяналтын ерөнхий хяналтын газар татан буугдсанаас хойш стандартын хэрэгжилтийг хэн хариуцаж, стандартын хэрэгжилтийг хэнээс нэхэх нь тодорхойгүй, хийдэл гарсан.
Тиймээс Стандартчилал, техникийн зохицуулалт, тохирлын үнэлгээний итгэмжлэлийн тухай хуулийг шинэчлэн найруулах зайлшгүй шаардлага тулгарч байна. Энэхүү Стандартчилал, техникийн зохицуулалт, тохирлын үнэлгээний итгэмжлэлийн тухай хууль 7 бүлэг 34 зүйлтэй бөгөөд стандарт, тохирлын үнэлгээний салбар дундын зохицуулалтыг бий болгосон. Мөн стандартыг иргэн, хуулийн этгээд дагаж мөрдөхөөс гадна төрийн хяналт шалгалтыг илүү тодорхой болголоо.
Хуулийн нэр томьёоны тодорхойлолтыг ойлгомжтой, Стандартчилал, тохирлын үнэлгээний хөгжлийн сантай болгохоос гадна Монгол Улсын нутаг дэвсгэрт тохирлын үнэлгээний үйл ажиллагаа эрхлэх хуулийн этгээд бүр бүртгүүлнэ. Тохирлын үнэлгээний байгууллагын эрх үүргийг тодорхой болгож, мэдээллийн нэгдсэн санг бий болгоно. Мөн Засгийн газрын гишүүн, төрийн захиргааны төв байгууллага, Нийслэл Улаанбаатар хотын Засаг даргын бүрэн эрхийг тодорхой болгосон” хэмээв.
Түүнчлэн уг хууль батлагдсанаар иргэд аюулгүй орчинд амьдрах, эрүүл, чанартай бүтээгдэхүүн хэрэглэх, салбар бүрт шударга өрсөлдөөн бий болох зэрэг нийгэм, эдийн засагт эерэг олон нөлөөг үзүүлэх аж.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
