Төв талбайд өчигдөр өглөө 10:00 цагт эхэлсэн жагсаалыг Цагдаагийн байгууллага шөнийн 04.00 цагт тараасан. Өглөө Цагдаагийн байгууллагад мэдүүлэг өгсөн залуучуудыг өмгөөлсөн иргэд 10:00 цаг орчимд дахин цугларч, Төв талбайд жагсаал хоёр дахь өдрөө үргэлжилж байна.
Өдрийн 13:00 цагт Монгол Улсын Ерөнхий сайд Л.Оюун-Эрдэнэ Төв талбайд жагсаж буй залуучуудын төлөөлөгчидтэй уулзаж, тэдний байр суурийг сонслоо. Өчигдөр ХЗДХ-ийн сайд Х.Нямбаатарт дайсан залуучуудын 7 санал өнөөдөр 15 болж өргөжсөн байна.
Ерөнхий сайд Л.Оюун-Эрдэнэ залууст хандан хэлэхдээ: Өчигдөр Төв талбайд гарч ирэхийг хүссэн. Өнөөдөр амаргүй дүрэм журмыг давж энд зогсож байна. Бид шийдэл ярих ёстой. Та бүхний өөрчлөхийг хүссэн зүйлсийг өөрчлөхийг хичээж байна. Хамтдаа асуудлаа ярьж, шийдэл гарц гаргацгаая хэмээн мэдэгдлээ.
Залуучуудын тавьж байгаа олон давталттай гол шаардлагуудыг:
1. Үнийн өсөлтийг хязгаарлах,
2. Хөгжлийн банкнаас авсан зээлийг эргэн төлүүлэх,
3. Авлигачидтай хариуцлага тооцох, Авлигын гэмт хэрэгт шалгагдаж байгаа албан тушаалтнуудын хэргийг хөөн хэлэлцэх хугацаагаар хаадаг байдлыг зогсоох, зэрэг асуудлууд тэргүүлж байна.
Өнөөдөр дэлхий нийтийг хамарсан Ковид-19 цар тахлын нөлөө, ОХУ-д болж буй Орос, Украины хямрал зэрэг нь бараа бүтээгдэхүүний үнийг дэлхий даяар өсөхөд хүргэж байгаа. Засгийн газар гурил, будаа, шатахууны үнийг тогтвортой байлгах гэж бүгдийг хийж байгаа. Мөн Ерөнхий сайд Л.Оюун-Эрдэнэ залуучуудынхаа тавьж байгаа асуудлыг шийдвэрлэхийн тулд хамтын хүчээ ашиглах хэрэгтэйг санууллаа.
Жагсаж байгаа залуучуудаас Ажлын хэсэг гаргаж, асуудлаа хэлэлцээд явах, залуучууд энэ Ажлын хэсгээрээ дамжуулаад санал бодол, байр сууриа илэрхийлэн нэгтгэх саналыг тавьсан юм. Асуудал бүрийг шийдвэрлэхийн тулд хамтдаа гарц хайх хамгийн зөв сонголт нь энэ байх бөгөөд жагсагч залуучуудад Ажлын хэсгээ байгуулах, саналаа нэгтгэх боломжийг олгоод Ерөнхий сайд Төрийн ордон руу орлоо.
Залуучуудын тавьж байгаа саналаар Ерөнхий сайд Л.Оюун-Эрдэнэ Засгийн газрын хуралдааныг зохион байгуулна гэдгээ ч мэдэгдэв. Жагсаж байгаа залуучууд мөн өчигдөр болсон жагсаалын үеэр саатуулагдсан залуучуудыг суллахыг шаардсан юм. Ерөнхий сайд болон ХЗДХ-ийн сайд Х.Нямбаатар нар өчигдөр саатуулагдсан залуусаас мэдүүлэг аваад буцаасан, одоо Цагдаагийн байгууллагад саатуулагдсан нэг ч хүн байхгүй гэдгийг албан ёсоор мэдэгдээд энэ үйлдлийн төлөө уучлал гуйж байна хэмээн залуучуудаас уучлал гуйв.
Яг одоо Төв талбай дээр жагсагч залуучууд Ажлын хэсэг байгуулах ажлыг зохион байгуулах асуудлаа хэлэлцэх ажилдаа орлоо.
Гэхдээ тэд “Дүү нараа дэмжиж байна” гэсээр өнөөдөр өглөөний жагсаалыг эхлүүлсэн дундаж насныхныг Ажлын хэсэгт багтаах сонирхол алга байх шиг харагдаж байна.
Зургийг: Ganjavkhlan Chadraabal
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
